Suuratu Hud — Aaya 5

1. Sifaaji konngol ɗi ngonka e nder ndee aaye:

• "يَثْنُونَ صُدُورَهُمْ": ɓe fewtira ɓerɗe maɓɓe, ɓe suuɗa ko woni e nder ɓerɗe maɓɓe.
• "لِيَسْتَخْفُوا مِنْهُ": fii yo ɓe suuɗo e Alla.
• "يَسْتَغْشُونَ ثِيَابَهُمْ": ɓe werla kadi koɗe maɓɓe e hoore maɓɓe ngam ɓe suuɗo.
• "بِذَاتِ الصُّدُورِ": ko woni e nder ɓerɗe, woni ko ɓerɗe suuɗi.

1. Firo ndee aaye:

Alla no humpita en wonde ɓee yedduɓe no fewtira ɓerɗe maɓɓe, ɓe suuɗa ko woni e nder mum en immorde e yeddugol e sikke, ɓe eɓɓa ko ɓe mbaawi fii yo ɓe suuɗo ɗum e Alla. Ɓe majjii e ganndal maɓɓe, ɓe yejjitii wonde Alla no anndi kala huunde. Hay so tawi ɓe werlii koɗe maɓɓe e hoore maɓɓe fii ɓe suuɗo, Alla no anndi ko ɓe suuɗi e nder ɓerɗe maɓɓe e ko ɓe feññini e konngol maɓɓe. Pellet, Alla ko Annduɗo ko woni e nder ɓerɗe, hay huunde suuɗaaki Mo.

1. Nafaaji ɗi ndee aaye addanta en:

• Alla no anndi kala huunde, hay ko ɓerɗe suuɗi, ndee aaye no hollira wonde Alla ɓadiiɗo e men, no nana men, no anndi men.
• Ndii aaye no waajira en yo men laɓɓin ɓerɗe men e nder men, wonde Alla no anndi ko woni e nder ɓerɗe men.
• Ndii aaye no hollira yurmeende Alla e ganndal Makko ngal timmungal, ko ɗum no newna ɓerɗe gomɗimɓe ɓen, ɓe kula Alla e nder suuɗi e feññinaandi.
• Ndii aaye no nodda en yo men tuuba e yo men ɗaɓɓu yaafuyee Alla, tawde O anndi ko men suuɗi, O jaɓata tuuba gomɗimɓe ɓen.