Surə Fatihə — Ayə 5

Mənaları:

• İyyakə – Yalnız Səni, ancaq Səni.
• Nə'büdü – İbadət edirik, itaət edirik, boyun əyirik.
• Nəstəin – Yardım diləyirik, kömək istəyirik.

Təfsir:

Ey Allahım! Biz yalnız Sənə ibadət edirik və yalnız Səndən yardım diləyirik. Bu ayə, bəndənin bütün ibadət növlərini – dua, istiğasə (kömək istəmək), qurban kəsmək, təvaf etmək və sair – yalnız Allaha məxsus etməsinin vacibliyini bildirir. Heç kəsə, heç bir məxluqa bu ibadətlərdən heç birini etmək olmaz. Bu ayə həm də qəlbləri Allahdan qeyrisinə bağlanmaq xəstəliyindən, riyadan, təkəbbürdən və özünü böyük görmək dərdindən təmizləyir. Çünki bəndə özünü aciz və ehtiyaclı görüb, hər işində yalnız Allaha güvənir və yalnız Ondan kömək diləyir. Bu ayədə ibadətin və istianənin (yardım istəməyin) yalnız Allaha aid olduğu vurğulanır və bu, tövhidin ən gözəl ifadəsidir. Ey mömin! Sən bu ayəni oxuyanda özünü bütün varlığınla Allaha təslim et, bil ki, bütün işlər Onun əlindədir və Ondan başqa heç kim sənə nə fayda, nə də zərər verə bilməz. Bu ayə sənə təvazökarlığı, Allaha bağlanmağı və yalnız Ondan ümid gözləməyi öyrədir. Nə gözəl səadətdir o kəs üçün ki, ibadətini yalnız Allaha edir və yalnız Ondan kömək diləyir! Belə bir bəndə heç vaxt zəlil olmaz, heç vaxt ümidsizliyə qapılmaz. Çünki onun dayağı, köməkçisi və himayədarı Allahdır – bütün aləmlərin Rəbbi.