Surah Al-Ahqaf — Aya 15

Ma'anar Kalmomin:

• أَوْزِعْنِي: Ka sa ni in himmatu da kuma a sa ni in iya.
• أَشُدَّهُ: Cikakken ƙarfin jiki da hankali.
• فِصَالُهُ: Yaye shi daga nono.

Tafsirin Ayar:

Mun yi wa ɗan Adam wasiyya mai ƙarfi da umarni cewa ya kyautata wa iyayensa biyu, ta hanyar yin musu biyayya da alheri a rayuwarsu da kuma bayan mutuwarsu, gwargwadon abin da ba ya saba wa Shari'a. Musamman mahaifiyarsa, domin ita ce ta ɗauke shi cikin ciki da wahala da shan wuya, kuma ta haife shi da wahala da shan wuya. Kuma tsawon lokacin ciki da kuma yaye shi daga nono duka sun kai watanni talatin. Wannan ambaton wahalhalu da mahaifiya ke sha, ba uba ba, yana nuna cewa hakkin mahaifiya a kan ɗanta ya fi na uba girma.

Har zuwa lokacin da mutum ya kai cikakken ƙarfinsa na jiki da hankali, kuma ya kai shekaru arba'in, sai ya ce: "Ya Ubangijina! Ka sa ni in iya godiya da ni'momin da ka yi mini ni da iyayena, kuma ka sa ni in yi aikin ƙwarai wanda kake yarda da shi, kuma ka kyautata mini zuriyata. Lallai ni na tuba gare Ka daga dukkan zunubaina, kuma ina cikin masu sallama wa umarninka da masu bin dokokin ka."

Fa'idodin da ake samu daga wannan ayar:

1. Nuna girman hakkin iyaye, musamman mahaifiya, a kan 'ya'yansu, kuma cewa kyautata musu wajibi ne a kan kowane Musulmi.
2. Ƙarfafa wa mutum yin addu'a ga Ubangijinsa da neman taimakonSa a kan yin ayyukan alheri da kuma kyautata zuriya.
3. Nuna cewa tuba gare Allah da sallama wa umarninSa su ne hanyar samun nasara da yardar Allah.
4. Ƙarfafa wa mutum yin godiya ga Allah a kan ni'imominSa, musamman a lokacin da ya kai shekarun balaga da cikakken hankali.