سورت مؤمنون — آیت 1

د کلمو معناګانې:

• أَفْلَحَ: بریالی شو، کامياب شو، نجات وموند او هغه څه ته ورسېد چې غوښتل یې.

تفسیر:

الله تعالی په دې آیت کې د مؤمنانو د بریا او کاميابۍ خبر ورکوي. هغه کسان چې پر الله او د هغه پر رسول (صلی الله علیه وسلم) ایمان لري او د هغه پر احکامو عمل کوي، دوی په رښتینې معنا بریالي او کامياب شوي دي. د دوی بریا په دې کې ده چې هغه څه ترلاسه کوي چې یې غواړي (یعنې د جنت تلپاتې نعمتونه) او له هغه څه څخه خلاصیږي چې وېریږي (یعنې له عذاب او جهنم څخه). دا خبره د مؤمنانو لپاره زېری او بشارت ده، ځکه چې دوی د دې بریا منتظر وو او الله تعالی دوی ته دا ډاډ ورکړ چې د دوی هڅې به ضایع نه شي.

فايدې:

• ایمان او عمل یو له بل سره تړلي دي؛ یوازې د ایمان ادعا کافي نه ده، بلکې د الله په شریعت باندې عمل هم ضروري دی.
• کاميابي او بریا یوازې په دنیوي مال او مقام کې نه ده، بلکې اصلي بریا د آخرت په نجات او د جنت په ترلاسه کولو کې ده.
• دا آیت مؤمنانو ته ډاډ او تسلیت ورکوي چې د دوی هڅې او قربانۍ به ضایع نه شي او الله تعالی به دوی ته د دوی د اعمالو غوره بدله ورکړي.
• په دې آیت کې د مؤمنانو د ستاینې او د هغوی د لوړ مقام ذکر شوی، چې د نورو مسلمانانو لپاره د هڅونې او الهام سرچینه ده.