სურა ალ-ჰაჯი pdf

ო, ადამიანებო! გეშინოდეთ თქვენი უფლის! უდავოდ, აღსასრულის ჟამის რყევა — უდიდესი რამაა [გონებისთვის მიუწვდომელი და ძნელად წარმოსადგენი]!

იმ დღეს, როცა იხილავთ მას, ყოველი მეძუძური ქალი დაივიწყებს ბავშვს, რომელსაც ძუძუს აძლევდა, და ყოველი მუცლადმყოფი ქალი მოიშვებს თავის ტვირთს [მშობიარობას დაიწყებს]. და შენ იხილავ ადამიანებს მთვრალებივით, თუმცა ისინი მთვრალნი არ არიან — არამედ ალლაჰის სასჯელი ძლიერია (რის გამოც მათ გონება ეკარგებათ შიშისგან).

ადამიანთა შორის არიან ისეთებიც, რომლებიც ალლაჰთან დაკავშირებით დავობენ ცოდნის გარეშე [მიაწერენ მას არარსებულს] და მიჰყვებიან ყოველ აჯანყებულ ეშმაკს [წინამძღოლებს ცდომილებისა, რომლებიც აჯანყდნენ ალლაჰის წინააღმდეგ].

წინასწარ განსაზღვრულია [ალლაჰის მიერ] მის [ეშმაკის] შესახებ, რომ ვინც აირჩევს მას ახლობლად [გაჰყვება მას], ის [ეშმაკი] აუბნევს მას გზას და მიიყვანს ჯოჯოხეთის ცეცხლის სასჯელამდე.

ო, ადამიანებო! თუ გეპარებათ ეჭვი აღდგომის შესახებ [იმაში, რომ ალლაჰი აღადგენს მკვდრებს], მაშ, იცოდეთ, რომ ნამდვილად ჩვენ შეგქმენით თქვენ [თქვენი მამა ადამი] მიწისაგან, შემდეგ კი [მისი შთამომავლობა] წვეთისგან [ნაყოფის წვეთოვანი სითხისგან], შემდეგ შედედებული სისხლისგან, შემდეგ ხორცის ნაჭრისგან — სრულად ფორმირებულის ან დაუმთავრებელი ნაყოფისგან — რათა განგიმარტოთ [ჩვენი ძალმოსილება და ადამიანის შექმნის ეტაპები]. ჩვენ [და არა ვინმე სხვა] ვდებთ [ნაყოფს] საშვილოსნოში, ვისაც გვსურს, განსაზღვრულ ვადამდე [დაბადებამდე]. შემდეგ გამოგვყავხართ დედის საშვილოსნოდან ჩვილებად. შემდეგ მიდიხართ სრულწლოვანებამდე. თქვენგან არიან ისეთები, ვინც გარდაიცვლებიან [სრულწლოვნამდე], და თქვენგან არიან ისეთებიც, ვინც იცოცხლებენ უკიდურეს სიბერემდე, ისე რომ არ დარჩებათ ცოდნა [იმისგან, რაც ადრე იცოდნენ]. და ხედავ მიწას უსიცოცხლოდ, მაგრამ როდესაც ჩვენ ვავლენთ მასზე წყალს, იგი იძვრის [იმით, რომ მასზე აღმოცენდება მცენარეები], ფუვდება და ამოიზრდება მასზე ყოველგვარი მშვენიერი [და სასარგებლო] წყვილი [მცენარეებისა].

ეს [აიათები, რომლებიც ალლაჰის ძლიერებას ეხება] მოწმობს იმაზე, რომ მხოლოდ ალლაჰია ჭეშმარიტი, და რომ მხოლოდ ის აცოცხლებს მკვდრებს, და მხოლოდ მას შესწევს ძალა ყოველივეზე.

და რომ აღსასრულის ჟამი აუცილებლად დადგება — რომელშიც არ არსებობს ეჭვი! — და რომ ალლაჰი აღადგენს მათ, ვინც საფლავებშია [გამოიყვანს მათ აღდგომისთვის, ანგარიშისა და საზღაურისთვის].

