سورت توبه — آیت 84

د کلمو معناګانې:

• لَا تُصَلِّ عَلَىٰ أَحَدٍ مِّنْهُم مَّاتَ أَبَدًا: د دوى (منافقانو) له څخه چې څوک مړ شي، نو ته پر هغه باندې هیڅكله جنازه مه وړه.
• وَلَا تَقُمْ عَلَىٰ قَبْرِهِ: او د هغه په قبر باندې (د دفن او دعا لپاره) مه ودرېږه.
• فَاسِقُونَ: له الله او د هغه له رسول څخه بهر وتونكي، د الله د احكامو څخه سرغړونكي.

تفسیر:

اى محترمه رسوله! ته د منافقانو له څخه چې هر څوک مړ شي، نو پر هغه باندې هیڅكله جنازه مه وړه، او د هغه په قبر باندې هم مه ودرېږه چې د هغه لپاره دعا او مغفرت وغواړې. دا ځكه چې دوى له الله او د هغه له رسول سره كفر وكړ، او په داسې حال كې مړه شول چې له الله څخه بهر وتونكي او د هغه د احكامو سرغړونكي وو. دا حكم په هغه چا باندې تطبیق كېږي چې د هغه نفاق څرګند او معلوم وي، او دا د رسول الله (صلى الله عليه وسلم) لپاره یو ځانګړى حكم و، چې د هغه نه وروسته يې پر هېڅ منافق باندې جنازه نه ده وړل شوې او نه يې پر قبر باندې ولاړ دى.

فايدې:

1. د منافقانو او د هغو كسانو څخه چې د الله او د هغه د رسول سره دښمني كوي، بېزارى او لرې والى ښودل د مسلمان د ایمان یوه برخه ده.
2. دا چې د جنازې لمونځ او د قبر پر سر ولاړېدل یو داسې عمل دى چې د مړي لپاره د دعا او مغفرت معنا لري، نو دا يواځې د مسلمانانو لپاره شونى دى، نه د كافرانو او منافقانو لپاره.
3. دا آیت د مسلمانانو لپاره دا درس وركوي چې د الله په احكامو كې له چا سره تعصب او طرفداري مه كوي، او د الله د دښمنانو سره مهرباني او شفقت نه كوي.
4. د الله او د هغه د رسول اطاعت د ایمان اساس دى، او څوك چې له دې څخه بهر ووځي، هغه د الله له رحمت څخه محرومېږي.