Al-Qur'aana Hello 123

Ko onon yo gomɗimɓe, annde esiwram= sanngara ɗam, e karte ɗen, e sanamuuji ɗin e payaloy koy [fow] ko soɓe jeyaaɗum e golle seytaane,woɗɗitee ɗum, belajo’o, on maloyte

Anndee ko seytaane faalaa, ko nde o liɓata ngayngu e konnaagu hakkunde mo’on ka siwram e ka karte, o sakkoo on gaay e jantagol Alla e julde nden. Hara onon ko on haɗitotooɓe

Ɗoftee Alla, ɗoftoɗon Nulaaɗo on, rentoɗon ! Si on huccitii, anndee pellet, ko fawii Nulaaɗo Amen on, ko yottingol ɓanngina

Bakkaatu fawaaki ɓen gomɗimɓe ɓe golli golle-moƴƴe e kon ko ɓe nyaamuno si ɓe gomɗii ɓe gomɗinii ɓe golli golle-moƴƴe, refti ɓe gomɗi ɓe gomɗini, refti ɓe gomɗi ɓe moƴƴini. Alla No Yiɗi moƴƴinooɓe ɓen

Ko onon yo gomɗimɓe, ma Alla Jarribor on huunde e mbaroodi=raddo, hiɗon nanngira ɗum juuɗe mon ɗen e gaawe mon ɗen ; fii no Alla Anndira on huloowo Mo e birnal. Kala jaggituɗo ɓaawo ɗum, hino woodani mo lepte muusuɗe

Ko onon yo gomɗimɓe, wata on waru mbaroodi=raddaande hara ko on horminii ɓe. Kala warɗo ndi e mooɗon ko o tewiiɗo, njoɓdi mun, ko yeru kon ko o wari neemoraaɗi, ñaawa ɗum joomiraaɓe nunɗal ɗiɗo e mooɗon, neldaari yottotoondi Kaaba on, maa kaffaara ñammingol miskiimɓe, maa ko fotata ɗum ɗon koorka fii yo o meeɗu battane fiyaake makko on. Alla Yaafike kon ko feƴƴi ; kala ruttiiɗo, Alla Yottoto e Makko. Alla ko Fooluɗo, Jom-yottagol