سورت عنکبوت — آیت 11

د کلمو معناګانې:

• الْمُنَافِقِينَ: هغه کسان چې په ظاهر کې ایمان ښکاره کوي، خو په باطل کې کفر پټوي.

تفسیر:

الله تعالی به خامخا هغه کسان ښکاره او څرګند کړي چې په رښتیني توګه یې پر الله او د هغه پر رسول ایمان راوړی او د هغه پر احکامو یې عمل کړی دی. همدارنګه به منافقین هم ښکاره کړي، هغه کسان چې په ظاهر کې ایمان ښکاره کوي خو په باطل کې کفر پټوي. دا څرګندونه د ازموینې او مصیبتونو په وخت کې کېږي، ځکه چې کله ازموینه راشي، نو مومن په خپل ایمان ټینګ پاتې کېږي او منافق له ایمانه ګرځي او خپل حقیقت ښکاره کوي. په دې توګه الله تعالی د هر یوه حقیقت د خلکو په وړاندې ښکاره کوي، ترڅو مومن له منافق څخه بېل شي.

فايدې:

• دا چې الله تعالی د هر چا په پټو خبرو او نیتونو پوهېږي، او په ازموینو سره یې ښکاره کوي، نو مومن باید په ایمان کې ثابت قدم وي او د الله له ازموینو نه ډارېدونکی وي.
• منافقین که څه هم په ظاهر کې د مسلمانانو په څېر ښکاري، خو الله تعالی به د دوی حقیقت په دنیا کې هم ښکاره کړي او په آخرت کې به یې سزا ورکړي.
• دا آیت مومنانو ته تسلیت ورکوي چې که دوی په مصیبتونو کې وازمویل شي، نو دا د دوی د ایمان د څرګندولو لپاره دی، او دوی باید صبر وکړي.