Suuratu Al-Fath pdf

Men udditanii ma uddital ɓanngungal

fii no Allah yawtirani kon ko ardinɗaa e junuubi, e ko sakkitii, e fii no O timminira neema Makko on e maaɗa, O fewne e laawol foocciingol

e no Allah wallire ballal tiiɗungal

Ko Kanko woni jippinɗo deeƴere nden e ɓerɗe gomɗimɓe ɓen, fii no ɓe ɓeydora gomɗinal e dow gomɗinal maɓɓe ngal. Ko Allah woodani koneeli kammuuli ɗin e leydi ndin; Allah siforii wonnde Annduɗo, Ñeeñuɗo

e fii no O naadira gomɗimɓe worɓe ɓen e gomɗimɓe rewɓe ɓen, Aljannaaji ɗi canɗi ilata ley mun, ko ɓɗe duumotooɓe e majji, e no O montira-naɓe banɗi maɓɓe ɗin. Ɗum wonii ka Allah, malal mawnungal. @Corrected

E no O leptira naafiqiiɓe worɓe ɓen e naafiqiiɓe rewɓe ɓen, e sirkooɓe worɓe ɓen e sirkooɓe rewɓe ɓen, sikkooɓe Allah sikke bonɗe. Yiiloonde bonɗi ngonii e dow maɓɓe. Allah tikkaniiɓe kadi, O huɗii ɓe, O hebilanii ɓe Jahannama. Nge bonii ruttorde

Ko Allah woodani konuuji kammuuli ɗin e leydi ndin. Allah siforii wonnde Fooluɗo, Ñeeñuɗo

Men nulirii ma seedotooɗo, wewlinoowo, e jertinoowo

fii no gomɗiniron Allah e Nulaaɗo Makko on, mawninon mo, teddinon mo, subbunhinanoɗon Mo bimmbi e kiikiiɗe

Pellet, ɓen wonɓe ahodude e maaɗa, anndu ko Allah ɓe woni e ahodude. Junngo Allah ngon no senngo dow juuɗe maɓɓe ɗen. Kala non firtuɗo, haray ko hoore makko o firtani; kala kadi hunnuɗo ko o ahodi kon e Allah, aray nde O okkata mo njoɓdi mawnundi

Aray nde tultuɓe jeyaaɓe e yimɓe ladde ɓen wi`ane: "Jawle amen ɗen e ɓeynguureeji amen ɗin sokolinii men. Insinano men". Hiɓe wowlira ɗemɗe maɓɓe, ko alaa e ɓerɗe maɓɓe. Maaku: "Ko hommbo waawani on ka Allah, si O faandanike on lorra maa hara O faandani on nafa? Wurin Allah siforiino wonnde Humpitiiɗo ko gollaynoɗon kon

Wurin on sukkuno Nulaaɗo on e gomɗimɓe ɓen artataano fes ka ɓeynguureeji maɓɓe. Ɗum cuɗinaa e ɓerɗe mon; sikkuɗon sikke bonɗe, laatiɗon yimɓe halkaaɓe

Kala dee mo gomɗinaali Allah e Nulaaɗo Makko on, haray Meɗen heblani yedduɓe ɓen (Yiite) dulbaynge

Ko Allah heeranii laamagol kammuuli ɗin e leydi ndin. Himo haforana mo O muuyani, O lepta mo O muuyani. Allah siforii wonnde Haforoowo, Hinnotooɗo

Aray nde luttuɓe ɓen wi`a, tuma fokkitanoyton henndagol konu-hoyri ndin: "Accee men jokka on". Hiɓe faalaa waɗtitugol daalol Allah ngol. Maaku: "On jokkataa men fes. Ko wano mon nii Allah daalirnoo oya tuma". Ma ɓe wi’u: "On añanay men tun woni". Tigi on, ɓe faamataano si wanaa seeɗa

Maakan tultuɓe ɓen e yimɓe ladde ɓen: "Arma nde noddeteɗon e yimɓe joomiraaɓe doole tiiɗuɓe. Hoɓon ɓe maaɗum ɓe silma. Si on ɗoftike, Allah okkay on mbarjaari moƴƴundi; si on huccitirii no huccitirnoɗon oya tuma, O leptira lepte muusuɗe