ადამიანებს შორის არის ისეთნიც [ურწმუნო], ვინც დავობს ალლაჰზე ყოველგვარი ცოდნის გარეშე, ყოველგვარი ხელმძღვანელობის გარეშე და ყოველგვარი გამანათლებელი წიგნის გარეშე [რომელშიც იქნებოდა ცხადი მტკიცებულებები].

იგი ამაყად იბრუნებს გვერდს [სიამაყისა და ქედმაღლობის გამო], რათა აცდუნოს სხვა ადამიანები ალლაჰის გზიდან. მისთვის ამ წუთისოფელში დამცირებაა, ხოლო აღდგომის დღეს ვაგემებთ მას მწველი ცეცხლის სასჯელს.

ეს [სასჯელი] იმის გამო, რაც გაამზადეს შენმა ხელებმა [ურწმუნოება და ურჩობა], და ალლაჰი არ არის უსამართლო მსახურთა მიმართ.

ადამიანთა შორის არიან ისეთებიც, ვინც ეთაყვანება ალლაჰს, მაგრამ ცვალებადი არიან. თუკი სიკეთე ეწევათ, კმაყოფილნი არიან ამით, ხოლო თუ განსაცდელი ეწევათ, უკან იხევენ. წაგებულნი არიან ამ ქვეყნადაც და იმ ქვეყნადაც და, სწორედ ეს არის აშკარა წაგება.

უხმობენ ალლაჰის გარდა იმას, რაც არც ზიანს მოუტანთ და არც სარგებელს მისცემთ. სწორედ ეს არის შორი გზააბნევა.

მოუხმობენ იმას, ვისაც ზიანი მოაქვს, და არ მოაქვს სარგებელი. უეჭველად, ცუდია ასეთი მფარველი [ცრუ ღმერთი], და უეჭველად, ცუდია ასეთი მეგობარი!

ჭეშმარიტად, ალლაჰი შეიყვანს მათ, ვინც ირწმუნეს და კეთილ საქმეს აღასრულებდნენ [სამოთხის] ბაღებში, სადაც მის ქვემოთ [სამოთხის სასახლეებსა და ხეების ქვემოთ] მიედინება მდინარეები. ჭეშმარიტად, ალლაჰი აკეთებს იმას, რასაც ინებებს.

ვინც ფიქრობს, რომ ალლაჰი არ ეხმარება [მუჰამმადს] სააქაოსა და საიქიოში, მაშინ მიაბას თოკი ზეცას, მერე გადაჭრას და შეხედოს გააბათილებს განა მისი ხრიკი იმას, რამაც გამოიწვია [ალლაჰის] რისხვა.

და ამგვარად ზეგარდმოვავლინეთ იგი [ყურანი] განმარტებულ აიათებად, და [მხოლოდ] ალლაჰი დაადგენს სწორ გზაზე იმას, ვისაც ინებებს.

ჭეშმარიტად, ისინი, რომელთაც ირწმუნეს [მორწმუნენი], ვინც იუდეველი გახდა, საბიელები [ისინი, ვინც ბუნებით მონოთეისტები არიან და არ მისდევენ განსაზღვრულ რელიგიას], ქრისტიანები, ცეცხლთაყვანისმცემლები და ისინი, რომლებმაც ალლაჰს თანაზიარი დაუდგინეს [მრავალღმერთიანები] და ალლაჰი განაცალკევებს მათ შორის აღდგომის დღეს [რათა მორწმუნენი შევიდნენ სამოთხეში, ხოლო ურწმუნონი ჯოჯოხეთში სამუდამოდ]. ჭეშმარიტად, ალლაჰი ყველაფრის მოწმეა.

ნუთუ ვერ ხედავ [ო, შუამავალო], რომ ალლაჰის წინაშე ქედს იხრიან ისინი, ვინცაა ცათა შინა და ქვეყანასა ზედა: მზე, მთვარე, ვარსკვლავები, მთები, ხეები, ცხოველები, ადამიანები. ხოლო მრავალი მათგანი [ურწმუნონი] სასჯელის ღირსია. არავინ მიაგებს პატივს იმას, ვისაც ალლაჰი დაამცირებს. ჭეშმარიტად, ალლაჰი იქმს იმას, რასაც ინებებს!

