სურა ღაფირი pdf

ჰაა. მიიმ

წიგნის ზეგარდმოვლენა ალლაჰისგანაა, ძლევამოსილის, ყოვლისმცოდნის.

ცოდვის მიმტევებელი, მონანიების მიმღები, სასჯელში მკაცრი, სიუხვის მფლობელი. არ არსებობს ღვთაება, გარდა მისი. მასთანაა დაბრუნება.

არავინ კამათობს ალლაჰის აიათებზე, გარდა ურწმუნოებისა. დაე, არ შეგაცდინოს (ო, შუამავალო) მათმა მოძრაობამ ამქვეყნად (მათი მშვიდი გადაადგილება და მშვიდი ცხოვრება).

მათზე ადრე უარყვეს ნუჰის ხალხმა და მათ შემდგომ მოსულმა თაობებმა. და ყოველი თემი განიზრახავდა თავისი შუამავლის წინააღმდეგ, რათა შეეპყრათ იგი, და ცრუ არგუმენტებით დავობდნენ, რათა ამით ჭეშმარიტება გაექარწყლებინათ. მაშინ მე შევიპყარი ისინი. და როგორი (სასტიკი) იყო ჩემი სასჯელი.

და ასე გამართლდა შენი უფლის სიტყვა ურწმუნოთა მიმართ, რომ ისინი ცეცხლის ბინადარნი არიან.

(ანგელოზები), რომლებიც ატარებენ ტახტს (მოწყალე ალლაჰისას) და (ანგელოზები), რომლებიც მის გარშემო არიან განადიდებენ, აქებენ მას, და (სრულად) სწამთ მისი, და ითხოვენ (ალლაჰისგან) პატიებას მორწმუნეებისთვის: «ჩვენო უფალო, შენ მოიცავ ყოველივეს შენი წყალობითა და ცოდნით! აპატიე მათ, ვინც მოინანია და გაჰყვა შენს გზას [ისლამს], და დაიცავი ისინი ჯოჯოხეთის სასჯელისგან!»

«უფალო ჩვენო, შეიყვანე ისინი ედემის ბაღებში, რომელიც აღუთქვი მათ, და (ასევე შეიყვანე) მათ მამათაგან, მეუღლეთაგან და შთამომავალთაგან მართალთ. ჭეშმარიტად, შენ ხარ ძლევამოსილი, ბრძენი».

«და დაიცავი ისინი ბოროტებისგან (თავიანთი ცუდი ქმედების შედეგებისგან). და ვისაც დაიცავ იმ დღეს ბოროტებისგან, შენ უკვე შეიწყალე იგი. და ეს არის დიადი გამარჯვება».

ჭეშმარიტად, ურწმუნოები (როდესაც ჯოჯოხეთს საკუთარი თვალით იხილავენ და შეიძულებენ თავიანთ თავს) ჯოჯოხეთის ანგელოზები დაუძახებენ მათ: «ჭეშმარიტად, ალლაჰის სიძულვილი (იმ დროს), როდესაც (მიწიერ ცხოვრებაში) რწმენისკენ მოგიწოდებდნენ და თქვენ ურწმუნონი დარჩით, (იმაზე) დიდი იყო, ვიდრე თქვენი სიძულვილი საკუთარი თავის მიმართ (ახლა)!»

იტყვიან: «ჩვენო უფალო! შენ ორჯერ მოგვკალი და ორჯერ გაგვაცოცხლე. ჩვენ ვაღიარეთ ჩვენი ცოდვები. ნუთუ არ არსებობს გამოსავალი (ჯოჯოხეთიდან), (რომ დავბრუნდეთ მიწიერ სიცოცხლეში, რათა ვიცხოვროთ შენი მორჩილებით)?»

ეს (სასჯელი) თქვენთვისაა (ო, ურწმუნოებო), რადგან როდესაც მოწოდება (ლოცვით) მხოლოდ ალლაჰისადმი იყო, თქვენ არ ირწმუნეთ [უარყავით მონოთეიზმი], ხოლო როდესაც მას თანაზიარები გაუჩინეს (თუ ალლაჰთან ერთად სხვასაც აღიარებენ ღვთაებად და თაყვანს სცემენ) თქვენ ირწმუნებთ (ეს ალლაჰისთვის მიუღებელია). გადაწყვეტილება (მხოლოდ) ალლაჰთან, უზენაესთან, დიდებულთან არის.

