Suuratu Aal-Imran — Aaya 15

1. Sarɗiiji kelme ɗe faamugol waɗi:

• أَؤُنَبِّئُكُم: Mi yecci on kabaaru?
• بِخَيْرٍ مِّن ذَٰلِكُمْ: ko ɓuri ɗum moƴƴude.
• اتَّقَوْا: ɓen hulirɓe Alla, ɓen jogitiiɓe kulol Alla.
• جَنَّاتٌ: aljannaaji, ngesaaji ɗi leɗɗe e cuuɗi keewi.
• تَجْرِي مِن تَحْتِهَا الْأَنْهَارُ: canɗi no ila e les maɓɓe.
• خَالِدِينَ فِيهَا: ko ɓe duumotooɓe ton, maayde alaa ton.
• أَزْوَاجٌ مُّطَهَّرَةٌ: rewɓe laɓɓinaaɓe immorde e kala ko soɓi, e nder tagu e nder jikkuuji.
• رِضْوَانٌ مِّنَ اللَّهِ: weluɗam e yarlitaare immorde e Alla.
• بَصِيرٌ بِالْعِبَادِ: Alla no yi'oowo jeyaaɓe Makko ɓen, huunde suuɗaaki Mo.

1. Firo aaya nden:

Alla no wi'a Nulaaɗo Makko on: "Mi yecci on kabaaru ɓurndo moƴƴude e ko ɓen yimɓe weltortoo kon e nguurndam aduna ɗam: jawdi, ɓiɓɓe, e neemaaji goɗɗi?" Ko ɓen jogitiiɓe kulol Alla, ɓen waɗɓe ko Alla yamiri ɓe, ɓen woɗɗitii ko Alla haɗi ɓe, hino woodani ɓe ka Joomi maɓɓe aljannaaji ɗi canɗi ilata e les cuuɗi maɓɓe e leɗɗe maɓɓe. Ko ɓe duumotooɓe ton poomaa, maayde e halkere heɓataa ɓe. Hino woodani ɓe ton kadi rewɓe laɓɓinaaɓe immorde e kala soɓre e nder tagu maɓɓe e nder jikkuuji maɓɓe. Ɓuri ɗum fow mawnude: ɓe heɓay yarlitaare e weluɗam immorde e Alla, ɗam jippoto e maɓɓe, Alla tikkataa ɓe poomaa. Alla no yi'oowo jeyaaɓe Makko ɓen, huunde suuɗaaki Mo e golle maɓɓe, O yoɓitoyay ɓe e dow ɗum: O yoɓay moƴƴuɗo moƴƴere, O leptoyay bonnuɗo bone.

1. Nafaaji ɗi aaya nden waajotoo:

• Aaya nden no nodda en yo ndewe ɗum ɓuri moƴƴude: nguurndam poomaaɗam ka Alla, ɓuri neemaaji aduna ɗi re'ataa, ɗi lannataa.
• Hino holli wonnde kulol Alla (taqwa) woni laawol heɓugol aljanna; kala jogitiiɗo kulol Alla no woodani mo kabaaru welɗo.
• Hino newna ɓerɗe: nder aljanna alaa maayde, alaa suno, alaa tampere; ko nguurndam poomaaɗam haa abada.
• Hino holli teddungal rewɓe aljanna: ɓe laɓɓinaaɓe e kala soɓre e nder ɓanndu e nder jikkuuji, ɗum ko huunde ɓernde yimɓe fow weltoo.
• Ɓuri mawnude e neemaaji aljanna: yarlitaare Alla, ɗum ko neema ɓurɗo mawnude, ɓurɗo welde e ɓernde gomɗinɗo.
• Hino rentina en wonnde Alla no yi'oowo golle men fow, huunde suuɗaaki Mo, ndeen yo men ɗaɓɓu weluɗam Makko e golle moƴƴe.
• Aaya nden no ƴellita yiɗugol diina Lislaamu e Alqur'aana: sabu ko Alla fodani kon gomɗinɓe ɓen ko ɓuri kala ko aade waawi eɓɓude e hakkille mum.