Ат-Тарик сүрәсе — Аять 10

Сүзләрнең мәгънәләре:

• Куввә — көч, куәт, үзен якларлык дәрман.
• Насыйр — ярдәмче, булышучы, яклаучы.

Аять тәфсире:

Бу аять кыямәт көнендәге хәлне сурәтли. Ул көнне кешеләрнең эчке серләре, күңелләрендә яшергән ниятләре һәм эшләре фаш ителер, яхшысы начарыннан аерылыр. Ә инде кешегә ул көнне үзенә килгән ґәзабтан качарлык көч-куәт тә булмас, аны Аллаһ ґәзабыннан коткарырлык ярдәмчесе дә булмас. Кыямәт көнендә кешенең байлыгы, балалары, дуслары, туганары — берсе дә аңа файда бирмәс. Ул көнне кеше үзенең гамәлләре белән ялгыз калыр, һәм аңа ярдәм итүче булмас. Бу — Аллаһның кодрәте каршында кешенең бик зәгыйфь, бик мохтаҗ икәнлеген күрсәтә.

Аятьтән алынган файдалар:

• Кыямәт көнендә кешегә беркем дә ярдәм итә алмаячак, шуңа күрә бүгеннән үк Аллаһның ризалыгын эзләргә һәм Аңа гына таянырга кирәк.
• Кеше үз көченә, байлыгына яки дәрәҗәсенә ышанып, Аллаһтан башка ярдәмче юклыгын онытмаска тиеш.
• Бу аять кешене тәкәбберлектән тыеп, Аллаһ алдында тыйнаклыкка, Аның ґәзабыннан куркып, изге гамәлләр кылырга өнди.
• Кыямәт көне чынбарлыгын искә төшереп, кешене бу дөньядагы вакытлыча тормышка алданып калмаска, ә мәңгелек тормышка әзерләнергә өнди.