იგია [ალლაჰი], ვინც (თავის ყველა ქმნილებაში) თავის სასწაულებს გიჩვენებთ და (მხოლოდ ის) გიგზავნით სარჩოს ციდან, მაგრამ მხოლოდ ისინი, ვინც (ალლაჰის ნიშნებზე დაფიქრებას მიჰყვება), ყურადღებას აქცევენ (გაფრთხილებებს)!

მაშ, მოუხმეთ ალლაჰს, მისდამი რწმენაში გულწრფელებმა (და ნუ მოუხმობთ სხვა ცრუ ღმერთებს), თუნდაც სძულდეთ ურწმუნოებს.

(ალლაჰს) (აქვს) ამაღლებული საფეხურები (იგი ყოვლად ამაღლებული და უზენაესია) (და ის) არის 'არშის (ტახტის) მფლობელი. (და მისი წყალობა თავისი მსახურებისადმი ისეთია, რომ ის) გზავნის სულს [გამოცხადებას] თავისი გადაწყვეტილებით, ვისაც მოისურვებს თავის მსახურთაგან, რათა გააფრთხილოს (ხალხი) შეხვედრის დღის შესახებ.

იმ დღეს [განკითხვის დღეს], როდესაც ისინი (სამარხებიდან) გამოვლენ (და თავიანთი უფლის წინაშე წარდგებიან), მათ შესახებ არაფერი დაემალება ალლაჰს. (და ალლაჰი იტყვის): «ვის ეკუთვნის დღეს მეუფება?» (და შემდეგ იტყვის): «ერთადერთ ალლაჰს, ყოვლისმძლეველს!»

დღეს ყოველი სული მიიღებს (სრულ და სამართლიან) საზღაურს იმისთვის, რაც მოიხვეჭა [მიწიერ ცხოვრებაში]. და დღეს უსამართლობა არ იქნება. ჭეშმარიტად, ალლაჰი სწრაფია ანგარიშსწორებაში!

და შეახსენე მათ [ო, შუამავალო] მომავალი დღე, როდესაც გულები (მისი სასჯელის შიშით) მიუახლოვდებიან მათ ყელებს, (და) ისინი შეიკავებენ (თავიანთ რისხვას, შიშსა და სევდას) საკუთარ თავში. უსამართლოებს [მრავალღმერთიანებს] არც ახლობელი ჰყავთ, რომელიც დაეხმარებათ, და არც შუამავალი, რომლის სიტყვასაც დაემორჩილებოდნენ.

მან იცის თვალთა ღალატი [უწყის, როდის შეჰყურებს ადამიანი აკრძალულს] და რასაც მალავენ გულები.

ალლაჰი კი განსჯის (ადამიანებს შორის) ჭეშმარიტებით [სამართლიანად], ხოლო ისინი, ვისკენაც მიმართავენ (ევედრებიან), არაფერს წყვეტენ. ნამდვილად, ალლაჰი ყოვლისმსმენი, ყოვლისმხედველია!

განა არ იმოგზაურეს მათ [მექქის ურწმუნოებმა და სხვებმა] მიწაზე [განა არ იყვნენ ისინი იემენში და შამში] და განა არ დაინახეს, რა ეწიათ მათ, ვინც მათ უწინ იყვნენ ['ადს, სამუდს და სხვებს]? ნუთუ ისინი [ადები და სამუდელები] უფრო ძლიერები არ იყვნენ მათზე [მექქელებზე] (ფიზიკური) ძალითა და მიწაზე დატოვებული კვალებით [თავიანთი შენობებით]? და ალლაჰმა მოიცვა (დასაჯა) ისინი მათი ცოდვების გამო. და მათ არ ჰყავდათ მფარველი (რომელიც იხსნიდა მათ) ალლაჰისგან.

ეს იმიტომ, რომ მათთან მათი შუამავლები ცხადი მტკიცებულებებით მოდიოდნენ, მაგრამ მათ უარყვეს, და შეიპყრო ისინი ალლაჰმა. უეჭველად, იგი ძლიერია, სასტიკია სასჯელით.

