Batiya Surah Al-Hujurat Maranao – Baalikan ago Kadngug

Surah Al-Hujurat ko Arab ago Maranao

Batiya so Surah Al-Hujurat ago so bantog a baalikan Maranao, ago kadngug. Kabaalikan o oman i ayat. (18 Ayat — مدنية). Al-Hujurat Pamakin'eg, Al-Hujurat Baalikan, Al-Hujurat mp3, Al-Hujurat pdf.

Batiya ago Pamakin'eg ko Surah Al-Hujurat

🎧 Ayat

Ayat: —

Repeat: x1

يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ ۖ وَاتَّقُوا اللَّهَ ۚ إِنَّ اللَّهَ سَمِيعٌ عَلِيمٌ ۝١

📖 Baalikan Ayat 1

Hay so miyamaratiyaya, di niyo pagonai so Allah go so sogo Iyan; go kalkn iyo so Allah: Mataan! a so Allah na Pphakan´g, a Matao

يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لِبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ ۝٢

📖 Baalikan Ayat 2

Hay so miyamaratiyaya, di niyo pphoroon so manga sowara niyo sa makaombaw ko sowara o Nabi, go di niyo pphamakatanogi skaniyan sa katharo, lagid o kapphamakatanogi o sabaad rkano ko sabaad, ka oba maylang so manga amal iyo a skano na di niyo maiin´ngka

إِنَّ الَّذِينَ يَغُضُّونَ أَصْوَاتَهُمْ عِندَ رَسُولِ اللَّهِ أُولَٰئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَىٰ ۚ لَهُم مَّغْفِرَةٌ وَأَجْرٌ عَظِيمٌ ۝٣

📖 Baalikan Ayat 3

Mataan! a so ibababa iran so manga sowara iran ko hadapan o Rasolollah, - na siran man so tiyolabos o Allah so manga poso iran ko kapananggila: Adn a bagian iran a maap ago balas a lbi a mala

إِنَّ الَّذِينَ يُنَادُونَكَ مِن وَرَاءِ الْحُجُرَاتِ أَكْثَرُهُمْ لَا يَعْقِلُونَ ۝٤

📖 Baalikan Ayat 4

Mataan! a so siran a pthawagn ka iran (ya Mohammad) ko liyo o manga bilik, - na so kadaklan kiran na di siran phamanabot

وَلَوْ أَنَّهُمْ صَبَرُوا حَتَّىٰ تَخْرُجَ إِلَيْهِمْ لَكَانَ خَيْرًا لَّهُمْ ۚ وَاللَّهُ غَفُورٌ رَّحِيمٌ ۝٥

📖 Baalikan Ayat 5

Na o mataan! a siran na miphantang siran taman sa kaliyowing ka kiran, na mataan a khabaloy a mapiya a bagian iran: Na so Allah na Manapi, a Makalimoon

يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ ۝٦

📖 Baalikan Ayat 6

Hay so miyamaratiyaya, o adn a miyoma rkano o songklid a tothol, na amada niyo, ka oba niyo kapmaratai so pagtaw sabap ko di kapakakakaip, na mabaloy kano ko pinggolawla niyo a khipakazsndit

وَاعْلَمُوا أَنَّ فِيكُمْ رَسُولَ اللَّهِ ۚ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُّمْ وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ ۚ أُولَٰئِكَ هُمُ الرَّاشِدُونَ ۝٧

📖 Baalikan Ayat 7

Na tangkda niyo a mataan! a matatago rkano so sogo o Allah: Amay ka onotang kano niyan ko madakl ko pkhawlawla, na mataan a makandarasag kano; na ogaid na so Allah na piyakikababayaan Iyan rkano so paratiyaya, go pipharasan Iyan oto ko manga poso iyo, go piyakikagowad Iyan rkano so kaongkir, go so kapanongklid, go so kandarowaka: Siran man na siran so khipakaoontol

فَضْلًا مِّنَ اللَّهِ وَنِعْمَةً ۚ وَاللَّهُ عَلِيمٌ حَكِيمٌ ۝٨

📖 Baalikan Ayat 8

Gagaw a phoon ko Allah, go limo. Na so Allah na Matao, a Mawngangn

وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا ۖ فَإِن بَغَتْ إِحْدَاهُمَا عَلَى الْأُخْرَىٰ فَقَاتِلُوا الَّتِي تَبْغِي حَتَّىٰ تَفِيءَ إِلَىٰ أَمْرِ اللَّهِ ۚ فَإِن فَاءَتْ فَأَصْلِحُوا بَيْنَهُمَا بِالْعَدْلِ وَأَقْسِطُوا ۖ إِنَّ اللَّهَ يُحِبُّ الْمُقْسِطِينَ ۝٩

📖 Baalikan Ayat 9

Na o adn a dowa ka sagorompong ko miyamaratiyaya a pmbobono siran; na tanora niyo siran. Na amay ka phanalimbotan o isa sa dowa oto so pd iyan, na pakimbono kano ko phanalimbot taman sa di mndod ko sogoan o Allah; na amay ka mndod, na tanora niyo siran ko ontol, go paginontolan kano. Mataan! a so Allah na pkhababayaan Iyan so manga oontol

إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ ۚ وَاتَّقُوا اللَّهَ لَعَلَّكُمْ تُرْحَمُونَ ۝١٠

📖 Baalikan Ayat 10

So miyamaratiyaya na aya bo magariyari: Na tanora niyo so manga pagari niyo, go kalkn iyo so Allah, ka ang kano mipangalimo

يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ ۖ وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ ۖ بِئْسَ الِاسْمُ الْفُسُوقُ بَعْدَ الْإِيمَانِ ۚ وَمَن لَّمْ يَتُبْ فَأُولَٰئِكَ هُمُ الظَّالِمُونَ ۝١١

