Suuratu Ghafir pdf

40:1 Haa, Miim

40:2 Jippagol Deftere nden, ko immorde ka Allah, Fooluɗo, Annduɗo On

40:3 Haforoowo junubaaji ɗin, Jaɓoowo tuubuubuyee, Saɗtuɗo lepte, Jom yaajeende. Reweteeɗo alaa, si wanaa kanko. Ko ka Makko woni ruttorde nden

40:4 Alaa ko wennjata e Aayeeje Allah ɗen, si wanaa yedduɓe ɓen. Wata a hoditor ko ɓe dillirta kon ka leydi

40:5 Ado maɓɓe, yimɓe Nuuhu ɓen e feddeeji ɗin ɓaawo maɓɓe, fennuno (Nulaaɓe mun ɓen), mofte kala himmiri nanngugol Nulaaɗo mun on. Ɓe wennjiri meere, fii no bonnitira (goonga) kan. Kono Mi nanngi ɓe. Taskii no nanngal Am ngal waɗtinirnoo

40:6 Ko wano nii Konngol Joomi maa ngol, jojjiri e yedduɓe ɓen : "Wonnde pellet, ko ɓe yimɓe Yiite

40:7 Ɓen (Malaa’ikaaɓe) roondiiɓe Arsiki kin, e wonɓe bannge makki ɓen, hiɓe subbunhinora yettugol Joomi maɓɓe, ɓe gomɗina Mo, ɓe insinorana gomɗimɓe ɓen (wiide): "Joomi amen, A yaññirii kala huunde, yurmeende e ganndal. Yawtan ɓen tuubuɓe, ɓe jokki laawol Maa ngol, daɗndaa ɓe kadi lepte Dulɓoowe ngen

40:8 Joomi amen, naaduɓe ka Aljannaaji ñiiɓal, ɗin ɗi foduɗaa ɓe, e kala moƴƴuɗo e baabiraaɓe maɓɓe, e genndiraaɓe maɓɓe, e geyngol maɓɓe. Pellet, ko An woni Fooluɗo, Ñeeñuɗo On

40:9 Daɗndaaɓe [kuuɗe] e bonɗe ɗen. Kala mo daɗnduɗaa [kuuɗe] mun bonɗe ɗen nden Ñalnde, haray pellet, A yurmiii mo". Ko ɗum woni maloore mawnunde nden

40:10 Yedduɓe ɓen noddiroyte: "Ko tikkere Allah nden ɓuri mawnude, e dii ko tikkanɗon ko`e mon kon, tuma noddetenoɗon e gomɗinal, yeddon

40:11 Ɓe wi`a: "Joomi amen, A warii men laawi ɗiɗi, wuurnituɗaa men laawi ɗiɗi: men qirrike junuubi amen ɗin. Taw si laawol yaltirngol hino woodi

40:12 Ɗum mooɗon, ko tawde si Allah tun noddanooma, on yeddon; si O kafidaama, gomɗinon. Ñaawoore nden ko Allah heeranii, Toowuɗo, Mawɗo On

40:13 Ko Kanko woni holloowo on maandeeji Makko ɗin, O jippinirana on toɓo ka kammu. Kono taskotaako, si wanaa ruttotooɗo [e Allah]

40:14 Rewiree Allah, laɓɓinirangol Mo diina kan, hay si heeferɓe ɓen yiɗaa

40:15 Ko o toowuɗo darjaaji, Jeyɗo Arsi kin. Himo jippiniria wahayu on, yamiroore Makko, e on mo O muuyani e jeyaaɓe Makko ɓen, no o jertinira ñalnde Kawral ngal, @Corrected

40:16 ñalnde ɓe feeñoyta. Huunde suuɗotaako Allah, e fee maɓɓe. Ko hommbo laamu woodani hannde? Ko Allah Bajjo, Fooluɗo On

40:17 Hannde, wonkii kala yoɓete ko faggitii. Tooñe woo alaa hannde, pellet, Allah ko yaawuɗo ñaawoore

40:18 Jertnirtɓe, ñalaande dillere nden, tuma ɓerɗe ɗen ƴawtirta ka konondi, hara hiɓe (heewuɓe) ngoƴo. Giɗo woo alanaa tooñooɓe ɓen, wanaa tefoowo jaɓanteeɗo

40:19 Himo anndi janfa gite, e ko ɓerɗe ɗen suuɗi

40:20 Allah ko goonga ñaawirta. Ɗi ɓe rewata ɗin non, gaanin Makko, hay huunde ɗi ñaawirtaa. Pellet, ko kanko woni Nanoowo, Yi’oowo On

40:21 Hara ɓee yiilaaki ka leydi, ɓe ndaara no battane ado mabbe ɓen wa’unoo? Ɓen le no ɓurunoo tiiɗude doole e batteeji, ka leydi. Allah nanngitiri ɓe junuubi maɓɓe ɗin, ɓe heɓaano daɗndoowo ɓe e (lepte) Allah ɗen