და ასე გამოვგზავნეთ მუსა ჩვენი ნიშნებით [სასწაულებით] და ცხადი მტკიცებულებით.

ფარაონს (ეგვიპტის მმართველს), და ჰამანს (ფარაონის მინდობილს), და ყარუნს (რომელიც უზარმაზარ სიმდიდრეს ფლობდა). (მაგრამ მათ, თავიანთი ამპარტავნებით, უარყვეს ალლაჰის შუამავლის, მუსას მოწოდება) და თქვეს: «(ის) (მუსა) ჯადოქარი (და) მატყუარაა!»

როდესაც ის [მუსა] მათთან ჩვენგან ჭეშმარიტებით მოვიდა, მათ (უარყვეს ეს სასწაულები და) თქვეს: «მოკალით მათი მორწმუნეთა ძენი და დატოვეთ მათი ქალები ცოცხლად (რათა მონებად იქცნენ და გვემსახურონ)!» მაგრამ ურწმუნოთა ზრახვები (მხოლოდ) ცდომილებაშია [მათივე მახე მათვე უბრუნდებათ]!

და თქვა ფარაონმა: «დამტოვეთ, მოვკლავ მუსას და დაე, მოუხმოს თავის ღმერთს! ჭეშმარიტად, მეშინია, რომ ის [მოსე] შეცვლის თქვენს რელიგიას ან არეულობას მოაწყობს ქვეყანაში (ეგვიპტეში)!»

და თქვა მუსამ: «ჭეშმარიტად, მე მივეკედლები ჩემს უფალს და თქვენს უფალს ყოველი ამპარტავნისგან, რომელსაც არ სწამს განკითხვის დღის».

ფარაონის ოჯახიდან ერთმა მორწმუნემ, რომელიც თავის რწმენას (ხალხისგან) მალავდა, თქვა: «ნუთუ კაცის მკვლელობას აპირებთ იმის გამო, რომ ამბობს: 'ჩემი უფალი ალლაჰია'?და მან თქვენთან მოიტანა ნათელი ნიშნები [უდავო არგუმენტები] თქვენი უფლისგან? თუ ის [მუსა] მატყუარაა, მაშინ მისი სიცრუე მის წინააღმდეგ იქნება; ხოლო თუ ის მართალია, მაშინ თქვენ მოგეწევათ ზოგი ის (უბედურება), რასაც გპირდებათ. ნამდვილად, ალლაჰი არ უძღვება გზას გადამეტებულთ (და) რომლებიც (ალლაჰზე) ტყუილებს იგონებენ!»

«ო, ჩემო ხალხო! დღეს ხელმწიფობა თქვენ გიკავიათ და მიწაზე (ეგვიპტის მიწაზე) სხვებზე უპირატესობა გეკუთვნით. და ვინ დაგვიცავს ალლაჰის რისხვისგან [სასჯელისგან], თუ ის ჩვენ გვეწვევა?» ფარაონმა თქვა: «მე მხოლოდ იმას გიჩვენებთ [გირჩევთ], რასაც თავად ვხედავ; და მხოლოდ სიმართლის გზაზე მიგითითებთ [გიხმობთ]».

და რომელმაც ირწმუნა (მიუბრუნდა ფარაონსა და მის დიდებულებს), თქვა: «ო, ჩემო ხალხო! ნამდვილად, მეშინია, რომ თქვენ (თუ მუსას მოკლავთ) ისე დაისჯებით, როგორც ისინი, ვინც (თავიანთი წინასწარმეტყველების წინააღმდეგ) ამბოხდნენ».

ისევე, როგორც მოუვიდათ ნუჰის (ნოეს) ხალხს, 'ადს, სამუდს და იმათ, ვინც მათ შემდგომ მოვიდა. და ალლაჰი არ არის ის, ვისაც თავისი მსახურებისთვის უსამართლობა სურს [ის არ დასჯის მათ, თუ ისინი ცოდვებს არ ჩაიდენენ].

ო, ჩემო ხალხო! ნამდვილად, მეშინია თქვენთვის (სასჯელის) ურთიერთშეძახილების დღისა [განკითხვის დღისა, როცა დახმარებისთვის ერთმანეთს დაუძახებენ].