აჰა, ორი მოკამათე მხარე [მორწმუნენი და ურწმუნონი], რომლებიც კამათობენ თავიანთი ღმერთის თაობაზე იმათთვის [თითოეული მხარე ამტკიცებდა, რომ სწორედ ის იყო მართალი], რომელნიც ურწმუნონი გახდნენ, ცეცხლისაგან გამოუჭრიან ტანსაცმელს [რომელსაც ისინი ჩაიცვამენ], ხოლო თავზე მდუღარეს დაასხამენ.

მისით დაიბუგება მათი შიგნეული და კანი,

და მათთვისაა გამზადებული რკინის ხელკეტები [რომლებითაც სცემენ ანგელოზები],

ყოველთვის, როცა კი მოუნდებათ იქიდან თავის დაღწევა, დაბრუნებულ იქნებიან მასში: - იგემეთ ტანჯვა მწველი ცეცხლისა.

ჭეშმარიტად, ალლაჰი შეიყვანს იმათ, რომელთაც ირწმუნეს და სიკეთე აკეთეს, სამოთხეში, რომლის ქვემოთ მდინარეები მოედინებიან. დაიმშვენებენ იქ ოქროს სამკაულებსა და მარგალიტებს, სამოსად კი ექნებათ აბრეშუმი.

ასწავლეს მათ კეთილი სიტყვები და დააყენეს ყოვლადქებულის გზაზე [ისლამის გზაზე]!

ჭეშმარიტად, რომელნიც გახდნენ ურწმუნონი და სხვებსაც აბრკოლებდნენ ალლაჰის გზიდან [მისდამი სრული მორჩილებისგან] და წმინდა აკრძალული მეჩეთისგან [როდესაც არ შეუშვეს შუამავალი და მორწმუნენი ჰუდაიბიის წელს] რომელიც ჩვენ დავადგინეთ [მორწმუნე] ხალხისათვის თანასწორად განურჩევლად იმისა, მასში ცხოვრობენ ისინი იქ თუ მომთაბარეობენ. და ვინც მოისურვებს იქ [აკრძალულ მეჩეთში] მართალი გზისგან განდგომას უსამართლოდ, ჩვენ ვაგემოვნებთ მას მტკივნეულ სასჯელს.

და [გაიხსენე ო, შუამავალო] მივუთითეთ იბრაჰიმს სახლის [ქააბას] ადგილი [რათა აეშენებინა იგი]: «არ დამიდგინო არავინ თანაზიარად და წმინდად შეინახე ჩემი სახლი გარსშემომვლელთათვის [ვინც ტავაფს აღასრულებს], [ლოცვაში] მდგომთათვის, თაყვანისმცემელთა და მუხლმოყრილთათვის,

და აუწყე [ხმამაღლა] ხალხს [ო, იბრაჰიმ] ჰაჯის შესახებ [იმის შესახებ, რომ ის სავალდებულოა]. მოვიდნენ შენთან ფეხითა და ჩქარმავალი აქლემებით, მოვიდნენ ყოველი შორეული მხრიდან,

რათა დაესწრონ იმას, რაც სარგებელს მოუტანს მათ , და ახსენონ ალლაჰის სახელი ცნობილ დღეებში იმ პირუტყვზე, რომელიც ალლაჰმა უბოძა მათ საზრდოდ [მსხვერპლად შესაწირი პირუტყვი]. ჭამეთ თქვენ [თვითონ] და დააპურეთ გაჭირვებული ღარიბი.

მერე კი დაასრულონ მათი დანარჩენი [ჰაჯობის] რიტუალები [და შეიჭრან თმა, მოიჭრან ფრჩხილები და დატოვონ იჰრამის მდგომარეობა], უერთგულონ აღთქმას და შემოუარონ [აღასრულონ ტავაფი] უძველეს სახლს [ქააბას].

ეს არის ის, რაც ალლაჰმა დააწესა, ამიტომ პატივი ეცით მას. და ვინც პატივს სცემს ალლაჰის საზღვრებსა და აკრძალვებს, ეს მისთვის უკეთესია თავისი უფლის წინაშე. და თქვენთვის ნებადართულია პირუტყვი, გარდა იმისა, რაც თქვენთვის იკითხება (ყურანში) როგორც აკრძალული [მაგალითად, ლეში და სხვა აკრძალული საკვები]. მაშ, ერიდეთ კერპების სიბილწეს, და ერიდეთ ცრუ სიტყვებს.