Bakkaatu fawaaki e hoore ɓunɗo on, wanaa e laƴoowo on wanaa kadi e nawnuɗon bakkaatu fawii. Kala ɗoftiiɗo Allah e Nulaaɗo Makko on, O naadoyay mo Aljannaaji ɗi canɗi ilata senngo ley mun. Kala kadi ɗuurniiɗo, O leptiray mo lepte muusuɗe

Gomɗii Allah welano gomɗimɓe ɓen, tuma ɓe ahondiraynoo e maaɗa ka ley lekki kin. O anndi ko woni kon ka ɓerɗe maɓɓe, O jippini deeƴere nden e maɓɓe, O warjoriiɓe uddital ɓadiingal

e konu-heyri ɗuuɗundi ndi ɓe henndotoo. Allah siforii wonnde Fooluɗo, Ñeeñuɗo

Allah fodii on konu-heyri ɗuuɗundi ndi henndotoɗon, O yaccinani on ndii ɗoo, O suri juuɗe yimɓe ɓen e mo’on, fii yo wonu maande wonannde gomɗimɓe ɓen, O fewnira on laawol focciingol

E wonndi goo ndi on haɗtanaali taho, Allah kan no huɓindii ndi. Allah siforii wonnde haɗtanɗo kala huunde

Hay si yedduɓe ɓen haɓiino on, ɓe huccintinayno ɓabbe maɓɓe ɗen, refti ɓe heɓataano giɗo wanaa ballao

Ɗum ko sunna Alla feƴƴunooɗo ko adii. A heɓantaa laawol Alla ngol, mbattiigu

Ko Kanko woni suranɗo on juuɗe maɓɓe ɗen e mo’on, e suruɗo juuɗe mon ɗen e maɓɓe, ka aynde Makka, ɓaawo O foolnude on e maɓɓe. Allah siforii wonnde Reenuɗo ko golloton kon

Ko ɓen woni ko yeddi, ɓe faddii on e Juurlirde Hormorde nden, [ɓe haɗi] neldaari ndin nde ndi yottotoo nokku mayri. Si wanaano sabu worɓe gomɗimɓe e rewɓe gomɗimɓe ɓe on anndataano haa haɓon ɓe, bakkaatu heɓa on e fee maɓɓe, ko aldaa e anndugol... fii yo Allah naadu e yurmeende Makko nden, on mo O muuyani. Si ɓe senndondir-no [e gomɗimɓe ɓen], ko pellet, Men leptirayno yedduɓe ɓen e maɓɓe, lepte muusuɗe

Tuma nde ɓeya yedduɓe waɗunoo ka ɓerɗe maɓɓe jinngo, jinngo majjiyanke...Allah jippini deeƴere Makko nden e dow Nulaaɗo Makko on e gomɗimɓe ɓen, O fawi ɓe konngol gomɗal, ɓe woni ɓurɓe jojjude e hanndude e maggol. Allah siforii Anndugol kala huunde

Gomɗii Allah goonginiranii Nulaaɗo Makko on, koyɗol ngol e hoore goonga : Ko maa naaton e juulirde Hormorde nden si Allah muuyii, hara ko on hooliiɓe, femmbuɓe ko*e mon maa ɗuytuɓe (cukuli), on hulataa. Himo anndi ko on anndaa. O waɗi ko wanaa ngol (naatugol Makko) ɗon, uddital ɓadiingal

Ko Kanko woni Nulirɗo Nulaaɗo Makko on peewal e diina goonga, fii yo o fawaka ka e hoore kala diina. Allah yonii seedee

Muhammdu ko Nulaaɗo Allah. Wonnduɓe e makko ɓen ko ñaaɗuɓe e yedduɓe ɓen, yurmondirɓe hakkunde maɓɓe. A yi`ay ɓe hiɓe ruƴƴa, hiɓe sujja, hiɓe ɗaɓɓira Allah ɓural e welayee. Maandeeji maɓɓe ɗin no ka geece maɓɓe batte sujjugol ngol. Ko ɗum woni ko ɓe siforaa ka Tawreeta. No ɓe siforaa ka Linjiila kan, ko wano remuru yaltingu puɗi mayru, ngu ɓanngini ɗi, ɗi tekki, ɗi fotondiri e binndeeje majji, hara ɗum no haawna remooɓe, fii no [Allah] tikkinira ɓe yedduɓe ɓen. Allah fodii e maɓɓe ɓen gomɗimɓe ɓe golli moƴƴuɗi ɗin, haforanal e njoɓdi mawnundi