იმ დღეს, როცა ზურგშექცეულნი გაიქცევით, არ გეყოლებათ ალლაჰისგან დამცველი. და ვისაც ალლაჰი გზას ააცდენს, მას არ ეყოლება გზის მაჩვენებელი.

უეჭველად, თქვენთან იუსუფი მოვიდა უწინ ცხადი მტკიცებულებებით, მაგრამ თქვენ ეჭვქვეშ აყენებდით იმას, რაც მან მოგიტანათ, სანამ არ გარდაიცვალა. და მაშინ კი თქვით: «ალლაჰი მის შემდეგ მოციქულს არ გამოგზავნის!» ასე აცდენს გზას ალლაჰი მათ, ვინც ზღვარგადასული (და) ეჭვებშია!

რომელნიც დაობენ ალლაჰის აიათებზე ყოველგვარი მტკიცებულების გარეშე, რომელიც მათ მოევლინათ. დიდად საძულველია (ეს საქციელი) ალლაჰის და მორწმუნეთა წინაშე. ასე ადებს ალლაჰი ბეჭედს ყოველი ამპარტავანი ტირანის გულზე!

და უთხრა ფარაონმა (მუსას დაცინვით): «ჰეი, ჰამან, ააშენე ჩემთვის (მაღალი) კოშკი, იქნებ მივაღწიო გზებს –

ზეცის გზებს, რათა მუსას ღმერთს შევხედო. რადგან ჭეშმარიტად, მე ვფიქრობ, რომ ის [მუსა] მატყუარაა». და ასე (სატანამ) ფარაონის ბოროტი საქმეები გაალამაზა და იგი (სწორი) გზიდან გადაუხვია. და ფარაონის მთელი ხრიკები (მხოლოდ) დაღუპვისთვის იყო.

და თქვა იმ მორწმუნემ: «ჩემო ხალხო! გამომყევით, მე გაგიძღვებით სწორ გზაზე.

ო, ჩემო ერო! ეს მიწიერი ცხოვრება მხოლოდ (დროებითი) სარგებელია, ხოლო ჭეშმარიტად, მარადიული სიცოცხლე მუდმივობის სამყოფელია.

ვინც ამქვეყნად ბოროტს იქმს [არ დაემორჩილება ალლაჰს], ის საიქიოში მხოლოდ მისი ცოდვის შესაფერის სასჯელს მიიღებს. ხოლო ვინც სიკეთეს ჩაიდენს, (მიუხედავად იმისა), არის თუ არა ის კაცი ან ქალი, და (ამავდროულად) (არის) მორწმუნე, ასეთი ადამიანები შევლენ სამოთხეში და იქ დაჯილდოვდებიან უანგარიშოდ [შეუზღუდავად].

ო, ჩემო ხალხო! რატომ არის რომ მე მოგიწოდებთ თქვენ ხსნისკენ, მაშინ როცა თქვენ მომიწოდებთ ცეცხლისკენ?!

თქვენ მომიწოდებთ, რომ უარვყო ალლაჰი და თანაზიარად მივუჩინო მას ის, რის შესახებაც არაფერი ცოდნა არ გამაჩნია, მე კი მოგიხმობთ ყოვლადძლიერისკენ, ყოვლადმიმტევებლისკენ.

უეჭველად, ის, რისკენაც მე მომიხმობთ, არ აქვს მას მოწოდება (სარგებელი) არც ამქვეყნად და არც შემდგომ ცხოვრებაში. და უეჭველად, ჩვენი დაბრუნება ალლაჰთანაა, და უეჭველად, გადამეტებულები (ურწმუნოები და მრავალღმერთიანები) — ისინი ცეცხლის მაცხოვრებლები არიან!

თქვენ კიდევ გაიხსენებთ იმას, რასაც ახლა გეუბნებით (როცა სასჯელს იხილავთ). და მე ჩემს საქმეს ალლაჰს ვანდობ. ჭეშმარიტად, ალლაჰი ხედავს თავის მონებს!»

და იხსნა იგი (მორწმუნე კაცი) ალლაჰმა მათი მზაკვრობის ბოროტებისგან და ეწია ფარაონის ხალხს სასტიკი სასჯელი.