იყავით ჰანიფები [ერთღმერთიანები] ალლაჰის წინაშე, არ მიაწეროთ მას თანაზიარნი და არ ეთაყვანოთ ვინმეს ალლაჰის გარდა. ხოლო ვინც ალლაჰს თანაზიარს მიუჩენს, ის ჰგავს ადამიანს, რომელიც ციდან ჩამოვარდა, შემდეგ ფრინველები იტაცებენ მას, ან ქარი შორეულ ადგილას მიაქანებს.

[ეს არის ის, რაც ბრძანა ალლაჰმა] ამგვარად. ვინც განადიდებს ალლაჰის ნიშნებს, ეს გულების ღვთისმოშიშობიდან მომდინარეობს.

თქვენთვის მათში [მსხვერპლად განკუთვნილ ცხოველებში] სარგებელია განსაზღვრულ ვადამდე [ანუ მსხვერპლშეწირვის ათ-თაშრიყის დღეებში], ხოლო შემდეგ მათი დაკვლის ადგილი არის ძველი სახლის [ქააბას] მახლობლად [ანუ მთელი წმინდა ტერიტორია].

და ყოველი [წინა] თემისთვის დავადგინეთ მსხვერპლშეწირვის ადგილი (და რიტუალი), რათა მათ ახსენონ ალლაჰის სახელი იმაზე, რა პირუტყვიც უბოძა სარჩოდ. თქვენი ღმერთი კი [ო, ადამიანნო] ერთადერთი ღმერთია. ამიტომ დაემორჩილეთ მას. ხოლო შენ [ო, შუამავალო] ახარე მორჩილთ,

რომელთაც, როცა ახსენებენ ალლაჰს, გულები შიშით ეკრთებათ, მოთმინებას იჩენენ (ალლაჰის ჯილდოს იმედით), ასრულებენ ლოცვებს, და ხარჯავენ იმიდან, რაც ჩვენ მივანიჭეთ [ალლაჰის გზაზე].

და მსხვერპლად შესაწირი ცხოველები [რომლებსაც წმინდა ტერიტორიაზე მიედენებიან] ჩვენ გავხადეთ თქვენთვის ალლაჰის ნიშნებათაგანი [რელიგიური წესთაგანი, რომლებიც მან დაადგინა]. თქვენთვის მათში სიკეთეა, ამიტომ ახსენეთ ალლაჰის სახელი მათზე [როცა დაკლავთ]. [რაც შეეხება აქლემებს, ისინი ფეხზე ბორკილ დაფებული] მდგომარე მდგომარეობაში, ხოლო როცა დაეცემიან მხარით [როცა დაკლავთ მათ], ჭამეთ მათგან, დააპურეთ თავშეკავებული [რომელიც არ ითხოვს] და მორცხვად მთხოვნელი. ასე დაგიმორჩილეთ ისინი [შესაწირი ცხოველნი], რათა მადლიერნი ყოფილიყავით.

ალლაჰამდე [მის წინაშე] არ აღწევს არც მათი [მსხვერპლშეწირული ცხოველების] ხორცი და არც მათი სისხლი, არამედ მასთან აღწევს თქვენი ღვთისმოშიშობა . ასე დაგიმორჩილათ ისინი, რათა ალლაჰი განადიდოთ იმ ხელმძღვანელობისთვის, რომლითაც მან გაჩვენათ ჭეშმარიტი გზა. ხოლო შენ [ო, შუამავალო] ახარე გულწრფელებს.

ჭეშმარიტად, ალლაჰი იცავს მორწმუნეებს! ჭეშმარიტად, ალლაჰს არ უყვარს არცერთი მოღალატე [ვინც არღვევს შეთანხმებებს და ვერ ინახავს მინდობილს] და უმადური [ვინც უარყოფს თავის უფალს, მის წიგნს, მოციქულს და მის სიკეთეებს].