40:22 Ko waɗi ɗum, ko tawde Nulaaɓe maɓɓe ɓen addayno ɓe ɓanngannduyeeji, ɓe yedda. Allah halki ɓe. Pellet, ko O Doolnuɗo, Saɗtuɗo lepte

40:23 Gomɗii Men nulirii Muusaa Aayeeje Amen ɗen, e hujja ɓannguɗo

40:24 haa e Fir`awna, e Haamaana, e Qaaruuna. Kono ɓe wi`i: "Ko mbileejo, ɗuuɗuɗo fenaande

40:25 Nde o addannoo ɓe goonga kan, immorde e Amen, ɓe wi`iti: "Waree ɓiɗɓe worɓe gomɗimdimɓe ɓen e makko, accon rewɓe maɓɓe ɓen". Pewje heeferɓe ɓen wonaali, si wanaa e majjere

40:26 Fir`awna wi`i: "Accee mi wara Muusaa. Yo o noddu Joomi makko ! Miɗo huli nde o waylata diina mon kan, maa o feññina bonnere ka leydi

40:27 Muusa maaki: "Mi moolorii Jeyɗo lam On, jeyi on, e bone kala mawnintiniiɗo, mo gomɗinaa ñalaande hasboore

40:28 Gorko gomɗinoɗo goo, jeyaaɗo e yimɓe Fir`awna ɓen - suuɗunooɗo gomɗinal mun - :"E on waray gorko, fii o wi`i: "Joomi am ko Allah?" Hara le o addanii on ɓanngannduyeeji, immorde ka Joomi mon. Si tawii o fenu, haray fenaande makko ko kanko fawii; si tawii kadi o goongu, haray yoga e kon ko kammbirani on, heɓay on". Pellet, Allah fewnataa on fantinoowo fennoowo

40:29 Ko onon yo yimɓe am, laamu no woodani on hanndi, ko on fooluɓe ka leydi. Kono ko hommbo wallata en, e lepte Allah ɗen, si ɗe arii e men?" Fir`awna wi`i: "Mi hollataa on, si wanaa ko mi yi`i kon. Mi tindintaa on kadi, si wanaa e laawol peewal ngol

40:30 Gomɗinɗo on wi`iti: "Ko onon yo yimɓe am, min on miɗo hulani on, sugu ñalaande heɓunoonde feddeeji ɗin

40:31 Sugu mbowka yimɓe Nuuhu ɓen, e Aadi’en, e Samuuda’en, e arnooɓe ɓaawo maɓɓe ɓen". Allah faandanaaki tooñude jeyaaɓe ɓen

40:32 Ko onon yo yimɓe am, min miɗo hulani on, Ñalaande noddindirton

40:33 Ñalnde huccitiroyton, hoɗon ndoga, hara daɗndoowo on alanaa on e Allah". Kala mo Allah majjini, haray fewnoowo alanaa mo

40:34 Gomɗii Yuusufu ardanii on e ɓannganduyeeji, ko adii, on seeraali e sikkitagol kon ko o addani on. Haa nde o faatinoo, wi’uɗon: "Allah nultataa Nulaaɗo goo, ɓaawo makko". Ko non majjinirta kala wonoɗo fantinoowo sikkitiiɗo

40:35 Ɓen wenjirooɓe e Aayeeje Allah ɗen ko aldaa e hujja arɗo ɓe, [kuuɗe maɓɓe ɗen] mawnii tikkere ka Allah, e ka gomɗimɓe ɓen. Ko wano non Allah notirta e ɓernde kala mawnintiniiɗo dundarankeejo

40:36 Fir`awna wi`i: " Ko an yo Haamaana, mahanam sooro, no gasa mi yottoo ɗate ɗen

40:37 ɗate kammuuli ɗin, mi ƴeewoya Reweteeɗo Muusaa On; sabu mi sikki mo fenoowo". Ko wano non Fir`awna cuɗiranaa, golle makko bonɗe ɗen; o sakkaa e laawol (peewal) ngol. Feere Fir`awna nden wonaano, si wanaa e hayrere

40:38 [Gorko] gomɗinɗo on wi`i: "Ko onon yo yimɓe am, jokkee lam, mi fewna on e laawol peewal ngol

40:39 Ko onon yo yimɓe am, anndee ɗam nguurndam aduna, ko dakamme-hun tun, ko laakara on woni, galle ñiiɓal ɗen

40:40 Mo gollii bone, o yoɓitetaake, si wanaa yeru makko; mo gollii kadi moƴƴere, foti ko gorko maa debbo, hara ko o gomɗinɗo, ɓen ɗon naatay Aljanna, ɓe arsikoyee ton, ko aldaa e limoore

