سورت بقره — آیت 156

د کلمو معناګانې:

• أَصَابَتْهُم مُّصِيبَةٌ: دوی ته کوم مصیبت یا تکلیف ورسېږي.
• إِنَّا لِلَّهِ: بېشکه مونږ د الله (مالک) یو.
• وَإِنَّا إِلَيْهِ رَاجِعُونَ: او بېشکه مونږ به هغه ته بېرته ورګرځو.

د آیت تفسیر:

دا آیت د هغو صبر کوونکو بندګانو ستاینه کوي چې کله دوی ته کوم مصیبت ورسېږي — لکه د مال، روغتیا، اولاد یا بل څه له لاسه ورکول — نو دوی په بشپړ رضا او تسلیمۍ سره وايي: "بېشکه مونږ د الله تعالی ملکیت یو، هغه زمونږ مالک دی او په خپل حکمت سره زمونږ په چارو کې هر څه کوي، او بېشکه مونږ به هغه ته بېرته ورګرځو." دوی په دې خبرو سره دا اقرار کوي چې دوی د الله تعالی بنده ګان دي، هغه یې پیدا کړي او په مختلفو نعمتونو یې برخمن کړي، او د دوی ټول چارې د هغه په لاس کې دي. دوی په دې پوهېږي چې مرګ به راشي او بیا به د قیامت په ورځ د حساب او جزا لپاره هغه ته ورستانه شي. دا خبره د دوی د زړه تسلیت او د صبر سبب ګرځي، ځکه چې دوی پوهېږي چې هر څه د الله له اذن پرته نه پیښېږي او هر څه به هغه ته ورګرځي.

فايدې:

• دا آیت مونږ ته زده کوي چې په مصیبتونو کې باید صبر او رضا ولرو، ځکه چې هر څه د الله له حکم سره پیښېږي.
• د دې خبرې اقرار چې "مونږ د الله یو او هغه ته به ورګرځو" د مومن زړه ته سکون او ډاډ ورکوي او د نا امیدۍ مخه نیسي.
• دا آیت مونږ ته د آخرت یادونه کوي او دا چې دا دنیا تلپاتې نه ده، نو باید په مصیبتونو کې له صبر او توکل څخه کار واخلو.
• دا خبره د بندګي او عبودیت اصل دی — چې بنده په هر حالت کې د الله تعالی تابع وي، په خوشحالۍ کې شکر وباسي او په مصیبت کې صبر وکړي.