ნებადართულია ბრძოლა მათთვის, ვისთანაც იბრძვიან [ანუ ნებადართულია მორწმუნეთათვის, ვის წინააღმდეგაც იბრძვიან მრავალღმერთიანნი], [ასევე იბრძვიან] რადგან ისინი დაჩაგრულნი იყვნენ. ჭეშმარიტად, ალლაჰს უეჭველად ძალუძს მათი დახმარება.

ისინი, ვინც გაძევებულნი იქნენ [მრავალღმერთიანების მიერ] საკუთარი სახლებიდან ყოველგვარი უფლების გარეშე, მხოლოდ იმის გამო, რომ თქვეს: «ჩვენი უფალი ალლაჰია». და რომ არა ალლაჰის მიერ ადამიანთა ერთი ნაწილის მეორის საშუალებით შეკავება [ანუ რომ არ დაეყენებინა ბრძოლის კანონი უსამართლობისა და სიცრუის შესაჩერებლად], დაინგრეოდა მონასტრებიც, ეკლსიებიც, სინაგოგებიც და მეჩეთებიც, რომლებშიც მრავლად იხსენიება ალლაჰის სახელი. და უეჭველად, ალლაჰი შეეწევა იმას, ვინც მას ეხმარება [მის სარწმუნოებასა და მორწმუნე მსახურებს], ჭეშმარიტად, ალლაჰი ყოვლადძლიერი, ყოვლისშემძლეა.

(ჩვენ დავპირდით ჩვენს დახმარებასა და მხარდაჭერას იმათ), რომლებიც, თუ მათ დედამიწაზე განვამტკიცებთ [მივცემთ ძალაუფლებას და უპირატესობას მათ მტრებზე], აღასრულებენ ლოცვას, გასცემენ ზაქათს, უბრძანებენ სიკეთეს და აკრძალავენ ბოროტებას. და ალლაჰს ეკუთვნის ყოველი საქმის საბოლოო გადაწყვეტა.

ხოლო თუ ისინი [შენი ხალხი] ცრუდ შეგრაცხავენ [ო, მუჰამმად], მაშინ მათ წინაც შერაცხვეს ცრუდ [თავიანთი შუამავალები] ნუჰის/ნოეს ხალხმა, ადიანელებმა [ჰუდის ხალხმა] და სამუდიანელებმა [სალიჰის ხალხმა],

და იბრაჰიმის ხალხმა და ლუტის ხალხმაც უარყვეს [თავიანთი შუამავლები],

და მადიანის მცხოვრებლებმაც [შუაიბის ხალხმა] უარყვეს [შუამავლები], და მუსაც იქნა ცრუდ შერაცხული. მე კი ვაძლევდი ურწმუნოებს ვადას [არ ვსჯიდი მათ მყისიერად], შემდეგ კი დავატეხე მათ სასჯელი. და როგორი იყო ჩემი რისხვა!

და რამდენი სოფელი [მისი მკვიდრნი] გავანადგურეთ, როცა ისინი იყვნენ ბოროტმოქმედნი [ურწმუნონი]! და აი, ისინი [ეს ქალაქები და სოფლები] [ახლა] დანგრეულნი არიან ძირფესვიანად! და რამდენი წყარო და აღმართული სასახლეა მიტოვებული [იმ სოფლების მკვიდრთა დაღუპვის გამო].

განა არ დაეხეტებოდნენ ისინი [ურწმუნო მექქელები და სხვანი] დედამიწაზე [განა არ ყოფილან იემენსა და შამში]? განა არ ჰქონდათ გულები, რომლითაც დაფიქრდებოდნენ [როცა ხედავდნენ დაღუპულ ხალხთა კვალს]? ან ყურები, რომლითაც მოუსმენდნენ [შეტყობინებებს წარსული ხალხების შესახებ, ვინც ურწმუნოება გამოიჩინა]? ნამდვილად, არ ბრმავდება თვალები, არამედ ბრმავდება გულები, რომლებიც მკერდებშია.