40:41 Ko onon yo yimɓe am, ko waɗi si miɗo nodda on e daɗal, hiɗon nodda lam e Yiite

40:42 Hiɗon nodda lam e yeddugol Allah, sirkana Mo e ko mi alanaa ɗum ganndal, hara non, min miɗo nodda on e Fooluɗo, Suuroowo bakkaatu On

40:43 Sikke alaa, wonnde ko noddoton lam e mun kon, dewal alanaa ɗum aduna, wanaa laakara. E wonnde ruttorde men nden, ko ka Allah, e wonnde ko fantimɓe ɓen, woni Yiite ngen

40:44 Aray nde anndoton, ko mi yewtata on kon; mi fawa fiyaaku am on e Allah. Pellet, Allah ko Reenuɗo jeyaaɓe ɓen

40:45 Allah daɗndi mo, boneeji ɗi ɓe fewjunoo, O fiiltii yimɓe Fir`awna ɓen, ko ɓuri bonnde e lepte

40:46 Yiite ngen, ɓe weeɓitoyte e magge, bimmbi e kiikiiɗe. Ñalnde Darngal daroytoo (wi’oyte): "Naatee yimɓe Fir`awna ɓen, ka ɓuri saɗtude e lepte

40:47 Janto tuma ɓe yeddondiroyta ka Yiite, lo’unooɓe ɓen wi`ana townitinooɓe ɓen: "Menen, ko onon men jokkuunoo, taw si on duñanay men geɓal e Yiite ngen

40:48 Townitinooɓe ɓen wi`a: "En fow, hiɗen e magge. Gomɗii Allah ñaawii hakkunde jeyaaɓe ɓen

40:49 Wonɓe ka Yiite ɓen kadi wi`ana ayninaaɓe Jahannama ɓen: "Toranee men Joomi mon, O hoynana men, ñalaande (wootere) e lepte ɗen

40:50 Ɓe wi`a: "Nulaaɓe mon ɓen ardanaano on e ɓanngannduyeeji?" Ɓe wi`a: "Oo’owoye !" [Ayninaaɓe] ɓen wi`a: "Awa toree, onon tigiri !" Kono toraare heeferɓe ɓen wonaali, si wanaa e majjere

40:51 Pellet, Men wallay Nulaaɓe Amen ɓen, e gomɗimɓe ɓen, ka nguurndam aduna, e Ñalnde seedeeɓe ɓen daroytoo

40:52 ñalnde de ngantinagol nafoytaa tooñunooɓe ɓen, hara kuddi hino woodani ɓe, e galle bonɗe

40:53 Gomɗii Men okkii Muusaa ganndal [Tawreeta] ngal, Men ronini ɓiɗɓe Israa’iila ɓen, Deftere nden

40:54 ko nde peewal e waaju, wonannde joomiraaɓe haqqille ɓen

40:55 Muñño tun, pellet, fodoore Allah nden ko goonga, insinano junuubi maa ɗin, subbunhinanoɗaa Joomi maa, kiikiiɗe e bimmbi

40:56 Pellet, wennjirooɓe e Aayeeje Allah ɗen, ko aldaa e dalil arɗo e maɓɓe, alaa e ɓerɗe ɗen, si wanaa mawnintinagol. Ɓe yottotaako non, e ɗum. Moolor Allah, Ko Kanko woni Nanoowo, Yi’oowo On

40:57 Pellet, ko tagde kammuuli ɗin e leydi ndin, ɓuri mawnude e dii tageendi yimɓe ɓen. Kono ko ɓuri ɗuuɗude e yimɓe ɓen, ɓe anndaa

40:58 Bunɗo e yi’oowo fotataa, gomɗimɓe ɓen kadi golli moƴƴuɗi, fotataa e bonnuɗo. Fanɗii ko waajitorton

40:59 Pellet, Darngal, ko ko arata, sikke alaa e mu’un. Kono ko ɓuri ɗuuɗude e yimɓe ɓen, ɓe gomɗinaa

40:60 Joomi mon daali: "Toree Lam, Mi jaabinana on. Mawtinantooɓe rewugol Lam ɓen, ko pellet, ɓe naatoyay Jahannama, ko ɓe hoyɓe

40:61 Ko Allah waɗirani on jemma on, ka fowtoɗon e mun, e ñalorma on, yi`inoowo. Pellet, Allah ko Jom ɓural e yimɓe ɓen, kono ko ɓuri ɗuuɗude e yimɓe ɓen, ɓe yettataa (neema)

40:62 Ko On mooɗon Allah Joomi mon, woni Taguɗo kala huunde. Reweteeɗo alaa, si wanaa Kanko. Ko honno firlitortaɗon (e ɗum)

