سورت يونس — آیت 101

د کلمو معناګانې:

• انظُرُوا: وګورئ، په غور او فکر سره وګورئ.
• الْآيَاتُ: هغه نښې او معجزې چې د الله تعالی په قدرت او یووالي دلالت کوي.
• النُّذُرُ: وېروونکي، یعنې پېغمبران چې خلک له عذاب څخه وېروي.

تفسیر:

ای رسوله! ته د هغو مشرکانو او کافرانو ته ووایه چې له تا څخه د معجزو غوښتنه کوي: "تاسو په اسمانونو او ځمکه کې په غور او فکر سره وګورئ چې څه شیان شته." دوی به د الله تعالی د قدرت او وحدانیت ډېرې نښې او لوی دلیلونه وویني؛ لکه لمر، سپوږمۍ، ستوري، ورځ، شپه، باران، نباتات، غرونه، سمندرونه او داسې نور مخلوقات چې ټول د الله تعالی پر یووالي، قدرت او حکمت ګواهي ورکوي. خو دا نښې، معجزې او وېروونکي پېغمبران د هغو خلکو لپاره هېڅ ګټه نه لري چې د الله تعالی پر وحدانیت او د هغه پر رسالت باندې ایمان نه راوړي؛ ځکه چې دوی په خپل عناد او سرغړونې ټینګار کوي او د حق منلو ته چمتو نه دي. الله تعالی پوهېږي چې دا ډول خلک به هیڅکله ایمان نه راوړي، نو ځکه دوی ته هېڅ نښه یا معجزه ګټه نه رسوي.

فايدې:

1. دا چې د الله تعالی په مخلوقاتو کې تفکر او غور کول د ایمان پیاوړتیا سبب ګرځي؛ ځکه چې هر مخلوق د خالق د قدرت او عظمت یوه نښه ده.
2. د ایمان راوړلو لپاره د انسان زړه او اراده اړینه ده؛ که څوک د حق منلو ته چمتو نه وي، نو تر ټولو لویې معجزې به هم ورته ګټه ونه رسوي.
3. دا چې الله تعالی د خپلو بندګانو پر حال ډېر مهربان دی، ځکه چې دوی ته یې د لارښوونې لپاره دواړه لارې برابرې کړې دي: یوه د فکر او عقل له لارې او بله د پېغمبرانو د رالېږلو له لارې.
4. مسلمان باید له دې آیت څخه دا زده کړي چې د حق د منلو لپاره باید زړه خلاص او ذهن له تعصب څخه پاک وي، ترڅو د الله تعالی نښې پرې ګټه وکړي.