და ისინი [ურწმუნო ყურაიშები] გიჩქარებენ სასჯელს [ო, შუამავალო] [გეკითხებიან: «როდის დადგება ეს სასჯელი?»], მაგრამ ალლაჰი არ არღვევს თავის აღთქმას. ჭეშმარიტად, შენს უფალთან ერთი დღე არის როგორც ათასი წელი იმათგან, რასაც თქვენ ითვლით [ამ ქვეყანაზე],

და რამდენ სოფელს მივეცი ვადა [გადავუვადე სასჯელი], მაშინაც კი, როცა ისინი ბოროტმოქმედნი იყვნენ [ურწმუნოებაში ჯიუტობდნენ]! შემდეგ კი დავატეხე მათ სასჯელი, და ჩემსკენაა საბოლოო დაბრუნება.

უთხარი [ო, შუამავალო]: «ჰეი, ადამიანებო! ჭეშმარიტად, მე ვარ თქვენთვის ცხადი შემგონებელი».

რომელთაც ირწმუნეს და კეთილი საქმე აკეთეს, მათ მიენიჭებათ მიტევება და ღირსეული საზღაური.

ისინი კი, რომლებიც ცდილობდნენ ჩვენი სასწაულების [ყურანის აიათების] დაკნინებას, იქნებიან ცეცხლის მკვიდრნი.

და არ გამოგვიგზავნია შენამდე [ო, მუჰამმად] არც ერთი შუამავალი და არც ერთი მოციქული, ისე რომ, როდესაც ის კითხულობდა [ალლაჰის წიგნს], სატანას არ ჩაეგდოს მის კითხვაში (ჩაგონებები და ეჭვები), რათა ხალხი აეცდინა იმისგან, რასაც იგი კითხულობდა. მაგრამ ალლაჰი შლის იმას, რასაც სატანა აგდებს [სატანის მზაკვრობას], შემდეგ კი, ალლაჰი განამტკიცებს თავის აიათებს (ნიშნებს). და მართლაც, ალლაჰი ყოვლისმცოდნე, ბრძენია.

(ეს კი სატანისგან დამოუკიდებლად არ ხდება, არამედ ალლაჰი ამის ნებას რთავს), რათა ის, რასაც სატანა აგდებს [ჩაგონებებსა და ეჭვებს], გამოცდად აქციოს მათთვის, რომელთა გულებშიც სნეულებაა [ეჭვი და თვალთმაქცობა], და მათთვისაც, რომელთა გულები გამქვავებულია. და ჭეშმარიტად, უსამართლოები უეჭველად შორსმყოფ განხეთქილებაში არიან (ჭეშმარიტებისგან).

[ეს ხდება იმისათვის, რომ] იცოდნენ იმათ, რომელთაც ებოძათ ცოდნა, რომ იგი ჭეშმარიტებაა შენი ღმერთისაგან, ირწმუნონ მისი და დამორჩილდნენ მას მათი გულები. ჭეშმარიტად, ალლაჰი უწინამძღვრებს სწორი გზით იმათ, ვინც ირწმუნა.

ხოლო ისინი, ვინც არიან ურწმუნონი, კვლავ ეჭვში იქნებიან მის მიმართ, ვიდრე დაუდგებათ ჟამი უეცრად, ან მიეწევათ სასჯელი იმ უნაყოფო დღისა.

ძალაუფლება იმ დღეს მხოლოდ ალლაჰის იქნება, განსჯის მათ შორის. ხოლო ისინი, რომლებმაც ირწმუნეს და კეთილი საქმეები აკეთეს, იქნებიან ნეტარების (სამოთხის) ბაღებში — მარადიულ ნეტარებაში, მუდმივ სიხარულსა და სიამოვნებაში, მარად ცოცხლები და ბედნიერნი.

ხოლო რომელთაც არ ირწმუნეს და ცრუდ შერაცხეს ჩვენი სასწაულები [ყურანის აიათები], სწორედ მათ მიეგებათ დამამცირებელი სასჯელი [ჯოჯოხეთში].

ისინი, რომელნიც გადასახლდნენ ალლაჰის გზაზე [დატოვეს თავიანთი სახლები, რათა მოეპოვებინათ ალლაჰის კმაყოფილება და ეხმარებოდნენ მისი სიტყვის დამკვიდრებაში], მერე მოკლულ იქნენ ან გარდაიცვალნენ, დაასაჩუქრებს მათ ალლაჰი კეთილი სარჩოთი და, ჭეშმარიტად, ალლაჰია საუკეთესო სარჩოს მომცემი.

