Surja El-Buruxh — Ajet 10

Kuptimi i fjalëve:

• Fetenû: I torturuan, i sprovuan me zjarr dhe i munduan.
• El-Harîk: Zjarri që djeg fort dhe që të shkrumbon.

Tefsiri i ajetit:

Allahu i Lartësuar njofton për dënimin e rëndë që i pret ata që i torturuan besimtarët dhe besimtaret, duke i djegur në zjarr për t'i larguar nga feja e Allahut dhe nga besimi në Njëshmërinë e Tij. Ata që e bënë këtë vepër të tmerrshme dhe pastaj nuk u penduan para Allahut nga ky mëkat i madh, për ta është përgatitur dënimi i Xhehenemit në jetën tjetër, dhe përveç këtij dënimi, ata do të kenë edhe dënimin e zjarrit djegës që i përvëlon ata, si ndëshkim i drejtë për atë që u bënë besimtarëve me zjarrin në këtë botë. Ky është një paralajmërim i ashpër dhe një kërcënim serioz për këdo që mendon se mund t'i shpëtojë drejtësisë së Allahut.

Përfitimet nga ajeti:

1. Ajeti tregon madhështinë e drejtësisë së Allahut, i Cili nuk e lë asnjë vepër pa shpërblim apo ndëshkim, qoftë e mirë apo e keqe.
2. Nga ajeti kuptojmë se pendimi është dera e shpëtimit dhe se ai që pendohet para se të vijë vdekja, Allahu ia falë mëkatet, sado të mëdha qofshin ato.
3. Ajeti na mëson se durimi i besimtarëve përballë torturave dhe sprovave ka vlerë të madhe tek Allahu, dhe se ata që i durojnë këto sprova për hir të fesë së tyre, do të kenë shpërblim të madh tek Zoti i tyre.
4. Ajeti paralajmëron kundër padrejtësisë dhe tiranisë ndaj besimtarëve, duke treguar se Allahu është mbrojtësi i tyre dhe do të hakmerret për ta në Ditën e Gjykimit.
5. Nga ky ajet mësojmë se dënimi në jetën tjetër është më i rëndë dhe më i përhershëm se çdo mundim në këtë botë, prandaj duhet të kemi kujdes që të mos bëjmë vepra që na çojnë drejt tij.