സൂറ അത്-തലാഖ് — ആയത്ത് 3

പദാർത്ഥങ്ങൾ:

• يَرْزُقْهُ: അവന്ന് ഉപജീവനം നൽകുക
• مِنْ حَيْثُ لَا يَحْتَسِبُ: അവൻ കണക്കുകൂട്ടാത്ത വിധത്തിൽ, അവന്റെ മനസ്സിൽ പോലും വരാത്ത ഭാഗത്തുനിന്ന്
• حَسْبُهُ: അവന്ന് മതിയായവൻ, അവന്റെ എല്ലാ കാര്യങ്ങൾക്കും പര്യാപ്തൻ
• بَالِغُ أَمْرِهِ: തന്റെ കാര്യം നിർവഹിക്കുന്നവൻ, തന്റെ വിധി നടപ്പിലാക്കുന്നവൻ
• قَدْرًا: ഒരു നിശ്ചിത അളവ്, ഒരു അവധി

വ്യാഖ്യാനം:

അല്ലാഹുവിനെ ഭയപ്പെട്ട് അവന്റെ കൽപ്പനകൾ പാലിക്കുകയും വിലക്കുകളിൽ നിന്ന് വിട്ടുനിൽക്കുകയും ചെയ്യുന്ന വ്യക്തിക്ക് അല്ലാഹു എല്ലാ ഞെരുക്കങ്ങളിൽ നിന്നും ഒരു മാർഗ്ഗമുണ്ടാക്കികൊടുക്കും. അവൻ കണക്കുകൂട്ടാത്ത വിധത്തിൽ, അവന്റെ മനസ്സിൽ പോലും ഉദിക്കാത്ത ഭാഗത്തുനിന്ന് അവന്ന് ഉപജീവനം നൽകും. തന്റെ എല്ലാ കാര്യങ്ങളിലും അല്ലാഹുവിൽ ഭരമേൽപ്പിക്കുന്നവന്ന് (തവക്കുൽ ചെയ്യുന്നവന്ന്) അല്ലാഹു തന്നെ മതിയായവനാണ്; അവന്റെ എല്ലാ ആശങ്കകൾക്കും അവൻ പരിഹാരം നൽകും. തീർച്ചയായും അല്ലാഹു തന്റെ കാര്യം നിർവഹിക്കുന്നവനാണ്; അവനിൽ നിന്ന് ഒന്നും ഒളിച്ചുവെക്കാനാവില്ല, അവന് ഒന്നും അസാധ്യമല്ല. അല്ലാഹു ഓരോ കാര്യത്തിനും ഒരു നിശ്ചിത അളവും അവധിയും നിശ്ചയിച്ചിരിക്കുന്നു. ഞെരുക്കത്തിന് ഒരു അവധിയുണ്ട്, സൗകര്യത്തിനും ഒരു അവധിയുണ്ട്. ഇവ രണ്ടും ഒരാൾക്ക് സ്ഥിരമായി നിൽക്കുന്നില്ല.

പ്രയോജനങ്ങൾ:

1. അല്ലാഹുവിനെ ഭയപ്പെടുന്നവർക്ക് എല്ലാ പ്രതിസന്ധികളിൽ നിന്നും രക്ഷയുണ്ടെന്നും അവൻ കണക്കുകൂട്ടാത്ത വിധത്തിൽ ഉപജീവനം ലഭിക്കുമെന്നുമുള്ള മധുരമായ വാഗ്ദാനമാണ് ഈ ആയത്ത് നൽകുന്നത്. ഇത് വിശ്വാസിയുടെ ഹൃദയത്തിൽ പ്രതീക്ഷയും ആത്മവിശ്വാസവും നിറയ്ക്കുന്നു.
2. അല്ലാഹുവിൽ തവക്കുൽ ചെയ്യുന്നവന് അവൻ തന്നെ മതിയായവനാണ്. ജീവിതത്തിലെ എല്ലാ ആശങ്കകളിൽ നിന്നും ഉത്കണ്ഠകളിൽ നിന്നും മോചനം ലഭിക്കാനുള്ള ഏറ്റവും നല്ല മാർഗ്ഗം അല്ലാഹുവിൽ ഭരമേൽപ്പിക്കുകയാണ്. ഇത് മനസ്സിന് സമാധാനവും ആത്മാവിന് ശാന്തിയും നൽകുന്നു.
3. അല്ലാഹുവിന്റെ വിധി എത്ര വൈകിയാലും തീർച്ചയായും നടപ്പിലാകും. അതിനാൽ ക്ഷമയും ദൃഢവിശ്വാസവും പുലർത്തണം. ഓരോ കാര്യത്തിനും അല്ലാഹു ഒരു നിശ്ചിത അളവ് നിശ്ചയിച്ചിട്ടുണ്ട്; ഞെരുക്കം സ്ഥിരമല്ല, സൗകര്യവും സ്ഥിരമല്ല. ഇത് ജീവിതത്തിലെ ഏറ്റക്കുറച്ചിലുകളെ ക്ഷമയോടെ നേരിടാൻ വിശ്വാസിയെ പ്രാപ്തനാക്കുന്നു.