سورت يونس — آیت 23

د کلمو معناګانې:

• أَنجَاهُمْ: هغوئې ته له سختۍ او مصیبت څخه خلاصى وركړ.
• يَبْغُونَ: ظلم او فساد كوي، له حده تېرېږي.
• بِغَيْرِ الْحَقِّ: پرته له كوم حق او جوازه.
• بَغْيُكُمْ: ستاسو ظلم او سركشي.
• مَتَاعُ الْحَيَاةِ الدُّنْيَا: د دنيايي ژوند لنډه خوند اخیستنه.

تفسیر:

كله چې الله تعالی هغوئې ته له هغه سخت مصیبت او طوفان څخه خلاصى وركړ، چې دوي يې په كښې له الله نه مرسته غوښته، نو سمدلاسه دوي بېرته په ځمكه كښې ظلم، فساد او له حده تېرېدل پيل كړل، پرته له كوم حق او جواز.

الله تعالی دوى ته خطاب كوي: اى خلقو! ستاسو د ظلم او سركشۍ سزا او نتيجه به پر تاسو پخپله راشي، الله ته به هېڅ ضرر نه رسېږي. تاسو په دې دنيايي ژوند كښې يو لنډ مهاله خوند اخلئ، چې ژر به ختم شي، بيا به ستاسو رجوع او بېرته راتلل زمونږ طرف ته وي، نو مونږ به تاسو ته ستاسو ټول هغه عملونه وښيو چې تاسو كول، او د هغوئې په بدل كښې به تاسو ته سزا او جزا دركړو.

فايدې:

1. دا چې الله تعالی د بندګانو سره ډېر مهربان دى، چې په سختيو كښې يې دعاګانې قبلوي او خلاصى وركوي، خو انسان بيا هم ناشكري كوي او فساد ته مخه كوي.
2. ظلم او سركشي په حقيقت كښې د ظالم پر ځان بېرته ګرځي؛ الله ته هېڅ ضرر نه رسېږي، بلكې ظالم خپل ځان ته تاوان رسوي.
3. د دنيا ژوند ډېر لنډ او فاني دى، نو بايد انسان د دې لنډ خوند لپاره خپل آخرت خراب نه كړي.
4. د قيامت په ورځ به ټول عملونه ښكاره شي او الله به د هر چا سره د هغه د عملونو مطابق چلند وكړي، نو بايد هر څوك خپل عملونه سم كړي.