Suurat Al-Muddaththir pdf

74:1 Kee bududet yan Nabiyow

74:2 Ugutaay sinam Yallih digaalák meesis

74:3 Kaadu isi Rabbi eyneb

74:4 Kaadu isi sara najaasak saytunnos

74:5 Kaadu Yallat agleyta haanam kee raqqate umaaneenak exxer

74:6 Kaadu tu edde tassamgguh acwa maabin

74:7 Kaadu ku Rabbih kacanu edde geytu waytaamal isbir

74:8 Tokkel ugut Baantá fooximtu wayta waqdi

74:9 Too ayró gibdi ayró

74:10 Too ayró korosul xabcá mali

74:11 Nabiyow! Yoo kee inâ bagut dibuk anuk gineh an num (waliid ibnul mughiira kinnuk) sittah cab

74:12 Kaadu maggo maalu kah ecee num

74:13 Kaadu kaallih geytimta xaylo kah ecee num

74:14 Addunyal mano xabbacoysiyyah kah xabbacoyseeh farakka kah hee num

74:15 Tohuk lakal xalay kee maalu kaah ossam qaagitaah sangeela

74:16 Caagid usuk elle yakkale inna hinna, diggah usuk naayoota cirdih angadduk suge

74:17 Saytutticin qaley girák tani yawqeemih kaa dirkiseyyo

74:18 Diggah usuk isi nafsil cubbuseeh, massoyseh Nabii kee Qhuraan xagitik iyyuwaam

74:19 Tokkel usuk abbarsimehik mannal massoysee ta uma xagit

74:20 Tohuk lakal abbarsimehik mannal massoyseeh ta uma xagit

74:21 Tohuk lakal usuk cubbii kee malat qagteh

74:22 Tohuk lakal ceereeh fooca kaxxa ribiyyah ribe

74:23 Tohuk lakal cakkit derre cabeeh, kaxxamariiniteh

74:24 Tokkel Qhuraanak: ah tu hinna Mucammad naharsi marak baahe baab akke waytek iyye

74:25 Ah tu hinna seehadâ maxcó akke waytek iyye

74:26 Saqhar deqsitta girá kaa culseyyo, teetit cararaah tet digaalá tammoysuh

74:27 Saqhar kinni girá maca koo tiysixxigeeh

74:28 Is xagaral cado macabtaay, lafa macabta carrissa tet akke waytek

74:29 Is xagar carissaah, dattossah

74:30 Taban kee sagaal tet amol yan malaykak

74:31 Kaadu girá dacrisa mara malayka akke waytek maabinnino, Kaadu maabinnino ken ixxu koroosite marah aqayyaareey, kitab kah yontocowwime mari yasmitê gideh iyyaanam akke waytek, kaadu yeemene mari iimaan elle ossituuy, kitab kah yontocowwime maraa kee moominiin elle agaywaagite waytu, kaadu sorkocobbaxittet biyak le maraa kee koros Yalli tahat ceelalloh maca faxee ittuh, Tonnaah Yalli isih faxe mara makkoysaah isih faxe mara tirri haa, ku Rabbih qandé takkeh gide taaxigê matan kaa akke waytek, girá tu hinna is seehadah kassis takkemkeh iyyaanam akke waytek

74:32 Koros elle takkale inna hinna, Yalli alsál xiibite

74:33 Kaadu Bari derre caba waqdil xiibite

74:34 Maaci ifá waqdil xiibite

74:35 Diggah, is (girá kinnuk) nabaamak tiyak teyná

74:36 Is seehadah meesissoh tan

74:37 Siinik faxe mari maqaanél taturay hinnay umaanél wadirrooway

74:38 Ummaan nafsi abiteemit axawah yan

74:39 Migdi maray moominiinih yani akke waytek

74:40 Jannat addal sitta esseraanah

74:41 Umeyniitiy gira cultê caalat

74:42 Saqhar deqsitta girá maca sin culussee keenik iyyan

74:43 Addunyal salat aba marâ lih salat abak masuginnino iyyan

74:44 Kaadu tu mali askamuk masuginnino

74:45 Kaadu umaanet giirisa marâ lih giirisak sugne

74:46 Kaadu galtóh ayró (Qhiyaamah ayró kinnuk) dirabboysak sugne

74:47 Asmat (Raba kinnuk) net xikki iyyam fanah

74:48 Tokkel shafaaqat abá marih shafaaqatta tu keenih maxiqta

74:49 A koros kassitit (Qhuraan kinnuk) derre kah cabtam maca lee

74:50 Gilsime dibookolih innah

74:51 Lubaakak kude waqdi

74:52 Wonna hinnay keenik kulli seehadayti fakut tan kitooba iseh tantacawwimeeh geyam faxa

74:53 Tonna hinnay diggah, usun ellecaboh ayrók ma meesitan

74:54 Nummah ta Qhuraan usuk kassiisi elle kaskassoowa marah

74:55 Tokkel kassitam faxa mari kaal kaskassoowah

74:56 Kaal (Qhuraan kinnuk) kaskassowtam matan Yalli kah faxe num akke waytek, usuk (Yalla kinnuk) kak meesitoonu meesi caglitaah, dambi cabti caglita Rabbi kinni