ცეცხლი, რომლის წინაშეც ისინი (ფარაონი და მისი მომხრეები) დილა-საღამოს არიან წარდგენილნი(განსჯის დღემდე). ხოლო იმ დღეს, როცა დადგება საათი (აღდგომის დღე), (იტყვიან): «შეიყვანეთ ფარაონის ხალხი ყველაზე მძიმე სასჯელში!»

და აჰა, კამათობენ ისინი ცეცხლში. და ეტყვიან უძლურნი (მიმდევრები) მათ, რომელნიც ამპარტავნობდნენ (მათ ლიდერებს): «ჭეშმარიტად, ჩვენ თქვენი მიმდევრები ვიყავით, ხოდა, შეგიძლიათ თუ არა, რომ ცეცხლის ნაწილი მაინც აგვარიდოთ?»

და თქვეს ქედმაღლებმა (ლიდერებმა): «ყველანი ერთად ვართ მასში (ჯოჯოხეთში)! ჭეშმარიტად, ალლაჰმა უკვე გამოიტანა განაჩენი მონებს შორის!»

და უთხრეს მათ, რომლებიც ცეცხლში არიან, ჯოჯოხეთის მცველებს (ანგელოზებს): «მოუხმეთ თქვენს უფალს, რომ შეგვიმსუბუქოს ჩვენთვის სასჯელი თუნდაც ერთი დღით!»

თქვეს მათ (ჯოჯოხეთის მცველმა ანგელოზებმა): «განა არ მოვიდნენ თქვენთან თქვენი მოციქულები ნათელი მტკიცებულებებით?» თქვეს: «დიახ, მოვიდნენ». თქვეს (მცველებმა): «მაშინ თქვენ თვითონ უხმეთ (უფალს)!» მაგრამ ურწმუნოთა მოწოდება მხოლოდ შეცდომაშია.

ჭეშმარიტად, ჩვენ აუცილებლად დავეხმარებით ჩვენს მოციქულებსა და მათ, ვინც ირწმუნა, ამქვეყნიურ ცხოვრებაში და იმ დღეს [განკითხვის დღეს], როცა წარდგებიან მოწმენი [როცა ანგელოზები, წინასწარმეტყველები და მორწმუნენი დაამოწმებენ იმ ხალხის წინააღმდეგ, რომლებმაც უარყვეს ალლაჰის მოციქულები].

იმ დღეს, როცა უშედეგო იქნება უსამართლოებისთვის [ურწმუნოებისთვის] მათი ბოდიში. მათ ელით წყევა-კრულვა [ისინი მოკლებულნი იქნებიან ალლაჰის წყალობას], და მათთვის (გამზადებულია) საშინელი სამყოფელი [ჯოჯოხეთი]!

და (ვფიცავ, რომ) მივეცით მუსას ხელმძღვანელობა [თორა და სასწაულები] და დავუტოვეთ ისრაელის შთამომავლობას მემკვიდრეობად წერილი [თორა].

როგორც ხელმძღვანელობა (სიმართლისაკენ) და შეხსენება გონების მქონეთათვის.

მაშ, გამოიჩინე (მოციქულო) მოთმინება, რადგან ალლაჰის აღთქმა ჭეშმარიტია. ითხოვე შენდობა შენი ცოდვისთვის და ადიდე შენი უფალი ქებით საღამოს და დილით.

უეჭველად, ისინი, რომელნიც დავობენ ალლაჰის აიათებზე, ყოველგვარი მტკიცებულების გარეშე, რომელიც მათ მოევლინათ, მათ გულებში სხვა არაფერია, თუ არა ამპარტავნება, რომელსაც ვერასდროს მიაღწევენ. მაშ, ალლაჰს მიენდე! უეჭველად, იგია ყოვლისმსმენელი, ყოვლისმხილველი.

უთუოდ, ცათა და მიწის შექმნა უფრო დიდია, ვიდრე ადამიანთა შექმნა, მაგრამ ადამიანთა უმრავლესობამ არ იცის.

და როგორ შეიძლება თანასწორი იყოს ბრმა და მხედველი? ასევე არ არიან თანასწორნი ისინი, ვინც ირწმუნა და აღასრულა კეთილი საქმეები, და ბოროტმოქმედი [ურწმუნო]. რაოდენ მცირედ იხსენიებთ!

