Simoore Al-Muddaththir pdf

Éey, yaw Ku ñu muur ki!

Neel ñokket jóg tey xuppe.

Te na ngay màggal sa Boroom.

Te na ngay laabal say yéere.

Te it na ngay daw bépp bàkkaar.

Bul di joxe mukk ngir sàkku ca lu gëna bari.

Te na ngay muñ ngir sa Boroom.

Saasu ñu walee ca mbiib ga,

su boobaa bis bu jafeñ lay doon,

du yomb ca yéefar ya de.

Bàyyi Ma ak ki nga xam ne maa ko bindoon nu wéet,

te ma joxoñ ko alal ju yaatu,

ak doom yu ko daan wéttali,

te Ma dindiloon ko bépp jafe-jafe.

te mo daan xemmeem saa su nekk Ma di ko dolli.

Te kat des na ! Ndax moom da daan lànk di bañ (Al xuraan) ji.

Danaa ko sonale yéegu tundu.

Moom day xalaat. Na daldi soobu.

Nu daldi koy rey ! Ca na mu sóobóo !

Topp Nu reyaat ko ; Ca na mu sóobóo woon !

Mu daldi, xool.

Daldi nay gaññ te sóomórlu.

Topp mu daldi dumóoyu tey rëy-rëylu.

Mu daldi wax ne : “Alxuraan jii daal ag njibar doŋŋ la

lii daal du leen lu dul waxi nit”.

Kookee dey danaa ko lakk ci Safaraw (Saqar).

Ana kan moo lay xamal luy Saqar ?

Du bàyyi dara ;

Dafay alawtiku ab der di ko xëmël.

Fukki (Malaaka) ak juróom-ñanant koy wattu.

Ay Malaaka rekk ay wattu Safara. Te, lu ñuy bari bari nekku wu ñu fa lu dul fitnaal yéefar yi, ak tiiñal ñoñ Téere, ak dolli ngëmug ña gëmoon, ak it ñoñ Téere ak way gëm ña baña dengi-dengi ; ak it ngir yéefar yaak ña seeni xol wopp di wax naan : “Ana lu Yàlla namm ci misaal mii ? ” Noonu la Yàlla réerële ku ko soob di gindi it ku ko soob. Te sa xarekati Boroom, Moom doŋŋ leen xam. Te lii du lenn lu dul luy fàttali bindéef yi jàjj leen.

Déet !... maa ngi giñ ci weer wi !

Ak ci guddi su nee wërëñ !

Ak su fajar si di xar!

[Safaraw Saqar] bokk na ca tiis yi gëna rëy

ag xuppe la, ñeel bindéef yi.

Ku mu soob ci yéen, na jiitu walla mu des ginnaaw.

Bakkan bu mu mana doon ag tayle la ci jëfam.

Ba mu des waa ndeyjoor :

ñoom ña nga ca biir Àjjana di laajante

ci mbirum tooñkat ya :

“(Naan) Ana lan mooleen wara duggloo Safaraw Saqar ? ”

Ñu tontu ne : “Nun kat danu daawul julli,

te daawune leel miskiin yi,

te danu daan ànd ak caaxankat ya,

te danu daan weddi bis Penc bi,

ba dee aksi ci sunu kaw”.

Rammug rammukat, du leen fa jariñ dara.

Ana lan moo leen dëdëleek fàttaliku ?

Dañoo mel ni ñu ñu tiital (ay mbaam),

ni ñuy dawe gaynde.

Kenn ku nekk ci ñoom bëggoon na ñu jox ko ay kayit yu teqalikoo.

Dee wa laay ! Ñoom ragalu ñu woon àllaaxira.

Mukk ! Te lii ag fàttali la.

Kéep ku mu soob, na fàttaliku.

Te manuñoo fàttaliku lu dul ci bu soobee Yàlla. Te moo gëna yayoo ci ragal ko ; te moom doŋŋa am njégël.