Suuratu Yunus — Aaya 16

1. Maanaaji kelme ɗe ngoni haaju e faamnireede:

• تَلَوْتُهُ: janngin-mi ɗum (Alqur'aana).
• أَدْرَاكُم بِهِ: humnitanii on ɗum, anndinii on ɗum.
• لَبِثْتُ فِيكُمْ عُمُرًا: ñiiɓ-mi e mooɗon duuɓi ɗuuɗɗi.
• مِّن قَبْلِهِ: ado jippagol Alqur'aana.
• أَفَلَا تَعْقِلُونَ: e on ngalndintaa hakkillaaji mooɗon?

1. Firo Aaya nden:

Wiyaa - an Nulaaɗo -: "Sinno Alla Muuyuno, mi janngintaa-no on Alqur'aana oo, mi anndintaa-no on kadi ɗum. Ko Alla Muuyi woni waɗi ɗum, wonaa mi woni waɗɗo ɗum e yiɗde am. Gomɗii mi ñiiɓii e mooɗon duuɓi ɗuuɗɗi - ko duuɓi cappanɗe nayi - ado Alqur'aana jippagol, mi wonaano janngoowo mi wonaano winndoowo, mi ɗaɓɓiraano kadi ndee fannu walaa mi wiɗtiraano nde. E on ngalndintaa hakkillaaji mooɗon, anndee ko mi addanii on kon ko Alla ummori, wonaa e juuɗe am?".

1. Nafaaji ɗi nden Aaya ndokki:

• Aaya nden no hollira wonde Alqur'aana oo ko Alla jippini, wonaa kon ko Nulaaɗo (yo o his) waɗi e hakkille makko.
• Nulaaɗo (yo o his) ñiiɓii e yimɓe makko duuɓi ɗuuɗɗi ado Alqur'aana jippagol, o anndaano janngude o winndude, ɗum noon ko dalil ɓannginngal wonde Alqur'aana oo ko Alla ummori.
• Aaya nden no nodda yimɓe ɓen yo ɓe ngalndintu hakkillaaji maɓɓe, ɓe miijoo, ɓe faamu wonde Nulaaɗo oo wonaa fennoowo.
• Hakkille ko neema mawɗo Alla rokki neɗɗo, ko ɗum waɗi yo neɗɗo huutoro ɗum e faamugol goonga.
• Aaya nden no hollira wonde kattal fow ko e juuɗe Alla, hay e jippagol Alqur'aana e janngingol ɗum, ko Muuyde Alla woni.
• Ndii Aaya no newna ɓerɗe gomɗimɓe ɓen, no ɓeydira ɓe yananeede wonde Alqur'aana oo ko goonga ummoraade e Alla.