40:63 Ko non ɓeya yeddaynooɓe Aayeeje Allah ɗen, ferlisortenoo

40:64 Ko Allah woni waɗiranɗo on leydi ndin, ñiiɓirde, kammu ngun, kippoodi, O mbaadini on - O moƴƴini mbaadiiji mon -, O arsiki on e laaɓuɗi. Ko On mooɗon woni Allah Joomi mon; senaare woodanii Allah, Jeyɗo winndere nden

40:65 Ko Kanko woni wuurɗo On. Reweteeɗo alaa, si wanaa Kanko. Rewee Mo kisan; laɓɓinano Mo diina kan. Yettoore woodanii Allah, Jeyɗo winndere nden

40:66 Maaku: "Min mi haɗaama rewugol ɗin ɗi noddoton gaanin Allah, tuma nde ɓannganduyeeji ɗin ari e am, immorde e Joomi am, mi yamiraama kadi, nde mi jebbilantoo, Jeyɗo winndere nden

40:67 Ko Kanko woni taguɗo on e mbumbuldi, refti e toɓɓere (maniiyu), refti e heɗɗere, refti O yaltiniri on penuuɓe fii no yottoron cemmbe mon, e no laatoron nayeeɓe, - no e mo’on, ƴettiteteeɓe ado ɗum, - haa no yottoron lajal happaangal, belajo’o, on haqqilay

40:68 Ko Kanko woni wuurnoowo e waroowo. Si O haajii e fiyaaku, ko O wi`anay mo tun: "Laato", o laatoo

40:69 E a tinaali, ɓen yeddondirteeɓe e Aayeeje Allah ɗen, ko honno ɓe firlitoraa

40:70 Ɓen fennuɓe Deftere nden, e kon ko Men nuliri Nulaaɓe Amen ɓen; ɓe aray anndude

40:71 tuma kolombooje ɗen waɗoyaa e daaɗe maɓɓe, e jolokooje(callalle) ɗen, hara hiɓe daasiree

40:72 ka nder wulɗam; refti ɓe huɓɓoyee ka nder Yiite

40:73 Refti ɓe wi`anee: "Ko honto woni ɗin ɗi kafidaynoɗon

40:74 Ko aldah e Allah?" Ɓe wi`a: "Ɗi majjitike men. Wurin, men wonaano ko adii, e rewugol hay huunde". Ko hona nih Allah majjinirta heeferɓe ɓen

40:75 Ko waɗi on ɗum, ko ko weltoraynoɗon kon ka hoore leydi, ko aldaa e goonga, e ko wewliraynoɗon kon

40:76 Naatiree dame Jahannama ɗen, luttugol ton. Nge bonii jaaƴorde wonande mawnintiniiɓe ɓen

40:77 Muñño. Pellet, fodoore Allah nden, ko goonga. Ko si Men hollete yoga e ko Men fodi ɓe kon, maa hara Men ƴettite (ado mun) ko ka Amen ɓe ruttirtee

40:78 Gomɗii Men imminii Nulaaɓe ado maa. Hino e maɓɓe, ɓe Men sifani maa fii mun; hino maɓɓe, ɓe Men sifanaaki ma fii mun. Haananaa Nulaaɗo, addugol Aaya, si wanaa e duŋayee Allah. Si yamiroore Allah nden arii, goonga ñaawirte meerente’en sooya nden ñalnde

40:79 Ko Allah woni waɗiranɗo On neemoraaɗi ɗin ko waɗɗoron, ñaamon kadi e majji

40:80 nafooje kadi hino woodani on e majji, e no yottoron e majji, haaju hittuɗo e berde mon. Ko e hoore majji e hoore laaɗe ɗen, woni ko ronndeteɗon

40:81 Himo holla on maandeeji Makko ɗin. Ko honɗum e maandeeji Allah ɗin, woni ko yeddoton

40:82 E ɓee yiilaaki ka leydi, ɓe ndaara ko honno battane ɓeya ado maɓɓe wattinirnoo? Ɓen no ɓurunoo ɓe ɗuude e saɗtude doole e batteeji [waɗaaɗi] ka leydi. Kono kon ko ɓe faggotonoo, duncanaano ɓe

40:83 Nde Nulaaɓe maɓɓe ɓen addannooɓe ɓanngannduyeeji ɗin, ɓe wewliri ganndal ko woni ka maɓɓe kon. Ɓe huuɓitiraa kon ko ɓe jalkitaynoo

40:84 Nde ɓe yi’unoo lepte Amen ɗen, ɓe wi`i: "Men gomɗinii Allah tun, men yeddii kon ko men wonunoo e sirkannde

40:85 Kono gomɗinal maɓɓe wonaano ko nafata ɓe, fewndo ɓe yi’unoo lepte Amen ɗen; ɗum ko laawol Allah non, gomɗii ɗun yawtiino e jeyaaɓe Makko ɓen. Yedduɓe ɓen sooyi ɗon nden ñalnde