سوڕەتی به‌قهره — ئایه‌ت 155

1. مانای وشەکان:

• وَلَنَبْلُوَنَّكُم: بێگومان تاقیتان دەکەینەوە و تاقی کردنەوەتان بۆ دەکەین.
• الْخَوْفِ: ترس، بەتایبەتی ترس لە دوژمن.
• الْجُوعِ: برسێتی، کەمبوونی خواردن و خۆراک.
• نَقْصٍ: کەمبوونەوە، کەمکردنەوە.
• الْأَمْوَالِ: سەروەت و ماڵ و پارە.
• الْأَنفُسِ: گیانەکان، مرۆڤەکان بە مردن یان شەهیدبوون.
• الثَّمَرَاتِ: بەرهەم و میوە و دانەوێڵە.
• الصَّابِرِينَ: ئارامگران، ئەوانەی خۆڕاگرن لەسەر ناخۆشی و بەڵا.

1. تەفسیری ئایەت:

خوای گەورە بە بەندەکانی دەفەرموێت کە بێگومان تاقیتان دەکەینەوە بە جۆرەها ناخۆشی و بەڵا، بەڵام هەمووی بە شێوەیەکی کەم و سنوورداریش، نەک بە تەواوی و بێ سنوور. ئەم تاقیکردنەوەیە بە چەند شێوەیەک دێت: ترس لە دوژمن و ناخۆشی دەرەکی، برسێتی و کەمبوونی خۆراک، کەمبوونەوەی ماڵ و سەروەت بە هۆی زەرەر و لەدەستچوون یان سەختی بەدەستهێنانی، مردنی کەسانی خۆشەویست و گیانلەدەستدان لە ڕێگای خوا یان بە نەخۆشی و بەڵا، هەروەها کەمبوونەوەی بەرهەم و میوە و دانەوێڵە بە هۆی وشکەساڵی یان تێکچوونی بەرهەم.

ئەم تاقیکردنەوەیە بۆ ئەوەیە کە دەربکەوێت کێ لە ئێمە گوێڕایەڵ و کێ سەرکەشە، نەک ئەوەی خوا شتێک بزانێت کە پێشتر نەیزانیوە، چونکە خوا بە هەموو شتێک زانایە. دوای ئەم باسە، خوای گەورە پێغەمبەری خۆشەویست (د.خ) ڕادەسپێرێت و دەفەرموێت: مژدە بدە بە ئارامگران و خۆڕاگران، ئەوانەی لەسەر ئەم بەڵا و ناخۆشیانە دەئارامگرن و دڵیان بە خوا دەبەستن، مژدەیان بدەرێ بەو شتانەی کە دڵیان خۆش دەکات و شادیان دەکاتەوە لە ژیانی دونیادا بە سەرکەوتن و ئارامی، و لە قیامەتیشدا بە پلە و پایەی بەرز و پاداشتی چاک.

ئەم ئایەتە پیرۆزە فێرمان دەکات کە ژیانی دونیــا هەمیشە بێ ناخۆشی و تاقیکردنەوە نییە، بەڵکو خوا تاقیمان دەکاتەوە بۆ ئەوەی ئارامگری و باوەڕی ڕاستەقینەمان دەربخەین. ئەوانەی کە لەسەر بەڵا و ناخۆشی ئارام دەگرن و شکور دەکەن، خوا پاداشتی گەورەیان بۆ ئامادە کردووە. با هەموومان هەوڵ بدەین لە کاتی تاقیکردنەوەدا دڵ و دەروونمان بە خوا ببەستین و ئارامگر بین، چونکە ئارامگری کلیلی سەرکەوتن و ڕزگارییە لە دونیــا و قیامەتدا.