Surah Al-An'am — Aya 153

Ma'anar Kalmomin Ayar:

• "Sirata": Hanyata madaidaiciya.
• "Subula": Hanyoyi daban-daban na ɓata (addinan ƙarya da son zuciya).
• "Fatafarraqa bikum": Ta wargaza ku, ta raba ku.
• "Tattaqun": Ku kare kanku daga azabar Allah ta hanyar yin biyayya da nisantar saɓo.

Fassarar Ayar:

Allah ya yi wa bayinsa wasiyya cewa wannan addinin Musulunci da Manzon Allah (SAW) ya zo da shi, shi ne tafarkin Allah madaidaici wanda babu karkacewa a cikinsa. Ku bi shi, kuma kada ku bi wasu hanyoyi dabam-dabam (na ɓata, kamar saɓo da bidi'a da son zuciya), domin waɗannan hanyoyi za su raba ku, su watsar da ku daga tafarkin Allah madaidaici. Wannan umurnin da Allah ya yi muku na bin tafarki ɗaya madaidaici, shi ne wasiyyarsa a gare ku, domin ku kare kanku daga azabarsa ta hanyar yin abin da ya umarta da barin abin da ya hana.

Fannoni da Fa'idodin da ake samu daga ayar:

1. Musulunci shi ne kawai tafarkin Allah madaidaici, kuma babu wani addini da Allah ya yarda da shi face shi.
2. Dole ne mumini ya tsaya a kan tafarkin Allah ba tare da karkacewa ba, kuma ya guji duk wata hanya da ke kaiwa ga ɓata, ko ta addini, ko ta tunani, ko ta aiki.
3. Hanyoyin ɓata suna raba al'umma, suna wargaza haɗin kai, kuma suna nisantar da mutum daga gaskiya.
4. Bin tafarkin Allah madaidaici shine tushen tsira daga azaba, kuma shine babban dalilin samun taqawa da kare kai daga fushin Allah.
5. Ayar tana nuna cewa Allah mai tausayi ne ga bayinsa, yana yi musu wasiyya da abin da ke amfaninsu a duniya da lahirã.