سوڕەتی غاشیه — ئایه‌ت 1

واتەى وشەكان:

• هەل: وشەیەكى پرسيارە، بەڵام مەبەست لێى لێكۆڵینەوە و گرنگیدانە، نەك پرسيارى ئاسايى.
• ئەتاك: هاتووە بۆ تۆ.
• حەدیس: هەواڵ و بەسەرهات.
• غاشیه: قیامەت، بەو هۆیەوە ناونراوە كە هەموو خەڵكى دادەپۆشێت و دەورە دەدات بە ترس و سەختییەكانى.

تەفسیرى ئایەتە پیرۆزەكە:

ئەی پێغەمبەرى خوا! ئایا هەواڵى قیامەت و ئەو ڕۆژە گەورەیە بە تۆ گەیشتووە؟ ئەو ڕۆژەى كە بە سەختی و ترس و ناخۆشییەكانى هەموو خەڵكى دادەپۆشێت و دەورە دەدات. ئەم پرسارە بۆ گرنگیدان و سەرنج ڕاكێشانە، واتە: بەڕاستى هەواڵى ئەو ڕۆژە گەورەیە گەیشتووە كە دڵەكان دەلەرزێنێت و چاوەكان سەرسام دەكات.

ئەم ئایەتە پیرۆزە بە شێوەیەكى جوان و کاریگەر دەست پێدەكات بۆ ئەوەى خەڵكى بێدار بكاتەوە و بیرى بخاتەوە بۆ ئەو ڕۆژە مەزنەی كە هەموو مرۆڤێك پێویستە خۆى بۆ ئامادە بكات. كاتێك قورئان بەم شێوەیە پرسیار دەكات، وەك ئەوە وایە دڵى مرۆڤ دەخاتە لێكۆڵینەوە و بیركردنەوە، بۆ ئەوەى خۆى لە غەفڵەت بەرز بكاتەوە و بیر لە دواى خۆى بكاتەوە.

ئەی خوشك و برای موسڵمان! ئەم ڕۆژە بە دڵنیاییەوە دێت، هیچ گومانى تێدا نییە. ئەو ڕۆژەى خەڵكى تێیدا بە دوو كۆمەڵ دابەش دەبن: كۆمەڵێك لە بەهەشت و نازو نیعمەتەكانى، و كۆمەڵێكیش لە دۆزەخ و ئازارەكانى. جا ئەی مرۆڤ! ئایا خۆت ئامادە كردووە بۆ ئەو ڕۆژە؟ ئایا بیر لەو كردووەتەوە كە چۆن لە بەرامبەر پەروەردگارت ڕاوەستیت؟

با ئەم ئایەتە پیرۆزە هۆشیارمان بكاتەوە و وامان لێبكات كە هەمیشە لە بیرى ئەو ڕۆژە بین و كردارەكانمان لەسەر ڕەزامەندى خوا جێگیر بكەین، بۆ ئەوەى لەو ڕۆژەدا سەربكەوتن و خۆشبەختى بەدەست بهێنین.