Banal na Quran Pahina 601

Sa pamamagitan ng Al-Asr (paglipas ng mga sandali sa tangkay ng panahon)

Katotohanan! Ang tao ay nasa kawalan (at pagkapahamak)

Maliban sa mga sumasampalataya (sa Kaisahan ni Allah at sa Islam), at nagsisigawa ng mga kabutihan at magkabalikat sa pagtuturo ng Katotohanan (alalaong baga, nagtatagubilin sa kanya [kanila] na magsagawa ng lahat ng uri ng mabubuting gawa na ipinag-uutos ni Allah at pag-iwas sa lahat ng masasamang gawa na ipinagbabawal ni Allah), at nagtatagubilin sa isa’t isa sa pagtitiyaga at pagiging matatag (sa mga pagdurusa, kapinsalaan, at sakit na maaaring maranasan ng sinuman sa panahon ng kanyang pangangaral ng Kanyang Pananampalataya, atbp., tungo sa Kapakanan ni Allah)

Kasumpa-sumpa (sa kaparusahan) ang bawat makakating dila na naninirang puri at yumuyurak sa talikuran

Na nagsasalansan at nagtitipon ng mga kayamanan

Na nagpapalagay na ang kanyang kayamanan ay makakapagpahaba ng kanyang buhay nang walang hanggan

Walang pagsala! Katotohanang siya ay ihahagis sa dumudurog na Apoy

At ano nga ba ang makakapagpahiwatig sa iyo kung ano ang dumudurog na Apoy

Ito ang Apoy ng Poot ni Allah na Naglalagablab ang Ningas

Na sasadlak sa puso (ng mga tao)

Katotohanang ito ang lulukob sa kanila

Sa mga haligi sa mahabang hanay (alalong baga, sila ay paparusahan sa Apoy na may mga haligi, higaan, atbp)

Hindi mo ba napagmalas (O Muhammad) kung paano pinakitunguhan ng iyong Panginoon ang may-ari ng Elepante? [ang hukbo ng mga elepante na nanggaling sa Yemen sa pamumuno ni Abraha Al-Ashram na nagnanais na wasakin ang Ka’ba sa Makkah]

Hindi baga Niya hinadlangan ang kanilang (masamang) balak at (sila ay) mapaligaw

At isinugo Niya laban sa kanila ang mga kawan ng ibon

Na pumupukol sa kanila ng mga bato ng Sijjil (mga batong gawa sa matigas na putik)

At Kanyang ginawa sila na tila mga hungkag na bukirin ng mga dayami (na ang mais dito ay ginasak at kinain ng mga baka)