📖 Baalikan Ayat 11

Hay so miyamaratiyaya, di phamagrgi o isa a pagtaw so isa a pagtaw: Ka masikn a mabaloy siran (a pphamagrgan) a tomo a di siran, go di (phamagrgi o) manga babay so manga pd a babay: Ka masikn a mabaloy siran a tomo a di siran: (a pphamagrg); go di niyo pphapaawinga so (manga pd o) manga ginawa niyo, go di niyo pthatalowaan so manga patogina a piyakagowagowad. Miyakaratarata a ngaran so kapanongklid ko oriyan o paratiyaya. Na sa taw a di niyan thawbatn, na siran man na siran so manga darowaka

يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَب بَّعْضُكُم بَعْضًا ۚ أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّهَ ۚ إِنَّ اللَّهَ تَوَّابٌ رَّحِيمٌ ۝١٢

📖 Baalikan Ayat 12

Hay so miyamaratiyaya, pakawatani niyo so madakl a kapanganganib; ka mataan! a so sabaad ko kapanganganib na dosa; go di kano pphanoriman, go di pphamagantaa o sabaad rkano so sabaad. Ba khabayai o isa rkano a kakana niyan ko sapo o pagari niyan a miyatay? Na inikagowad iyo to! Na kalkn iyo so Allah: Mataan a so Allah na pphanarima ko tawbat, a Makalimoon

يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ ۝١٣

📖 Baalikan Ayat 13

Hay manga manosiya, mataan! a Skami na inadn Ami skano a phoon sa mama ago babay, go biyaloy Ami skano a mbarambarang a bangnsa, ago pithikaloksan, ka ang kano makakhikilalai. Mataan! a aya lbi a sslaan rkano sii ko Allah na so lbi a masanggila rkano. Mataan! a so Allah na Matao, a Kaip

۞ قَالَتِ الْأَعْرَابُ آمَنَّا ۖ قُل لَّمْ تُؤْمِنُوا وَلَٰكِن قُولُوا أَسْلَمْنَا وَلَمَّا يَدْخُلِ الْإِيمَانُ فِي قُلُوبِكُمْ ۖ وَإِن تُطِيعُوا اللَّهَ وَرَسُولَهُ لَا يَلِتْكُم مِّنْ أَعْمَالِكُمْ شَيْئًا ۚ إِنَّ اللَّهَ غَفُورٌ رَّحِيمٌ ۝١٤

📖 Baalikan Ayat 14

Pitharo o (manga Badawi a) manga Arab a: "Miyaratiyaya kami". Tharoang ka (ya Mohammad) a: "Da kano paratiyaya, na ogaid na aya tharoa niyo na somiyangkop kami, ka da pn sold so paratiyaya ko manga poso iyo. Na amay ka onotan iyo so Allah ago so sogo Iyan, na da a korangn Iyan rkano ko manga amal iyo a mayto bo. Mataan! a so Allah na Manapi, a Makalimoon

إِنَّمَا الْمُؤْمِنُونَ الَّذِينَ آمَنُوا بِاللَّهِ وَرَسُولِهِ ثُمَّ لَمْ يَرْتَابُوا وَجَاهَدُوا بِأَمْوَالِهِمْ وَأَنفُسِهِمْ فِي سَبِيلِ اللَّهِ ۚ أُولَٰئِكَ هُمُ الصَّادِقُونَ ۝١٥

📖 Baalikan Ayat 15

Aya bo a titho a khipaparatiyaya na so piyaratiyaya iran so Allah go so sogo Iyan, oriyan iyan na da siran paganganangan, go inipanagontaman iran so manga tamok iran go so manga ginawa iran ko lalan ko Allah: Siran man na siran so mimamataan

قُلْ أَتُعَلِّمُونَ اللَّهَ بِدِينِكُمْ وَاللَّهُ يَعْلَمُ مَا فِي السَّمَاوَاتِ وَمَا فِي الْأَرْضِ ۚ وَاللَّهُ بِكُلِّ شَيْءٍ عَلِيمٌ ۝١٦

📖 Baalikan Ayat 16

Tharoang ka a: "Ba niyo phakitokawi ko Allah so okit iyo, a so Allah na katawan Iyan so zisii ko manga langit ago so zisii ko lopa? Na so Allah sii ko langowan taman na katawan Iyan

يَمُنُّونَ عَلَيْكَ أَنْ أَسْلَمُوا ۖ قُل لَّا تَمُنُّوا عَلَيَّ إِسْلَامَكُم ۖ بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ إِن كُنتُمْ صَادِقِينَ ۝١٧

📖 Baalikan Ayat 17

Pphamagitongn iran a limo iran rka (ya Mohammad) a kiyapag-Islam iran. Tharoang ka a: "Di niyo pphamagitonga a limo iyo rakn a kiyapag-Islam iyo. Kna, ka so Allah na iphananakawan iyan rkano a kiyatoroa Niyan rkano ko paratiyaya, o skano na mmamataan kano

إِنَّ اللَّهَ يَعْلَمُ غَيْبَ السَّمَاوَاتِ وَالْأَرْضِ ۚ وَاللَّهُ بَصِيرٌ بِمَا تَعْمَلُونَ ۝١٨

📖 Baalikan Ayat 18

Mataan! a so Allah na katawan Iyan so migagaib ko manga langit ago so lopa: Na so Allah na phagilayn Iyan so gii niyo nggolawlaan

← 48 Al-Hujurat (49/114) 50 →

Batiya Surah Al-Hujurat Maranao – Baalikan ago Kadngug

49الحجرات Al-Hujurat 📚 18 Ayat مدنية