سورت اعراف — آیت 194

د کلمو معناګانې:

• تَدْعُونَ: تاسو يې عبادت كوئ او بلئ.
• مِن دُونِ اللهِ: له الله پرته نور معبودان (بتان).
• عِبَادٌ: بنده ګان، مملوكان.
• أَمْثَالُكُمْ: ستاسو په شان (مخلوق او مملوک).
• فَلْيَسْتَجِيبُوا لَكُمْ: نو دې ستاسو غوښتنه قبوله کړي او ځواب دې درکړي.
• إِن كُنتُمْ صَادِقِينَ: که تاسو په خپل دعوا کې رښتيني ياست.

تفسیر:

اى مشركانو! هغه معبودان چې تاسو يې له الله پرته عبادت كوئ، د الله تعالى مملوكان او بنده ګان دي، لکه څنګه چې تاسو د الله بنده ګان ياست. هغوى ستاسو په شان مخلوق دي، خو تاسو تر هغوى غوره ياست؛ ځكه تاسو ژوندي ياست، اورئ، وينئ او خپلې خبرې كوئ، خو ستاسو معبودان (بتان) بې جانې او بې اختياره دي. نو كه تاسو په خپله دعوا كې رښتيني ياست چې دا بتان ستاسو لپاره ګټه يا ضرر لري، نو هغوى راوبلئ او له هغوى څخه وغواړئ چې ستاسو غوښتنه قبوله كړي او تاسو ته ځواب دركړي. كه هغوى تاسو ته ځواب وركړى او ستاسو حاجت يې پوره كړى، نو ستاسو دعوا سمه ده؛ خو كه نه شي كولى، نو دا به ښكاره ثبوت وي چې تاسو په الله باندې لوى دروغ تړئ او ستاسو عبادت باطل دى.

فايدې:

1. دا آيت د توحيد او د شرك د بطلان لپاره يو روښانه دليل دى؛ ځكه چې معبود بايد د عبادت وړ وي، نه يو داسې مخلوق چې بې اختياره وي.
2. د عقل او منطق بلنه: الله تعالى مشركانو ته وايي چې خپل معبودان راوبلئ او وګورئ چې آيا دوى ځواب دركولاى شي؟ دا د اسلام د حقانيت يو قوي منطقي دليل دى.
3. د الله تعالى رحمت او فضل ښكاري چې هغه خپل بنده ګان په نرمۍ او حكمت سره د حق لوري ته رابللي دي، نه په زور او جبر.
4. دا آيت موږ ته زده كوي چې عبادت يواځې د الله لپاره دى، او هر هغه څه چې له الله پرته عبادت كيږي، بې ارزښته او بې ځوابه دي؛ نو بايد خپل ټول كارونه او عبادتونه يواځې الله ته وړاندې كړو.