ის [ალლაჰი] უსათუოდ შეიყვანს მათ შესასვლელში, რომლითაც კმაყოფილნი იქნებიან და, ჭეშმარიტად, ალლაჰი ყოვლისმცოდნე, თავშეკავებულია [არ ჩქარობს დასაჯოს ისინი, ვინც არ ემორჩილება მას].

ეს ასეა [გახსოვდეთ ალლაჰის დაპირება, რომ გადასახლებულნი სამოთხეში შევლენ]! და ვინც მიუზღო (თავის მჩაგვრელს) იმგვარივე სასჯელით, როგორი სასჯელიც თავად გადაიტანა {რაც ნებადართულია შარიათით}, ხოლო ამის შემდეგ კვლავ უსამართლოდ მოექცნენ მას [მას, ვინც ჩაგვრას პასუხი გასცა], ალლაჰი აუცილებლად დაეხმარება მას [ორჯერ დაჩაგრულს]. ჭეშმარიტად, ალლაჰი უეჭველად შემწყნარებელი, მპატიებელია!

ეს [ის, რომ ალლაჰი დაეხმარება დაჩაგრულს], იმიტომაა, რომ (ალლაჰი ყოვლისშემძლეა): იგი ღამეს დღეში შეიყვანს და დღეს — ღამეში [ცვლის დღისა და ღამის ხანგრძლივობას წელიწადის დროების შესაბამისად]. და ასევე იმიტომ, რომ ალლაჰი ყოვლისმსმენი, ყოვლისმხედველია.

ეს იმის გამო, რომ ჭეშმარიტება ალლაჰია. ხოლო ის, რასაც მოუხმობენ მის გარდა სიცრუეა [ბათილია], და იმიტომ, რომ ალლაჰი უზენაესი, დიდებულია.

[ო, შუამავალო] განა ვერ ხედავ, რომ ალლაჰი გარდმოავლენს ზეციცან წყალს და მიწა მწვანდება? ჭეშმარიტად, ალლაჰი კეთილია [თავისი მონების მიმართ], ყოვლისმცოდნეა.

მისია [ყველაფერი], რაც ცათა შინაა და რაც ქვეყანასა ზედაა. და ჭეშმარიტად, ალლაჰი მდიდარი, ყოვლადქებულია.

განა ვერ ხედავ, რომ ალლაჰმა დაგიმორჩილათ თქვენ ყოველი, რაც დედამიწაზეა, და ხომალდებიც, რომლებიც დაცურავენ ზღვაში მისი ბრძანებით, და იჭერს ზეცას, რომ არ დაემხოს ის დედამიწას, მისი ნების გარეშე. ჭეშმარიტად, ალლაჰი ადამიანების მიმართ თანაგრძნობი, მოწყალეა.

ისაა ალლაჰი, ვინც გიბოძათ სიცოცხლე, შემდეგ მოგაკვდინებთ, შემდგომ ისევ გაგაცოცხლებთ. ჭეშმარიტად, ადამიანი ურწმუნოა [უარყოფს ალლაჰის ცხად სასწაულებს, რომლებიც მიუთითებს მის ძლიერებაზე].

ყოველ თემს დავუდგინეთ ღვთისმსახურების წესები და ისინი ასრულებენ ამას. და არ გეკამათონ ამ საქმეზე. მოუხმე შენი უფლისაკენ. ჭეშმარიტად, შენ [ო, მუჰამმად] სწორ გზაზე დგახარ.

და თუ შეგედავებიან [ურწმუნონი], უთხარი: «ალლაჰმა ყველაზე უკეთ იცის ის, რასაც აკეთებთ».

ალლაჰი განსჯის თქვენს შორის [მორწმუნეებსა და ურწმუნოებს შორის] აღდგომის დღეს იმას, რაზედაც ვერ თანხმდებოდით.

განა არ იცი [ო, შუამავალო], რომ ალლაჰმა იცის, ის რაც ცათა შინაა და რაც ქვეყანასა ზედაა. ჭეშმარიტად, [ყველაფერი] ჩაწერილია წიგნში [ლავჰი - მაჰფუზში]. ჭეშმარიტად, ეს ალლაჰისთვის იოლია.

