Suurat Al-Muzzammil pdf

Kee isi sarot yambududow! (Nabii kinnuk)

Bar inkih salaatah sol barak dagom akke waytek

Barak garab sol, hinnay garabak dagom cab

Hinnay garabat osisaay, Qhuraan caatih cubbusak akriy

Nabiyow Diggah Nanu qilsi maxco (Qhuraan kinnuk) kol oobisenno

Diggah barak gimo aban salat kee qibaada sorkocobbaxa kaxxam raatissaah maxcô baxxaqqaa kee diggah aysuk raqta

Diggah laqo maggo agxe lito

Nabiyow ku Rabbih migaq cusaay, isi qibaadah kaâ fanah aggiriqiyyah iggiriqqiy

Usuk ayrô mawqaa kee ayrô kormâ Rabbi, kaak sa cakkil yaqbuden Yalli mayanak, toysa keltiyyah kaal kelit

Kaadu koros koo kee ku diinik ittaamal isbiraay qaxmeqe cabtih ken cab

Kaadu Nabiyow yoo kee tama yaayoota dirabboysa maray niqmatat yani ittah cabaay! Dago wakti keenih ab

Diggah usun ni garil axoowaa kee jaciim deqgsitta girá lon

Kaadu uma maaqoy serko ley katlak oobe waytaa kee ken qansarissa digaalá lon

Baaxoó kee qaleelá tangayye ayróy, qaleelá caxitta burta takke

Diggah nanu makki korosey farmoytay (Nabii Mucammad csati kinnuk) sin taamoomil sumaaqita siinî fanah rubne, firqawnâ fanah farmoyta (Nabii Muusa kinnuk) kah rubne innaah

Tokkel firqawni too farmoyta cineeh, gibdi digaaláh kaa digaalle

Toysa sinni nafsi too digaalak mannal catetton, meesi gibdah urru amqadoytit abta ayró, (Qhiyaamah ayró kinnuk) tengeddeenik

Woo ayro meesî gibdah qaran qanxixah, Yalli is tamaatu waytaamah hee xagni yamaatuwaam raq mali

Diggah ta aayoota sinaamah kassiisik, toysa qakkaloowaah, isi nafsih maqaané faxe num isi Rabbî fanah gita yabbaxay Yallak meesii kee taaqatal

Nabiyow! diggah ku Rabbi atu barti salaatah waqdik teyna barak sidiica afak namma afak daguk raqtam kaak soltaah, aka adda garab kaak soltaah, aka adda kaadu sidocaytoh afa kaak soltam yaaxigeh, ku kataysiisik hortay kolluk tanî luk, yalli usuk bar kee laqo takkeh gide yaaxigeeh usuk ken waadoysa, yalli isin bar inkih salaatah soolak xintaanam duude waytaanam yeexegeeh, qafu siinih kak abeeh siinil xabbacoyseh, toysa barti salaatal qhuraanak siinih xabbacowtem akriya, yalli siinik biyaakita maray barti salaatah soolam duude waa siinit aneelem yeexegeh, kaadu aka maray yallih muxxo (rizqhi kinnuk) gurrusay baaxô bagul kabxah (tellemmo kinnuk) yangayyee kee aka maray yallih gital gaaduh yangicille siinik aneelem yeexegeh, toysa barti salaatal qhuraanak siinih xabbacowtem akriya, kaadu fardi salat elle faxxiima'nnal abaay, zakay waajibik siinil tani acuwa, kaadu yallih fooca edde faxak sadqhat ottocowwa, kaadu simaamey sinni nafsih maqaanek tatrussu hayteenem is yallih xaqul isin addunyal tatrusseenimik kayrih aysuk raqtaah galtoh nabuk raaqak tet geetton, kaadu yallak dambi cabti esserita, diggah yalli dambi cabtili xuwawli kinnik