Anndude Suuratu An-Nur

Simoore, Men jippinii nde Men farlii nde, Men jippini e nder mayre Aayeeje ɓannguɗe belajo’o onon on waajitoto

Debbo jinoowo on e gorko jeenoowo on foccee gooto kala e maɓɓe paatawol(looci) teemedere, wata yurmeende maɓɓe nanngu on e fii Diina Alla kan, si tawii on laatike hiɗon gomɗini Alla e Ñalaande Laakara nden. Yo seedo foccugol ɓe ngol jamaa immorde e gomɗinɓe ɓen

Gorko jinoowo on o resataa si wonaa debbo jeenoowo maaɗum sirkoowo, debbo jinoowo on resatah mo si wanaa gorko jinoowo maaɗum sirkoowo, ɗum harminaama e dow gomɗinɓe ɓen

E ɓen ɓe no tukka rewɓe saŋiiɓe ɓen refti hara ɓe addaali seedeeɓe nayo, haray piyee ɓe paatawol(looci) cappanɗe jeetati. Wata on jaɓan ɓe seedagol poomaa. Ɓen ɗon, ko kamɓe woni Faasiqiiɓe ɓen

Si wanaa ɓen tuubuɓe ɓaawo ɗum ɓe moƴƴini. Pellet, Alla ko O Surroowo Yurmeteeɗo

E ɓen ɓe no tukka sonnaaɓe maɓɓe ɓen hara laatanaaki ɓe seedeeɓe si wanaa wonkiiji maɓɓe ɗin, ko yo goɗɗo e maɓɓe seedo seedeeji nayi [o woondira] Alla pellet, kanko ko e goonguɓe ɓen o jeyaa

Jowaɓun ɗum, wonndema yo kuddi Alla wonu e dow makko si o laatike jeyaaɗo e fenooɓe ɓen

Ɓe dunyira e [sonnaajo on] lepte ɗen, nde o seedotoo seedeeji nayi [o woondira] Alla, pellet [gorko on] ko e fenooɓe ɓen o jeyaa

Jowaɓun ɗum, ko nde Alla tikkata e dow makko si [gorko on] laatike ko e goonguɓe ɓen o jeyaa

Sinndo wanaano Ɓural Alla ngal e dow mooɗon e Yurmeende Makko nden, e wonndema Alla ko O jaɓoowo tuubuubuye Ñeeñuɗo

Pellet, ɓen adduɓe penaale ɗen ko ɓe jamaa jeyaaɗo e mooɗon, wata on sikku ɗum ko bone mo’on; ko woni ɗum ko moƴƴere mo’on. No woodani kala neɗɗo immorde e maɓɓe ko o faggitii kon e junuubu, on fawtiiɗo mawɗum [junuubu on] immorde e maɓɓe, no woodani mo Lepte mawɗe

Ko haanunoo tuma nde nanuɗon ɗum, worɓe gomɗinɓe ɓen e rewɓe gomɗinɓe ɓen ɓe yananee ka wonkiiji maɓɓe ko moƴƴi, ɓe wi`a: "Ɗum ko penaale ɓannguɗe nii

Ko haanunoo ko nde ɓe addata e ɗum seedeeɓe nayo, si ɓe addaali seedeeɓe ɓen; haray ɓen ɗon, ka Alla ko kamɓe woni fenooɓe ɓen

Sinndo wonaano Ɓural Alla ngal e Yurmeende Makko nden e dow mooɗon ka aduna e ka laakara Lepte mawɗe meemayno on fii kon ko ukkiɗon e muuɗum

Tuma nde werloraynoɗon ɗum ɗennɗe mooɗon, wowliron kunnduɗe mooɗon kon ko ganndal alanah on e muuɗum sikkon ɗum kadi ko newiiɗum, hara non ɗum ko mawnuɗom ka Alla

Ko haanunoo tuma nanuɗon nde, wi’on: "Haanaa men nde men wowlata e dum, Senayee woodanii Ma, ɗum ko fenaande mawnde nii

Alla no waajaade on fii wata on fillo sugu [ndee fenaande] poomaa, si tawii on laatike gomɗinɓe

