Сура Аль-Муддассир pdf

74:1 ХIай /бедарх/ дIахьаьрчинарг !

74:2 ХьалагIатта‚ кхерам таса!

74:3 Хьуо Кхиош-Кхобург воккхаве!

74:4 Хьайн бедар цIанъе!

74:5 Боьху хIуманаш дIатаса !

74:6 Ма ло хIума, хьайна /цунах/ алссам тIекхиар лоьхуш .

74:7 Хьо Кхиош-Кхобучун /гIуллакхна/ собаре хила.

74:8 Сур лекхначу хенахь (шолгIа локху сур) –

74:9 иза де - хала де ду.

74:10 /Делах/ тешаш боцучарна атта доцуш.

74:11 Вита Со а и Ас кхоьллинарг а тхаьш.

74:12 Ас хилийтира цунна шортта даьхни а‚

74:13 КIентий а, шаьш цуьнца цхьаьна /гуттар/ лаьтташ.

74:14 Ас аьтто бира цунна /хаза/ аьтто барца.

74:15 ТIаккха а лиира цунна Ас совдаккха /шен хьал/.

74:16 ХIан-хIа! Баккъалла а, иза хилира Тхан аяташна дуьхьал.

74:17 Ас тIеюьллур ю цунна ирхо (Iазапан мохь).

74:18 Баккъалла а, цо ойла йора‚ хьесап а дора.

74:19 ХIаллакхиларг ! Муха дора цо хьесап?

74:20 ТIаккха а хIаллакхиларг! Муха дора цо хьесап?

74:21 ТIаккха иза хьаьжира.

74:22 ТIаккха юьхь хабийра‚ вусавелира.

74:23 ТIаккха иза юхавелира /Къуръанах/‚ куравелира.

74:24 Цо элира: "ХIара (Мухьаммада дуьйцург) деккъа бозбуунчалла ду /хьалха дуьйна дайшкара/ схьадогIуш долу.

74:25 ХIара деккъа адаман дош ду".

74:26 Ас вагор ву иза сакъаран /жоьжахати/ чохь.

74:27 Хьан хаийтина хьуна /х1ай Мухьаммад/‚ хIун ю и сакъар?

74:28 Буха а ца вуьту цо‚ дIа а ца тосу,

74:29 чкъор (нуьцкъала) дагадеш ерг ю иза.

74:30 Цунна тIехIоьттина ткъаесна /малик/ ду.

74:31 Жоьжахатина тIехIоьттина берш Оха маликаш бен ца хилийтина. Церан дагардар ца хилийтина Оха деккъа цатешачарна питанна бен а‚ жайнин охIлана и бакъ дуйла хаийтархьама а‚ /Делах/ тешаш берш ийманца совбахархьама а‚ шеко ца яйтархьама жайнин охIлане а‚ муъма нахе а; шайн дегнашкахь цамгар йолчаьрга а‚ цатешачаьрга а алийтархьама: "ХIун лиъна техьа Далла, хIокхуьнца масал а далийна?" Иштта тилавала вуьту Дала Шена луург‚ нисво Шена луург. Хьан Кхиош-Кхобучун эскар хуур дац Цунна Шена бен. Иза беккъа хьехам бу-кх адамашна.

74:32 ХIан-хIа! Баттах дуй боу Ас;

74:33 буьйсанах дуй боу, и тIаьхьаяханчу хенахь;

74:34 сатасарх дуй боу, и гучудаьллачу хенахь:

74:35 баккъалла а, иза (сакъар олу жоьжахати) уггар баккхийчарах цхьа бала бу,

74:36 кхерамча а хилла адамашна.

74:37 Шух шен луучунна /диканна/ хьалхавала а‚ /вочунна/ тIаьхьависа а .

74:38 Массо а са ша карадинчуьнца закъалт ду

74:39 аьтту куьйган дай боцурш.

74:40 Уьш /бошмашкахь/ вовшашка хоьттуш хир бу

74:41 къинош диначарах:

74:42 "Хьан дигина шу сакъара чу?"

74:43 Цара (цу жоьжахате баханчара) эр ду: "Тхо ца хилира ламазаш дечарах,

74:44 тхо ца хилира, мискачарна хIума даош.

74:45 Даьсса хабарш дуьйцучаьрца /даьсса/ хабарш дуьйцуш хилира тхо‚

74:46 бекхаман де харцдеш хилира тхо

74:47 тхайга бакъдерг даллалц".

74:48 Пайда бийр бац царна шапаIат дечеран шапаIато.

74:49 ХIун ду царна уьш хьехамах дIаберза?

74:50 Шаьш акхаевлла варраш санна‚

74:51 /кхераелла/ йовдуш ломах?

74:52 ХIетте а, царах массо а ву лууш шега лойла схьадиллина жайнаш .

74:53 ХIан-хIа! Уьш ца кхоьру эхартах.

74:54 ХIан-хIа! Баккъалла а, иза /Къуръан/ хьехам бу,

74:55 Шена /нисвала/ луучо т1елоцур бу и.

74:56 Далла лаахь бен, цара т1елоцур-м бац. Иза ву /Шех/ кхераран охIла‚ Иза ву /Ша/ гечдаран охIла.