سوڕەتی نه‌حل — ئایه‌ت 114

واتەی وشەكان:

• حەلالاً طَیّباً: حەلالی پاك و خاوێن، ئەوەی شەرع ڕێگەی پێداوە و بۆ مرۆڤ پاك و چاكە.
• وَاشكُروا نِعمَةَ الله: سوپاسی خوای گەورە بكەن بە داننان بەو نازو نیعمەتانەوە و بەكارخستنیان له ڕێگای ڕەزامەندی خوادا.

تەفسیری ئایەتە پیرۆزەكە:

ئەی ئیمانداران! لەو ڕزق و ڕۆزییەی خوای گەورە پێی بەخشیون، بخۆن، بەڵام بە مەرجێك حەلال و پاك و خاوێن بێت؛ واتە لە ڕێگای دروست و حەلالەوە دەستتان كەوتبێت و لە جۆرە پاك و چاكەكان بێت. لەگەڵ ئەوەشدا سوپاسی خوای گەورە بكەن بەو هەموو نازو نیعمەتانەی پێی بەخشیون؛ سوپاسگوزاریش تەنها بە زمان نییە، بەڵكو دڵتان بە داننان بەو نیعمەتانەوە ئاوەدان بێت، و زمانی خۆتان بە ستایش و سوپاسی خوا بكەنەوە، و لە كردار و ژیانیشتاندا ئەو نیعمەتانە لە ڕێگای ڕەزامەندی خوای گەورەدا بەكاربهێنن، نەك لە ڕێگای نافرمانی و گوناهدا.

ئەمەش ئەوە دەگەیەنێت كە ئەو كەسەی بەڕاستی عیبادی خوای گەورە دەكات و تەنها ئەو دەپەرستێت، دەبێت گوێڕایەڵی فەرمانەكانی بێت و لەو ڕێگایانەی خوا حەرامی كردوونە دوور بكاتەوە. چونكە عیبادەت تەنها بە نوێژ و ڕۆژوو نییە، بەڵكو بریتییە لە گوێڕایەڵی تەواوی خوا لە هەموو بوارەكانی ژیاندا، لەوانەش خواردن و خواردنەوە.

ئەی موسڵمان! ئەم ئایەتە پیرۆزە فەرمانێكی ڕوونە بۆ تۆ كە لە ڕزق و ڕۆزیی حەلال و پاك بخۆیت و سوپاسگوزاری خوا بیت. بزانە كە سوپاسگوزاری نازو نیعمەتەكان، هۆكاری زیادبوونیانە، وەك خوای گەورە فەرموویەتی: ﴿لَئِن شَكَرْتُمْ لَأَزِيدَنَّكُمْ﴾. جا بە سوپاسگوزاری و بەكارخستنی نیعمەتەكان له ڕێگای ڕەزامەندی خوادا، دەروازەی ڕەحمەت و بەرەكەت بۆ ژیانت واڵا دەكەیت و لە ژێر سایەی پاراستن و یارمەتیی خوادا دەبیت.