უეჭველად, საათი [განკითხვის დღე] აუცილებლად დადგება — არანაირი ეჭვი არ არის ამაში, მაგრამ ადამიანთა უმრავლესობას არ სწამს!

და თქვა თქვენმა უფალმა: «მომიხმეთ მე [ვედრებით], და მე გიპასუხებთ თქვენ! ჭეშმარიტად, ისინი, რომლებიც ამპარტავნობენ ჩემდამი თაყვანისცემაში, შევლენ ჯოჯოხეთში დამცირებულნი (და შეურაცხყოფილნი)!»

ალლაჰია ის, რომელმაც დაგიწესათ თქვენ ღამე, რათა დაისვენოთ მასში, და დღე – დანახვის შესაძლებლობად (ნათელი). უეჭველად, ალლაჰი დიდი წყალობის მფლობელია ადამიანთათვის, მაგრამ ადამიანთა უმრავლესობა არ არის მადლიერი.

აი, ასეთია ალლაჰი, თქვენი უფალი, ყოვლისშემქმნელი. არ არსებობს ღვთაება მის გარდა. მაშ, როგორღა აქცევთ ზურგს (ჭეშმარიტებას)?

ასევე არიან აცდენილნი ისინი, რომელნიც უარყოფდნენ ალლაჰის სასწაულებს.

ალლაჰი — ის არის, ვინც დაგიდგინათ თქვენთვის დედამიწა სამყოფელად, ცა კი — სახურავად, და გაგიფორმათ და გაგილამაზათ თქვენი სახე-პირები, და გიბოძათ კეთილი სარჩო. აი, ასეთია ალლაჰი — თქვენი უფალი! დიდებულია ალლაჰი — სამყაროთა უფალი!

ის არის მარადცოცხალი, არ არსებობს ღვთაება მის გარდა. მაშ, მოუხმეთ მას, მისდამი რწმენაში გულწრფელებმა. ქება-დიდება ალლაჰს, სამყაროთა უფალს.

უთხარი (მრავალღმერთიანებს): «მე ამეკრძალა თაყვანი ვცე მათ, რომელთაც თქვენ მოუხმობთ ალლაჰის გარდა, მას შემდეგ, რაც ჩემთან მოვიდა ცხადი მტკიცებულებანი ჩემი უფლისგან. და მე ნაბრძანები მაქვს, რომ დავემორჩილო სამყაროთა უფალს».

ის არის, რომელმაც გაგაჩინათ თქვენ მიწისგან, შემდეგ წვეთისგან, შემდეგ სისხლის შედედებული კოლტისგან, შემდეგ გამოყავხართ ჩვილებად (დედის მუცლებიდან), შემდეგ რომ მიაღწიოთ თქვენს სიმწიფეს, შემდეგ რომ გახდეთ მოხუცები. და თქვენს შორის არიან ისინიც, ვინც კვდება ადრევე. და (ყველა ეს ეტაპი ხდება) რათა მიაღწიოთ განსაზღვრულ ვადას (სიცოცხლის დასასრულამდე). და იქნებ გონს მოეგოთ.

იგია (ალლაჰი), ვინც აცოცხლებს და კლავს. და როცა ის გადაწყვეტს რაიმეს, მხოლოდ ეტყვის მას: «იყავ!» და ისიც უმალ იქნება.

ნუთუ არ გინახავს (ო, შუამავალო), რომლებიც ალლაჰის სასწაულებზე (აიათებზე) კამათობენ, როგორ არიან ისინი გზასაცდენილნი (ჭეშმარიტებისგან)?

(ესენი არიან) ისინი, რომლებმაც ტყუილად ჩათვალეს წიგნი [ყურანი] და ის, რითაც გავგზავნეთ ჩვენი მოციქულები, მაგრამ მალე გაიგებენ ისინი (თავიანთი ურწმუნოების შედეგს),

როცა (განკითხვის დღეს) მათ კისერზე იქნება საყელურები (ცეცხლისაგან) და ჯაჭვები (ფეხებზე), და მათ ჯაჭვებით გაათრევენ

მდუღარე წყალში, და შემდეგ ცეცხლში, სადაც დაიწვებიან.