Alla no ɓannginannde on Aayeeje ɗen Alla ko O Annduɗo Ñeeñuɗo

Pellet, ɓen yiɗuɓe yo bone ɗen saako e [hoore] ɓen gomɗinɓe; no woodani ɓe Lepte muusuɗe ka aduna e ka Laakara. Alla no Anndi, onon on anndah

Sinndo wanaano Ɓural Alla ngal e dow mooɗon e Yurmeende Makko nden e tawde pellet, Alla ko O Newiiɗo Hinndotooao

Ko onon ɓen gomɗinɓe, wata on jokku ɗate Seytaane ɗen, kala jokkuɗo ɗate Seytaane ɗen, pellet, o yamiray [mo] ko boni kon e ko añaa kon. Sinndo wonaano Ɓural Alla ngal e dow mooɗon e Yurmeende Makko nden; hay e gooto e mooɗon laaɓataano poomaa, kono Alla hiMo laɓɓina on mo O Muuyi. Alla ko O Nanoowo Annduɗo

Wata joomiraaɓe ɓural ngal e yaajeende nden e mooɗon woondu wonndema ɓe okkortaa ɓadondiraaɓe ɓen e ɓilliiɓe ɓen e feruɓe ɓen ka Laawol Alla, yo ɓe yaafo. Kaa on yiɗaa yo Alla yawtan on? Alla ko O Yawtoowo Yurmeteeɗo

Pellet, ɓen wonuɓe tukkude [sonnaaɓe] saŋiiɓe welsindiiɓe gomɗinɓe, ɓe huɗaama ka aduna e ka Laakara no woodani ɓe Lepte mawɗe

Ñalnde seedoytoo e dow maɓɓe ɗenɗe maɓɓe ɗen e juuɗe maɓɓe ɗen e koyɗe maɓɓe ɗen, ko ɓe laatinoo kon hiɓe golla

Nden Ñalnde Alla huuɓinanay ɓe [njoɓdi] Diina maɓɓe Goongaha kan, ɓe annda pellet, Alla ko Kanko woni Goonga Ɓannguka kan

Rewɓe soɓuɓe ɓen ko fii worɓe soɓuɓe ɓen. Worɓe soɓuɓe ɓen ko fii rewɓe soɓuɓe ɓen. Rewɓe laaɓuɓe ɓen ko fii worɓe laaɓuɓe ɓen, worɓe laaɓuɓe ɓen ko fii rewɓe laaɓuɓe ɓen. Ɓee ɗoo ko hisnaaɓe e kon ko ɓe wowlata, no woodani ɓe haforaneede e arsike tedduɗo

Ko onon yo gomɗinɓe, wata on naatu e cuuɗi tanaa cuuɗi mo’on ɗin haa duŋinoɗon salminon e dow yimɓe majji ɓen, ko ɗum ɓuri moƴƴannde on. Bela jo’o onon on waajitoto

Si on tawaali nder ton goɗɗo, wata on naatu ton haa duŋaneɗon, si on wi`aama: "Yiltee" haray yiltee, ko ɗum ɓuri laaɓannde on. Alla non hiMo Anndi ko golloton kon

Bakkaatu fawaaki on nde naatoton e cuuɗi ɗi hoɗiraaka hara no e nder majji miranhoy mo’on, Alla non hiMo Anndi ko wonɗon e feññinde e ko wonɗon e suuɗude

Maakan worɓe gomɗinɓe ɓen yo ɓe heltu ndarɗe maɓɓe ɗen ɓe reena farjuuji maɓɓe ɗin, ko ɗum ɓurata laɓɓinnde ɓe. Pellet, Alla ko O Humpitiiɗo ko ɓe huuwata