ისინი ეთაყვანებიან ალლაჰის გარდა იმას, ვისთვისაც მას მტკიცებულება არ გარდმოუვლენია და არც მათ აქვთ ამის შესახებ ცოდნა. უსამართლოებს კი არ ჰყავთ დამხმარე.

და როცა მათ [მრავალღმერთიანებს] ეკითხებათ ჩვენი ნათელი აიათები [ყურანიდან], დაინახავ უარყოფას იმათ სახეზე, რომლებიც ურწმუნონი არიან. ლამისაა, თავს დაესხნენ იმას, ვინც ჩვენს აიათებს უკითხავთ. უთხარი მათ [ო, შუამავალო]: «ხომ არ მეცნობებინა თქვენთვის ამაზე უფრო საშინელი? ეს ცეცხლია! - ალლაჰმა აღუთქვა ის იმათ, ვინც არიან ურწმუნონი და რა საზიზღარია ეს თავშესაფარი».

ჰეი, ადამიანებო! მაგალითისთვისაა იგავი, მაშ მოუსმინეთ. ჭეშმარიტად, რომელთაც თქვენ მოუხმობთ, ალლაჰის გარდა, ვერ შექმნიან [ერთ] ბუზსაც კი, რომც გაერთიანდენ ამისათვის. თუ ბუზი რაიმეს მოსტაცებს მათ, ვერ წაართმევენ უკან. სუსტია ის, ვინც ითხოვს, და ისიც, ვისაც სთხოვენ.

არ აფასებენ [მრავალღმერიანები] ალლაჰს ჯეროვნად. ალლაჰი კი ყოვლადძლიერი, ძლევამოსილია.

ალლაჰმა ამოარჩია ანგელოზთაგან შუამავლები და ხალხისაგან [რომლებიც გადასცემენ ალლაჰის ზეშთაგონებას სხვა ადამიანებს]. ჭეშმარიტად, ალლაჰი ყოვლისმსმენი, ყოვლისმხედველია.

მან იცის ყველაფერი, რაც მათ წინ არის [მომავალი], და ისიც, რაც მათ უკან დარჩა [წარსული]. და მხოლოდ ალლაჰთან ბრუნდება ყველა საქმე.

ჰეი, თქვენ, რომელთაც ირწმუნეთ! მოიხარეთ (რუქუ'ში) [შეასრულეთ წელმოხრილი თაყვანისცემა ალლაჰისათვის], დაემხეთ პირქვე (სუჯუდში) [შეასრულეთ მიწიერი თაყვანისცემა ალლაჰისათვის], თაყვანი ეცით მხოლოდ თქვენს უფალს და აკეთეთ კეთილი საქმეები, რათა წარმატებას მიაღწიოთ!

და იღვაწეთ ალლაჰის გზაზე ისეთი გულმოდგინებით, როგორსაც ის იმსახურებს! მან [ალლაჰმა] აგირჩიათ თქვენ (რათა მისი სიტყვა და მისი სარწმუნოება სხვა ადამიანებამდე მიიტანოთ) და სარწმუნოებაში არ დაგაკისრათ არავითარი სიძნელე. (მიჰყევით) თქვენი მამის, იბრაჰიმის სარწმუნოებას. მან [ალლაჰმა] გიწოდათ თქვენ მუსლიმები უწინაც [წინა ზეციურ წიგნებში] და ამ წიგნშიც [ყურანში], რათა შუამავალი იყოს მოწმე თქვენზე, ხოლო თქვენ იყოთ მოწმეები ადამიანებზე [წინა თემებზე], რომ მათმა შუამავლებმა მათთანაც მიიტანეს ის, რაც ალლაჰმა გაცნობათ თავის წიგნში. მაშ, აღასრულეთ ლოცვა, გაიღეთ ზაქათი და მტკიცედ ჩაეჭიდეთ ალლაჰს [დაიცავით მისი რელიგია]! იგია თქვენი მფარველი ურწმუნოების წინააღმდეგ ბრძოლაში. და რა მშვენიერი მფარველია იგი!