Sura Az-Zukhruf — Aya 52

Maana ya Maneno:

• "Mahinun": Mnyonge, dhaifu, asiye na heshima wala utukufu.
• "La yakadu yubinu": Karibu asieleweke katika kusema; ana utata wa lugha na hawezi kueleza vizuri.

Tafsiri ya Aya:

Firauni alisema kwa kiburi na dhulma: "Kwani mimi si bora kuliko huyu Musa? Yeye ni mtu mnyonge, dhaifu, asiye na cheo wala utukufu, na pia hawezi kuongea vizuri; ana utata wa lugha na karibu asieleweke anaposema. Basi vipi mtu kama huyu anaweza kuwa nabii au kuleta ujumbe wowote?" Maneno haya yalitokana na kiburi chake na kukataa kwao haki, na pia alikuwa anajaribu kuwapotosha watu na kuwazuia kuamini Uislamu na kufuata njia ya Mwenyezi Mungu. Alijidhania kuwa yeye ni bora kwa sababu ya utajiri wake, nguvu zake, na ufalme wake, bila kujua kwamba utukufu wa kweli ni kwa kumtii Mwenyezi Mungu, si kwa mali wala cheo.

Faida Zinazotokana na Aya:

1. Kiburi na kujiona bora ni tabia ya maadui wa dini, na ndicho kilichomfanya Firauni amkane Musa, hivyo ni lazima mwenye Imani ajiepushe na kiburi na kujiona bora kuliko wengine.
2. Utukufu wa kweli si kwa mali, cheo, au uwezo wa kuongea, bali kwa kumcha Mwenyezi Mungu na kufuata haki. Mwenyezi Mungu anawateua Mitume wake miongoni mwa watu walio bora kimaadili, si kwa vigezo vya kimwili.
3. Aya inafundisha kwamba si kila mtu mwenye utajiri au mamlaka ndiye bora; wala si kila mwenye udhaifu wa kimwili au wa lugha ndiye dhaifu. Mwenyezi Mungu humpa hekima na utume anaye mwenda.
4. Inatukumbusha kumshukuru Mwenyezi Mungu kwa neema ya kueleweka na kuongea vizuri, na kutumia neema hiyo katika kuitangaza haki na kuwaelekeza watu kwenye njia iliyo nyooka.