Maakan rewɓe gomɗinɓe ɓen yo ɓe heltu ndarɗe maɓɓe ɗen, ɓe reena farjuuji maɓɓe ɗin, wata ɓe feññin cuɗaari maɓɓe ndin si wanaa ko feeñi kon e mayri. Yo ɓe fawu tiggaaje maɓɓe ɗen ka becce maɓɓe, wata ɓe feññinan cuɗaari maɓɓe ndin si wanaa genndiraaɓe maɓɓe ɓen maaɗum baabiraaɓe maɓɓe maaɗum baabiraaɓe genndiraaɓe maɓɓe maaɗum ɓiɗɓe maɓɓe, maaɗum ɓiɗɓe genndiraaɓe maɓɓe maaɗum musiɗɓe maɓɓe, maaɗum ɓiɗɓe musiɗɓe maɓɓe, maaɗum ɓiɗɓe banndiraaɓe maɓɓe, maaɗum sonnaaɓe maɓɓe, maaɗum ɓen ɓe ɓe jeyiri ñaame maɓɓe maaɗum ɓen worɓe jokkooɓe ɓe haaju mun alaa e rewɓe, maaɗum boobo mo ƴellitaaki e awraaji sonnaaɓe ɓen. Wata ɓe tappindir koyɗe maɓɓe ɗen fii yo Annde ko ɓe suuɗi kon immorde e cuɗaari maɓɓe. Tuubee ruttoɗon ka Alla on fow mo’on, ko onon yo gomɗinɓe bela jo’o on malete

Resinee ɓe resaali ɓen e mooɗon e moƴƴuɓe ɓen immorde e muccuɓe mooɗon e horɓe mooɗon, si ɓe laatike waasuɓe Alla alɗinay ɓe immorde e Ɓural Makko ngal, Alla ko O Yaajuɗo Annduɗo

Ɓe heɓaali feere resugol ɓen yo ɓe habbo haa Alla alɗinira ɓe Ɓural Makko ngal. Ɓen wonuɓe ɗaɓɓude soottaade e ɓen ɓe ñaame mooɗon jeyi, soottaadede ɓe si on anndii e maɓɓe moƴƴere, jonnee ɓe immorde e jawdi Alla ndin, ndin ndi O jonni on, wata on waawnu horɓe mooɗon ɓen e fii jeeno, si ɓe faandike saŋaade, wata on ɗaɓɓu jawkal ngurndam aduna, kala waawnuuɗo ɓe pellet, Alla ɓaawo baawnugol ɓe ko O Surroowo Yurmiteeɗo

Gomɗii Men jippinii e mooɗon Aayeeje ɓannguɗe e misal immorde e ɓeya wulinooɓe ko adii on e waaju wonannde hulooɓe [Alla] ɓen

Ko Alla woni Ndaygu kammuuli ɗin e leydi ndin, sifa Ndaygu Makko ngun ko wano tuɗɗere hara no e mayre pitilol(lampu), pitilol ngol wona e nder biiniiri, biiniiri ndin hara hindi wa’i wa hoodere jalbunde hinde huɓɓa immorde e leggal barkinaangal nebbantewal ngal wonaa funnaangeyankowal ngal wonaa hirnaangeyankowal nebban maggal ɗan no ɓadoo jalbude, hay si yiite meemaali ɗan, ndaygu e hoore ndaygu, Alla no fewnira ndaygu Makko ngun on mo O Muuyi, Alla no piyana yimɓe ɓen mise, Alla ko O Annduɗo kala huunde. @Corrected

E nder cuuɗi ɗi Alla duŋii(sakkiti) yo darne Innde Makko jantee e nder majji Subunhinanee Mo nder majji ka bimmbi e ka kiikiiɗe

Worɓe ɓe njulaaku e ngeyngu maapintaa ɗum gaayi jaŋtagol Alla e ñimnugol Julde nden e tottu- gol Jakka on, hiɓe huli Ñalaande nde waylitoytoo e muuɗum ɓerɗe ɗen e giiɗe ɗen

Fii yo Alla yoɓoyɓe ko ɓuri moƴƴude ko ɓe gollunoo kon, O ɓeydana ɓe e Ɓural Makko ngal. Alla no arsika on mo O Muuyi ko Aldaa hasboore

Ɓen yedduɓe, golle maɓɓe ɗen no wa’i wa merere wonunde e boowal, ɗonɗaaɗo on no sikka ko nde ndiyam, haa si o arii e mayre o tawataa hay e huunde, o tawa Alla ka Makko O huuɓinana mo hasboore makko nden, Alla ko O Yaawuɗo Hasboore. @Corrected

Maaɗum ko wano niɓe e maayo luggungo, no suddi ngo benpeƴƴe no dow maggo benpeƴƴe no dow majje duule, niɓe yoga e majje no e dow yoga, si o yaltinii junngo makko ngon o ɓadotaako yi’ugol ngo. On mo Alla waɗanaali ndaygu hara o alaa ndaygu

