Suuratu Ar-Rum — Aaya 41

1. Maanaaji konngooji ɗi ngoni waajibii famɗinde e nder ndee aaya:

• ظَهَرَ: Feeñii, ɓanngii.
• الْفَسَادُ: Bone, bonannde, warngo, nyapara, rafi, heege, e ko nanndi heen.
• الْبَرِّ: Njolni, jeere, e nokkuuji ɗi ngalaa ndiyam.
• الْبَحْرِ: Maayo, tekkere, e gure ɗe ngoni e daande maaje e tekkere.
• كَسَبَتْ أَيْدِي النَّاسِ: Ko ɓiɓɓe aadee peññitii e junuubi e bone.
• لِيُذِيقَهُم: Fii yo O meeɗinɓe lepte ɗen.
• لَعَلَّهُمْ يَرْجِعُونَ: Belajo'o ɓe ruttoto e tuuba.

1. Firo aaya ndee:

Bone e bonannde feeñii e njolni e tekkere: ndunndu, ŋakkere toɓo, rafiiji ɗuuɗuɗi, e mborosaaji keewɗi. Ɗum fof ko sabu junuubi e bone ɗi ɓiɓɓe aadee peññitiri e juuɗe maɓɓe. Alla no meeɗina ɓe lepte yoga e ko ɓe golli kon e nguurndam aduna, fii yo ɓe rutto e tuuba, ɓe accu junuubi e bone, ɓe ruttoto e Alla. Si ɓe tuubii, geɗe maɓɓe ɓenndoto, fiyaaku maɓɓe fotondiri.

1. Nafaaji ɗi aaya ndee waajnata:

• Aaya ndee no holli wonde bone e caɗeele ɗe ngoni e aduna ko sabu junuubi aadee, wonaa Alla woni tooñɗo ɓe.
• No waajna aadee yo ɓe tuubu e junuubi maɓɓe, sabu tuuba woni laawol hisnugol e newaare.
• No holli wonde Alla no yurmaa, o meeɗinataa aadee lepte fof ɗe golle maɓɓe hanndi, kono yoga tan, fii yo ɓe rutto.
• No kollira yurmeende Alla e nder lepte ɗen: O haɓaani ɓe e nder bone, kono O faandii yo ɓe rutto e moƴƴere.
• No waajna aadee yo ɓe ndaara geɗe maɓɓe, ɓe accu bone, ɓe rutto e Alla, sabu nduun woni laawol newaare e jam e nder aduna e laakara.