حج سۈرىسى — ئايەت 11

1) ئايەتتىكى چۈشەندۈرۈشكە موھتاج سۆزلەر:

• عَلَىٰ حَرْفٍ: ئەسلىدە «حەرف» نەرسىنىڭ چېتى، ياقىسى دېگەن مەنىدە. بۇ يەردە دىندا تۇرۇشۇنىڭ چېتتە، ياقىدا، يەنى شەك ۋە تەردىد ئۈستىدە ئىكەنلىكىنى، دىنغا پۇختا ئورنىمىغانلىقىنى كۆرسىتىدۇ.
• فِتْنَةٌ: سىناق، بەلا-مۇسىبەت، قىيىنچىلىق، كەمبەغەللىك ۋە كېسەللىك قاتارلىق ئىمتىھانلىق ئەھۋاللار.
• انقَلَبَ عَلَىٰ وَجْهِهِ: يۈزىنى ئۆرۈپ قايتىپ كەتتى، يەنى ئىسلامدىن يېنىۋېلىپ كۇفرىغا قايتتى.
• خُسْرَانٌ مُبِينٌ: ئوپئوچۇق، ئېنىق زىيان ۋە زىيانكەشلىك.

2) ئايەتنىڭ تەپسىرى:

ئاللاھ تائالا بۇ ئايەتتە بەزى كىشىلەرنىڭ دىنغا كىرىشتىكى ئەھۋالىنى بايان قىلىدۇ. ئۇلار ئىسلامغا پۇختا ئىشەنچ ۋە چوڭقۇر ئېتىقاد بىلەن كىرمەي، بەلكى شەك-شۈبھە ۋە تەردىد ئۈستىدە تۇرۇپ كىرىدۇ. ئۇلارنىڭ ئاللاھقا ئىبادەت قىلىشى تاغنىڭ چېتىدە ياكى تامنىڭ ياقىسىدا تۇرغان كىشىگە ئوخشايدۇ — مۇستەھكەم تۇرالمايدۇ، ھەر ۋاقىت يىقىلىپ كېتىش خەۋپىدە بولىدۇ. ئۇلار ئېتىقادىنى دۇنيا مەنپەئەتىگە باغلاپ قويىدۇ: ئەگەر ساغلاملىق، بايلىق ۋە كەڭچىلىككە ئېرىشسە، خۇشال بولۇپ ئىبادەتتە داۋاملىشىدۇ؛ ئەمما كېسەللىك، نامراتلىق ياكى باشقا بىرەر بەلا-مۇسىبەت كەلسە، بۇنى دىنىنىڭ شۇمى دەپ بىلىپ، ئىسلامدىن يېنىۋېلىپ كۇفرىغا قايتىدۇ. شۇنىڭ بىلەن ئۇ دۇنياسىنىمۇ، ئاخىرىتىنىمۇ زىيانغا ئۇچرىتىدۇ: دۇنيادا كۇفرى ئۇنىڭ تەقدىردە يېزىلغان نېسىۋىسىنى ئاشۇرۇپ بەرمەيدۇ، ئاخىرەتتە بولسا دوزاخ ئازابىغا دۇچ كېلىدۇ. بۇ ئوپئوچۇق زىياننىڭ ئۆزىدۇر.

ئىسلام دىنى بىزنى ئاللاھقا چىن كۆڭلىمىزدىن، پۇختا ئېتىقاد بىلەن ئىبادەت قىلىشقا، خۇشاللىق ۋە قىيىنچىلىق ئىككىسىدە ئىماندا مۇستەھكەم تۇرۇشقا چاقىرىدۇ. ھاياتتا كەلگەن ھەر قانداق سىناق ئاللاھنىڭ بىر ئىمتىھانىدۇر؛ سەۋر قىلغان ۋە شۈكۈر قىلغان كىشى ئۈچۈن ئۇنىڭدا چوڭ ئەجر ۋە ياخشىلىق بار. ئاللاھ تائالا بىزنى شەك-شۈبھىدىن ساقلاپ، ئىمانىمىزنى ھەر قانداق ئەھۋالدا مۇستەھكەم قىلىشىمىزنى نەسىپ قىلغاي.