Suuratu Al-Ahqaf pdf

46:1 Haa, Miim

46:2 Jippagol Deftere nden, ko immorde ka Allah, Fooluɗo, Ñeeño On

46:3 Men tagiraali kammuuli ɗin e leydi ndin e kon ko woni hakkunde majji, si wanaa e goonga e lajala happaangal [fii mun]. Yedduɓe ɓen ko ɗuurniiɓe e ko ɓe rentiniraa kon

46:4 Maaku: "On yi`ii ko rewoton kon hara wanaa Allah, hollee lam ko ɗi tagi e leydi ndin? Kaa hara hiɗi mari geɓal e [tagugol] kammuuli ɗin? Awa addanee lam Deftere jippinaande ado ndee ɗoo maaɗum batte ganndal, si wonii ko on goonguɓe

46:5 Ko hommbo ɓuri majjude, wa on rewoowo ko wanaa Allah, kon ko jaabotaako mo haa Ñalnde Darngal? Hara ɗin [reweteeɗi] ko welsindiiɗi e dewal majji

46:6 Si yimɓe ɓen mooɓoyaama [ka Darngal], ɗi wontanoyay ɓe ayɓe, ɓe wona e yeddugol ko ɓe rewaynooɗi kon

46:7 Si Aayeeje Amen ɓannguɗe ɗen janngaama e maɓɓe, yedunooɓe goonga ɓen tuma nde arnoo e maɓɓe ɓen wi`a: "Ɗum ko mbilewu ɓanngu ngu

46:8 Kaa ɓe wi`ay woni :"O fefindi nde?" Awa maaku: "Si taw mi fefindi nde, awa doo on duncantaa lam huunde e [lepte] Allah ɗen. Ko Kanko ɓuri anndude on, tuma nde jumpoton e mayre. O yonii seedee hakkunde am e mon. Ko Kanko woni Haforowo, Hinnotooɗo On

46:9 Maaku: "Mi wonaa arano e Nulaaɓe ɓen; mi anndaa kadi ko waɗetee mi, maa ko waɗeteɗon. Mi jokkaa si wanaa ko wahayinaa kon e am; mi laataaki si wanaa jertinoowo ɓanngina

46:10 Maaku: "Yeetee lam, si tawii le konde iwrunde ka Allah, yedduɗon ɗum, seedotooɗo e ɓiɗɓe Israa’ila ɓen seedii e [sellugol] ɗum, o gomɗini, onon kan townitiɗon...Pellet, Allah fewnataa yimɓe tooñooɓe ɓen

46:11 Yedduɓe ɓen wi`ani gomɗimɓe ɓen: "Si tawno ɗum ko moƴƴere, ɓen (waasuɓe) adototaako men e mun". Nde wonunoo ɓe fewnoraali nde, ma ɓe wi’u: "Ndee ko fenaande neeɓunde

46:12 Hino aditiinde, Deftere Muusaa nden, ɗowornde e yurmeende. Ndee ɗoo kadi, ko Deftere goonginir- nde [ɗeya Defte] e ɗemngal aarabu, fii yo jertinir (nde) tooñooɓe ɓen e wewlinirnde moƴƴinooɓe ɓen

46:13 Pellet, wi’uɓe ɓen: "Ko Allah woni Joomi amen", refti ɓe tabiti (e gomɗinal), kulol alanaa ɓen, wanaa kamɓe sunoytoo

46:14 Ko ɓen woni yimɓe Aljanna ɓen duumotooɓe ton, njoɓdi ko ɓe gollaynoo kon

46:15 Men yamirii neɗɗanke on moƴƴagol e jibimɓe mo ɓen: Jiido makko soworike mo saɗteende, o jibiniri mo kadi saɗteende; soweede mo e enteede mo ko lebbi cappanɗe tati, haa ka o si o yottike sagatalaaku makku ngun o timminii duuɓi cappanɗe nayi, o wi`a: "Joomi, longinam yettugol neema Ma mo neeminirɗaa mi min e jibimɓe lam, e nde mi gollata moƴƴuɗi weltinayɗe Ma, moƴƴinanaa lam geyngol am ngol. Mi tuubanii Ma, ko mi jeyaaɗo e jebbiliiɓe ɓen

46:16 Ko ɓen woni ɓe Men jaɓanta ko ɓuri moƴƴude e ko ɓe golli, Men yawtana ɓe bonɗi maɓɓe, (ɓe jeyaama) e yimɓe Aljanna ɓen. Ɗum ko fodoore goonga nde ɓe fodanoo

46:17 Kala non wi`anɗo jibimɓe mo ɓen: "Uf mo’on ! Kere on foday lam immintineede hara le gomɗii mofte yawtiino ado lam?" Hara ɓen ɗiɗo no faabtinora Allah [wiide mo]: "Ee bone maa, Gomɗin ! Pellet, fodooree Allah nde ko goonga". O wi`a: "Ɗum wonaali, si wanaa tinndi adinooɓe ɓen

46:18 Ko ɓen woni ɓe Konngol ngol jojji e mun, (ɓe jeyaama) e mofte yawtunooɗe ado maɓɓe, immorde e jinna e yimɓe. Pellet, ɓe laatino sooyuɓe

