Сура Ан-Наджм pdf

53:1 Седах /дуй боу Ас/, иза /лакхара/ охьабужуш:

53:2 некъах д1а ца тили шун накъост (Мухьаммад-пайхамар)‚ гал а ца вели.

53:3 Цо ца дуьйцу шегара /шена дезарг/-

53:4 иза деккъа ваьхьий ду, цуьнга дIахоуьйтуш долу /Дала/.

53:5 Иза (Мухьаммад-пайхамар) Iамийна ша ницкъаца чIогIа долчо ,

53:6 Ша хазачу куьцехь долчо. Иза (Джабраил-малик) нийсса дIахIоьттира .

53:7 Ша лекхачу анахь долуш.

53:8 ТIаккха иза гергахилира /Мухьаммад-пайхамарна адамийн куьцехь/‚ кхин тIех гергадера /элчане ваьхьий дахьаш/.

53:9 Иза хилира /гергахь/ шина Iадан барамехь‚ я кхин а герга.

53:10 Иштта ваьхьий дахьийтира Цо Шен лега‚ Ша дахьийтинарг.

53:11 Харц ца лийра дог /пайхамарна/ цунна гинчух .

53:12 Ткъа аш къуйсу цуьнца (пайхамарца) цунна гиначуьнца?

53:13 Цунна (Мухьаммад- пайхамарна) иза гира кхин а охьадоссарехь (кхин цкъа дуссуш).

53:14 Чаккхенан /дозанан / лотос- диттана гергахь.

53:15 Цунна гергахь ю /ялсаманин/ чугIойлан беш.

53:16 /Мухьаммад-пайхамарна гира и дитт ша тамаше/ х1умнаша хьулдечу хенахь.

53:17 ДIа ца тилина /пайхамаран/ бIаьрса‚ дозанах ца даьлла .

53:18 Цунна гира шен Кхиош-Кхобучун даккхийчу аятех /аяташ/ .

53:19 Аш дийцал суна Ал-латах а‚ Ал-Iуззах а,

53:20 кхин кхозлагIа Манатах а. /Буй церан Делан санна ницкъ?/

53:21 Ткъа шуна божабераш ду‚ Цунна зудабераш ду?

53:22 Иза декъаза дāкъа ма ду.

53:23 Уьш еккъа цIерш ю, аша а‚ шун дайша а техкина йолу. Дала цхьа а бакъо ца йоссийна /царах лаьцна/. Уьш тIаьхьахIуьттуш ма бу деккъа шайн мотталуш долчунна а‚ /шайн/ дегнашна дезачунна а. Цаьрга ма беана шайн Кхиош-Кхобучуьнгара нийса некъ.

53:24 Я адамна шена дезарг ду?

53:25 Делан ю тIаьхьарниг (эхарт) а, хьалхарниг (дуьне) а.

53:26 Маса малик ду стигалшкахь, шайн шапаIаташа хIумма а кIелхьардохур доцуш, Дала Шена луучунна пурба делчий бен‚ Иза резахилчий бен!

53:27 Баккъалла а, эхартах цатешачара йоккху маликех зударийн цIе .

53:28 Цуьнца цхьа а Iилма ма дац церан. Уьш тIаьхьахIуьттуш ма бу деккъа моттарна. Ткъа моттаро хIумма а хуьйцур дац бакъдолчух.

53:29 Хьо дIаверза /х1ай элча/ Тхан хьехамах юхаваьллачух‚ дуьненан дахар бен шена ца дезаш волчух.

53:30 Иза ду церан Iилманах кхиаран дарж. Баккъалла а, хьо Кхиош-Кхобург (хьан Дела) – Иза ву дика вевзаш Шен некъах тилавелларг а, Иза ву дика вевзаш ша нисвелларг а.

53:31 Делан ду стигалшкахь мел дерг а‚ лаьттахь мел дерг Цо бекхам бархьама вон хиллачарна цара диначуьнца‚ Цо бекхам бан дика диначарна уггар дикачуьнца.