Enee, a yi`aali wonndema Alla no subuhinanaade Mo ɓen wonuɓe ka kammuuli e ka leydi e colli ɗin kadi ko saffiniiɗi? Gooto kala e ɗii gomɗii anndii julde mu’un nden e subuhinaali mu’un ɗin, Alla ko O Annduɗo ko ɓe Huuwata

Ko Alla heeranii Laamu kammuuli ɗin e leydi ndin, ko faade ka Alla woni waɗtinirde nden

Enee, a yi`aali wonndema Alla hiMo sogga duulere, refti O hawtindira nde, refti O waɗa nde fawondirnde hiɗa yi`a toɓo ngon no yalta e nder mayre, ngo jippoo immorde ka kammu, immorde e pelle no e nder mayre marmalle hiMo hewtina ɗe on mo O Muuyi, hiMo pottina ɗe on mo O Muuyi? Ndaneeri maƴe mayre no do’a naɓude giiɗe ɗen

Alla hiMo waylita jemma on e ñalorma on, pellet, na wonii e ɗum tasakuyee wonannde joomiraaɓe giiɗe ɓen

Ko Alla tagii kala daabe hun immorde e ndiyam, no e majji yaarooji reedu muuɗum, no e majji yaarooji koyɗe muuɗm no e majji kadi yaarooji [koyɗe] nayi. Alla hiMo Taga ko O Muuyi, pellet, Alla ko O hattanɗo kala huunde

Gomɗii Men jippinii Aayeeje ɓannguɗe, Alla no fewna on mo O muuyii faade e Laawol foccii ngol

Hiɓe wi`a: "Men gomɗinii Alla e Nulaaɗo on, men ɗoftike, refti huccita fedde goo e maɓɓe, ɓaawo ɗum, ɓen wonaali gomɗinɓe

Si ɓe noddaama faade ka Alla e Nulaaɗo Makko on fii yo o ñaawu hakkunde maɓɓe, tawa fedde goo e maɓɓe ko ɓe ɗuurniiɓe

Si tawii ko kamɓe mari goonga kan, ɓe aray ka makko ko ɓe ɗoftiiɓe

Enee, ko nawnaare woni ka ɓerɗe maɓɓe, kaa ɓe sikkiti, kaa ɓe hulu wata Alla e Nulaaɗo Makko on tooñu ɓe? Ko woni, ɓee ko kamɓe woni tooñooɓe ɓen

Anndu ko woni konngol gomɗinɓe ɓen si ɓe noddaama faade ka Alla e Nulaaɗo Makko on fii yo o ñaawu hakkunde maɓɓe, ko nde ɓe wi`ata: "Men nanii men ɗoftike." Ɓen ɗon ko kamɓe woni malaaɓe ɓen

Kala ɗoftiiɗo Alla e Nulaaɗo Makko on o huli Alla o rentii [e Lepte Makko ɗen] haray ɓen ɗon ko kamɓe woni malaaɓe ɓen

Ɓe woondiri Alla, e hattirde goondooje maɓɓe, si a yamirii ɓe ma ɓe yaltu sanne. Maaku: "wata on woondu, ɗoftaare no anndaa, pellet, Alla ko humpitiiɗo ko golloton

Maaku: "Ɗoftee Alla ɗoftoɗon Nulaaɗo on". Si ɓe huccitii(runtiima) anndu ko fawii mo ko, ko o roondaa kon, no fawii on ko roonda ɗon kon, si on ɗoftike mo on feeway, fawaaki Nulaaɗo on si wanaa yottinngol ɓanngungol

Alla Fodii ɓen gomɗinɓe e mooɗon ɓe golli moƴƴi ɗin O lontinay ɓe ka leydi wano O lontinirnoo non ɓen adiiɓe ɓe, ma O weeɓinan ɓe diina maɓɓe ka O welanaa ɓe, ma O wattitan ɓe ɓaawo kulol maɓɓe ngol hoolaare, Yo ɓe rewam wata ɓe sirkanam hay e huunde. Kala yedduɗo ɓaawo ɗum haray ɓen ɗon ko kamɓe woni faasiqiiɓe ɓen