46:19 Hino woodani kala [fedde e maɓɓe]: darjaaji e ko ɓe golli kon, fii no O hunnirana ɓe njoɓdi golle maɓɓe ɗen; e hoore ɓe tooñetaake

46:20 Ñalnde heeferɓe ɓen weeɓitoytee e Yiite ngen (ɓe wi`anee): "On naɓii moƴƴi mon ɗin ka nguurndam mon aduna, dakmitorɗon ɗi. Hannde non, on yoɓitirte lepte hoynooje, sabu ko townitoraynoɗon kon ka hoore leydi, ko aldaa e goonga, e ko huuwiraynoɗon kon faasiqaaku

46:21 Janto fii musiɗɓe Aadi (Huudi) ɓen, nde o jertinirnoo yimɓe makko ɓen aynde nden - gomɗii hari jertinooji yawtiino yeeso makko e ɓaawo makko - wonnde: "Wata on rewu si wanaa Allah. Min miɗo hulani on lepte ñalaande mawnde

46:22 Ɓe wi`i: "E a aru men fii yo a firliaa men e rewetee- ɗi amen ɗin? Awa addan men ko kammbiranɗaa men kon, si wonii ko a jeyaaɗo e goonguɓe ɓen

46:23 O maaki: "Ganndal ngal ko ka Allah woni. Min mi yottinanay on tun woni, ko mi nulaa kon. Ko woni tun mi yi`ii ko on yimɓe majjaaɓe

46:24 Nde ɓe yi’unoo ruulde honde weeɓitii fewtiri ayɗe maɓɓe ɗen, ɓe wi`i: "Ndee ko duulere toɓaynde e men". Ko nden kan woni ! ko hawjirnoɗon kon : ko henndu, ndu lepte muusuɗe woni e mun

46:25 hindu muncira kala huunde, yamiroore Joomi mayru". Ɓe waɗtini, tawi yi’etaake si wanaa koɗooli maɓɓe ɗin. Ko wano nii Men yoɓitirta yimɓe bonnooɓe ɓen

46:26 Gomɗii Men yeɗiino ɓe, e kon ko Men yeɗaali on e mun. Men waɗani ɓe nanɗe, e giiɗe e ɓerɗe. Kono ɗen nanɗe maɓɓe, e giiɗe maɓɓe e ɓerɗe maɓɓe (fow) duncanaali ɓe goɗɗum, tawde ɓe laatino yeddooɓe Aayeeje Allah ɗen. Ko ɓe jalkitaynoo kon jippii e maɓɓe

46:27 Gomɗii Men halkiino ca’e wonunooɓe sera mon; Men firlitiri Aayeeje ɗen, belajo’o ɓe ruttoto

46:28 Ko haɗno ɗin ɗi ɓe jogitornoo reweteeɗi ɓaɗtinorɗi gaanin Allah, faaboo ɓe? Tigi on, ɗin majjirii ɓe; ko ɗum wonunoo fenaande maɓɓe e ko ɓe fefindotonoo

46:29 Janto tuma nde Men imminnoo fedde jinna e maaɗa, hiɗi heɗoo Alqur`aana. Nde ɗi tawanoo ɗum, ɗi wi`i: "Heɗee"...Nde [janngin kin] timmunoo, ɗi huccitiri ka yimɓe majji, jeertinooji

46:30 Ɗi wi`i: "Ko onon yo mbatu amen, men nanii Deftere jippinaande ɓaawo Muusaa, goonginnde ɗen adiiɗe nde. Hinde fewna e goonga e laawol focciingol

46:31 Ko ono yo mbatu amen, nootee noddoowo e Allah on, gomɗinon mo. [Ontuma] O haforanay on junuubimon ɗin, O daɗnda on lepte muusuɗe

46:32 Kala mo nootaake noddoowo e Allah on, o wonaa laawotooɗo ka leydi, o alaa kadi giɗo gaanin Makko. Ko ɓen woni e nder majjere ɓanngunde

46:33 E ɓee yi`aali wonnde ko Allah tagi kammuuli ɗin e leydi ndin, O ronkiraali tagugol ɗi, wonnde ko O haɗtanɗo wuurnitugol maayɓe ɓen? Ko non woniri. Pellet, ko O haɗtanɗo kala huunde

46:34 Ñalnde heeferɓe ɓen weeɓitoytee e Yiite ngen, [ɓe wi`anee]: "Wanaa goonga nii?" Ɓe wi`a : "Ko non woniri! Men woondirii Joomi amen!". O Daala : "Awa meeɗiree non lepte ɗen, sabu kon ko yeddiraynoɗon

46:35 Muññor muñal joomiraaɓe pellital ɓen ka Nulaaɓe; wata a hawjan ɓe. Ñalnde ɓe yi’oyta ko ɓe kammbiranaa kon, ɓe wa’oyay wa si ɓe ñiiɓaano [ka leydi] si wanaa dumunna-hun ñalorma. Ɗun ko yottinal. Ko homɓe halketee si wanaa yimɓe faasiqiiɓe ɓen