53:32 Ишттанаш бу уьш, шаьш генабовлуш къинойх даккхийчарах а‚ боьхучух а, кегийнаш бен /ца долуьйтуш шайгара/. Баккъалла а, хьо Кхиош-Кхобург Шегахь шортта гечдар долуш ву-кх. Иза дика хууш ву шух дерг шу Ша лаьттах кхуллучу хенахь а‚ шу шайн нанойн кийрахь хIу долчу хенахь а. Шаьш цIан ма де – Цунна дика вевзаш ву /Делах/ кхоьруш верг!

53:33 Дийцал /хIай Мухьаммад/ цу /ийманах/ юхаваьллачух .

53:34 КIеззиг /сагIа/ делира цо‚ тIаккха юхаозавелира /сагIа лучух/.

53:35 Ткъа цуьнгахь ду те къайленан Iилма, цунна ган а гуш?

53:36 Я цуьнга ца дийцина те Мусан хьарчоршкахь (Таврата чохь) дерг?

53:37 ИбрахIиман а /хьарчоршкахь дерг/‚ ша кхочушдина хилла волчу /шена Дала тIедихкинарш/

53:38 /Цуьнга ца дийцина те/: хьур бац хьочо кхечун мохь аьлла‚

53:39 дац адамна ша къахьегнарг бен‚ аьлла‚

53:40 цуьнан къахьегар тIаьхьа гур ду аьлла‚

53:41 тIаьхьа хир бу цунна сов нийса болу бекхам аьлла‚

53:42 хьо Кхиош-Кхобучуьнга ю /хьан/ чаккхе аьлла‚

53:43 баккъалла а, Иза ву воьлуьйтург а‚ /Иза ву/ воьлхуьйтург аьлла,

53:44 баккъалла а, Иза ву волуьйтург а‚ /Иза ву/ денвийриг аьлла‚

53:45 баккъалла а, Цо кхоьллина шишша – боьрша а‚ стен а аьлла

53:46 /цхьана/ тIадамах, иза кхетча /ненан кийрахь долчу беран цIа чу/‚ аьлла,

53:47 Цунна тIехь кхин цхьа кхоллар (белларш денбар) ду аьлла,

53:48 баккъалла а, Иза ву аьлла‚ (адам) хьоле деш верг а‚ /цуьнга рицкъаца/ кхачо йойтуш верг а ,

53:49 баккъалла а, Иза ву Сириус цIе йолу седа Кхобург (цуьнан Дела) аьлла,

53:50 баккъалла а, Иза ву аьлла, Ша хIаллакбинарг хьалхалера Iадаш а,

53:51 Самудаш а‚ /цхьа а/ буха ца витира /царах/‚

53:52 Нухьан къам а хьалха. Баккъалла а, уьш хилира вунō зуламе а‚ вунō дозанех бевлла а.

53:53 Муътафикат а, хьалаяьккхина, охьатуьйхира Цо.

53:54 Д1ахьулйира иза (Лут1ан къоман юрт) ша д1ахьулйечо (даккхий т1улгаш дийгира стиглара).

53:55 Хьан Кхиош-Кхобучун муьлхачу ниIматаца къуьйсу ахь /хIай адам/?

53:56 ХIара (Мухьаммад-пайхамар) кхерамча ву, хьалхалерчу кхерамчех волуш.

53:57 ТIекхечи цIеххьана тIекхочург (къематде).

53:58 Ма вац цунна Дела воцург (и царна ца дойтуш) сацон верг.

53:59 Ткъа цу хабарх а цецдовлу шу?

53:60 Доьлу шу? Ца доьлху шу?!

53:61 Ма г1опал ду шу (шайга дуьйцург тидаме ца оьцуш, хан эрна йойуш)!

53:62 Аш Далла сужуд де‚ /Цунна/ Iибадат а де!