Ñiiɓee e Julde totton Jakka on ɗoftoɗon kadi Nulaaɗo on, bela jo’o on Yurmete

Wata a sikku ɓeen yedduɓe ɓe laawoto ka leydi, jaaƴorde maɓɓe nden ko ka Yiite, pellet, bonii wattnde

Ko onon yo gomɗinɓe, yo sakkintino e mooɗon ɓen ɓe ñaame mooɗon jeyi, e ɓen ɓe yottaaki koyɗol immorde e mooɗon, laabi tati ko adii Julde Peeral nden, e tuma wallinton conci mooɗon ka njolloro e ka ɓaawo Julde geeƴe ko awraaji mooɗon tati non. Bakkaatu fawaaki on fawaaki ɓe ɓaawo majji, jinndooɓe hakkunde mooɗon, yoga e mooɗon e dow yoga. Ko wano nii Alla ɓanngini- rani on Aayeeje ɗen Alla ko O Annduɗo Ñeeñuɗo

Si sukaaɓe mooɗon yottike kellefuyee, yo ɓe sakkitinono wano duŋinornoo non ɓen adiiɓe ɓe, ko wano nii Alla ɓannginiranta on Aayeeje Makko ɗen, Alla ko O Annduɗo Ñeeñuɗo

E sonnaaɓe jottiiɓe ɓen, ɓen ɓe jortaaki desal bakkaatu fawaaki ɓe nde ɓe wallinta conci maɓɓe ɗin hara ɓe wonaa feññinɓe cuɗaari, ko nde ɓe nantotoo ɓuri moƴƴannde ɓe, Alla ko O Nanoowo Annduɗo

Bakkaatu fawaaki bunɗu on, bakkaatu fawaaki laƴuɗo on, bakkaatu fawaaki nawnuɗo on, fawaaki e wonkiiji mooɗon nde ñaamoton ka cuuɗi mooɗon maaɗum ka cuuɗi baabiraaɓe mooɗon, maaɗum ka cuuɗi neeniraaɓe mooɗon, maaɗum ka cuuɗi musiɗɓe mooɗon, maaɗum ka cuuɗi banndiraaɓe mooɗon, maaɗum ka cuuɗi bappiraaɓe mooɗon, maaɗum ka cuuɗi yaayiraaɓe mooɗon, maaɗom ka cuuɗi kaawiraaɓe mooɗon, maaɗum ka cuuɗi neeniraaɓe mooɗon ka dewol, maaɗum ɗin ɗi jogiɗon cottirɗe muuɗum, maaɗum giɗo mooɗon. Bakkaatu fawaaki on nde hawtoton ñaamon maaɗum ñaamon ko on sertuɓe. Si on naatay e cuuɗi salminee e dow wonkiiji mooɗon, hiwraango immorde ka Alla barkinaango laaɓungo, ko wano nii Alla ɓannguniranta on Aayeeje ɗen belajo’o onon on haqqilay

Anndu gomɗinɓe ɓen ko ɓen gomɗinɓe Alla e Nulaaɗo Makko on, si ɓe laatike hiɓe wonndi e makko e dow fiyaake moftuɗo, ɓe yahatah haa ɓe duŋinoo e makko, pellet, ɓen ɗaɓɓirayɓe ma duŋayee ko ɓen ɗon woni gomɗinɓe Alla e Nulaaɗo Makko on, si ɓe ɗaɓɓirii ma duŋayee fii yoga e fiyaake maɓɓe, duŋano on mo yiɗuɗaa [duŋanaade] e maɓɓe, insinanoɗaa ɓe ka Alla. Pellet, Alla ko O Surroowo Yurmeteeɗo

Wata on waɗu noddugol Nulaaɗo on hakkunde mooɗon wano noddugol yoga e mooɗon yoga. Gomɗii Alla no Anndi ɓen sortotooɓe e mooɗon e moltagol, ɓen wonuɓe lunndaade yamaruyee makko on, yo ɓe rento fii wata fitina hiɓu ɓe maaɗum Lempte muusuɗe heɓa ɓe

Ko non woniri, pellet, ko Alla heeranii ko woni kon ka kammuuli e ka leydi gomɗii hiMo Anndi ko wonuɗon e hoore mu’un kon, Ñalnde ɓe ruttetee faade ka Makko O yeetoo ɓe ko ɓe gollunoo kon. Alla ko O Annduɗo kala huunde