Surah An-Najm pdf

53:1 Mianiana amin’ny kintana izay efa hilentika Aho !

53:2 Fa tsy diso lalana ny namanareo, ary tsy tafiditra anatin'ny fahadisoana.

53:3 Ary tsy miteny araka ny sitrapony izy.

53:4 Fa izany dia faminaniana tonga taminy.

53:5 Izay nampianarin’ilay hery lehibe taminy.

53:6 Manan-tsaina ; ary niseho tamin’ny endrika maha izy azy.

53:7 Raha teo amin’ny fara-vodilanitra ambony izy.

53:8 Avy eo dia nanatona sy nidina ambanimbany kokoa izy.

53:9 Hatreo amin’izay tratran’ny zana-tsipika indroa, na akaiky kokoa noho izany.

53:10 Nambarany tamin’ny mpanompony izay nambarany.

53:11 Tsy nandainga tamin’izay hitany ny fo.

53:12 Moa toherinareo amin’izay hitany va izy ?

53:13 Efa hitany tamin’ny fidinana hafa koa anefa izy.

53:14 Teo akaikin'ny Sidratoul-mountaha.

53:15 Eo akaikiny no misy ny zaridainan’ny fialofana (mandrakizay).

53:16 Tamin’ny fotoana izay nahasarona ny hazo na mokonazy, tamin’izay nandrakotra azy.

53:17 Tsy nivily ny fahitany na nihoatra ny tokony ho izy.

53:18 Hitany tokoa ny sasany tamin’ireo fahagagana lehibe avy amin’ny Tompony.

53:19 Ka ahoana àry ny fahitanareo ny sampy Làt sy Ozzà?

53:20 Ary koa i Manat, ilay sampy fahatelo hafa ?

53:21 Ho anareo va ny zazalahy, fa ho Azy kosa ny zazavavy ?

53:22 Tena fizarana vilana kosa izany !

53:23 Anarana noforoninareo ihany izany, ianareo sy ny razam-benareo, fa tsy nampidina porofo mikasika izany I Allah. Tsy manaraka afa-tsy ny fiheverany sy ny sitrapony ihany izy ireo, nefa efa tonga tamin’izy ireo ny tari-dalana avy amin’ny Tompony .

53:24 Sa efa nahazo izay rehetra niriny kosa ny olombelona.

53:25 An’I Allah ny fiainana any ankoatra, sy ny fiainana eto an-tany.

53:26 Ary firifiry ireo anjely any an-danitra, no tsy hahazoana tombotsoa mihitsy ny fanelanelanan’izy ireo, raha tsy aorian’ny alalana avy amin’I Allah, ho an’izay tiany sy ankasitrahany.

53:27 Ireo izay tsy mino ny any ankoatra, dia manome anaram-behivavy ireo Anjely.

53:28 Nefa tsy manana fahalalana avy amin’izany izy ireo, fa izay fiheverany ihany no arahiny, nefa tsy misy ilaina ny fiheverana eo anatrehan’ny fahamarinana.

53:29 Koa misintaha ary ianao amin’izay tsy miraharaha ny fampahatsiarovana avy Aminy, ka tsy maniry afa-tsy ny fiainana ankehitriny.

53:30 Izany ihany no takatry ny fahalalany. Fantatry ny Tomponao tokoa izay mihataka amin’ny lalany, ary fantany tanteraka ihany koa izay voatari-dalana.

53:31 An'I Allah izay rehetra any an-danitra sy ety an-tany, mba hamaliany izay rehetra nanao ny ratsy, araka izay nataony, fahamaliany ny soa kosa izay nanao ny tsara, amin’izay tsara indrindra.

53:32 Ireo izay mihataka ny fahotana lehibe, sy ny fahavetavetana, ka tsy manao afa-tsy ny hadisoana madinika, dia hamafisina, fa lehibe tokoa ny fahamelan-kelokan'ny Tomponao. Izy no tena mahafantatra anareo, rehefa nahary anareo avy amin’ny tany Izy, sy fony ianareo mbola zazarano tao an-kibon-dreninareo. Aza manadio tena ianareo, fa Izy no tena mahalala izay tena vonto-pinoana.

53:33 Hitanao va ilay nanome lamosina ?

53:34 Nanome kely, avy eo, nitsahatra tsy nanome ?

53:35 Manana fahalalana ny zava-miafina va izy ka hitany ?

53:36 Tsy nambara taminy va izay tao anatin’ny takelak’i Mosesy.

53:37 Sy ny an’i Abrahama izay nitazona tanteraka ?

53:38 Fa tsy hisy hizaka ny enta-mavesatry ny hafa,

53:39 Ary raha ny marina dia arakaraka izay fiezahan'ny olombelona ihany no azony.

53:40 Ary hamafisina, fa ny fiezahany dia haseho azy.

53:41 Avy eo, dia homena valisoa feno tanteraka izy.

53:42 Ary hamafisina , fa ho any amin’ny Tomponao avokoa ny zavatra rehetra.

53:43 Fa Izy no hampihomehy sy hampitomany.

53:44 Ary Izy no mamono sy mamelona.

53:45 Izy no nahary ireo mpivady tsirairay , lahy sy vavy.

53:46 Avy amin’ny tsirairay rehefa mivoaka.

53:47 Fa andraikiny ny fahariana faharoa.

53:48 Ary Izy no mampanan-karena sy mampahazo.

53:49 Izy no Tompon’ny kintana Sirius.

53:50 Izy no nandringana ireo Aad taloha.

53:51 Toy izany koa ireo Tamod, ka nataony tsy nisy tavela.

53:52 Sy ny vahoakan’i Noa taloha, tena olon’ny tsy fahamarinana sy mpihoa-pefy tokoa izy ireo.

53:53 Naringany toy izany koa ireo tanàna nivadika.

53:54 ka nosaronany tamin’izay nanaronany azy.

53:55 Inona amin’ireo fahasoavan’ny Tomponao àry no mampisalasala anao ?

53:56 Indro mpampitandrina, mitovy amin’ireo mpampitandrina taloha.

53:57 Manantona ilay akaiky (ilay Ora Fitsarana).

53:58 Tsy misy ankoatra an’I Allah no afaka hampiseho izany.

53:59 Moa mahagaga anareo va io lahateny io (koroany) ?

53:60 Ka mihomehy amin’izany ianareo fa tsy mba mitomany akory ?

53:61 Variana tanteraka amin’ny fialambolinareo.

53:62 Koa miankohofa amin’I Allah àry ianareo, ka tompoy Izy.