შემდეგ ეტყვიან მათ: «სად არიან ისინი, რომელთაც თანამონაწილეებად აღიარებდით

ალლაჰის გარდა?» იტყვიან: «დაგვეკარგნენ ისინი (არ ჩანან). არა, ჩვენ მანამდე არავის ვთხოვდით» (არავის არ ვეთაყვანებოდით ალლაჰის გარდა). აი, ასე აუბნევს გზას ალლაჰი ურწმუნოებს.

(ეტყვიან): «ეს (სასჯელი) იმის გამო, რომ დედამიწაზე უსამართლოდ ხარობდით და იმის გამო, რომ ლხინობდით (ქედმაღლობით იქცეოდით).

შედით ჯოჯოხეთის კარიბჭეებში, სამუდამოდ იქ დასამკვიდრებლად. რაოდენ საძაგელია ამპარტავანთა სამყოფელი».

მაშ, მოითმინე! ჭეშმარიტად, ალლაჰის აღთქმა ჭეშმარიტია. და ან ჩვენ გაჩვენებთ იმის ნაწილს, რასაც შევპირდით მათ, ან მოგივლენთ სიკვდილს, და ისინი მაინც ჩვენთან იქნებიან დაბრუნებულნი.

და ჩვენ შენამდეც წარვგზავნეთ შუამავლები. მათგან ზოგიერთის შესახებ გიამბეთ შენ, ზოგიერთის შესახებ კი არ გიამბეთ. და არც ერთ შუამავალს არ ძალუძდა სასწაულის მოხდენა, ალლაჰის ნების გარეშე. ხოლო როცა მოვა ალლაჰის ბრძანება, საქმე (ჭეშმარიტებით) სამართლიანად გადაწყდება და მაშინ კი წააგებენ სიცრუის მიმდევარნი.

ალლაჰია, რომელმაც შექმნა თქვენთვის პირუტყვი, რათა ზოგიერთ მათგანზე ამხედრდეთ და ზოგიერთი მათგანით იკვებოთ.

და მათში თქვენთვის სარგებელია; და იმისთვის, რომ თქვენი სულების საჭიროებებისამებრ (სასურველ მიწებს მიაღწიოთ), თქვენ მათზე [ცხენებზე] და გემებზე ზიხართ.

და ის გიჩვენებთ თავის ნიშნებს [მრავალრიცხოვან მტკიცებულებებს] და ალლაჰის რომელ ნიშნებს უარყოფთ?

განა არ მოგზაურობდნენ ისინი [მექქის ურწმუნოები და სხვები] დედამიწაზე [განა არ იყვნენ იემენსა და შამში] და (განა) არ იხილეს, რა ბოლო ეწიათ მათ [ვინც ალლაჰს არ დაემორჩილა], ვინც მათ უწინ იყო [ადებს, სამუდელებს და სხვებს]? ისინი [ადები და სამუდელები] უფრო მრავალრიცხოვანნი იყვნენ, ვიდრე ისინი [მექქელები], და უფრო ძლიერნი (ფიზიკური) ძალითა და მიწაზე დატოვებული კვალებით [მათი შენობებით]. მაგრამ ვერ იხსნა ისინი [ალლაჰის სასჯელისგან] მათმა მონაპოვარმა.

როცა მოციქულები ცხადი მტკიცებულებებით მივიდნენ მათთან, მათ უხაროდათ ის ცოდნა, რაც მათ ჰქონდათ (და რაც ეწინააღმდეგებოდა მოციქულების მოტანილს), და დაატყდათ მათ ის (ალლაჰის სასჯელი), რასაც დასცინოდნენ.

ხოლო როცა იხილეს ჩვენი სასჯელი, თქვეს: «ვირწმუნეთ ერთი ალლაჰი და უარვყავით ის, რასაც თანაზიარად ვუდგენდით მას».

მაგრამ მათმა რწმენამ ვერ უშველა მათ, როდესაც მათ იხილეს ჩვენი ძალა [სასჯელი], ალლაჰის განჩინებით, რომელიც უკვე დაატყდა მის მსახურთ. და მაშინ (როცა სასჯელი მოვა) ურწმუნოები წაგებულნი დარჩებიან.