Аль-Араф сүрәсе — Аять 23

Сүзләрнең мәгънәләре:

• ظَلَمْنَا أَنفُسَنَا — үзебезгә золым кылдык, ягъни үзебезгә зарар китердек.
• تَغْفِرْ لَنَا — безне ярлыкарсың, гөнаһларыбызны гафу итәрсең.
• تَرْحَمْنَا — безгә рәхмәт кылырсың, шәфкать итәрсең.
• الْخَاسِرِينَ — зыян күрүчеләр, үз бәхетләрен югалтучылар.

Аять тәфсире:

Әдәм һәм Һава галәйһимәссәләм, Аллаһы тәгаләнең әмеренә каршы килеп, тыелган агачтан ашагач, аларның күзләренә гөнаһлары ачыкланды һәм алар зур үкенеч белән әйттеләр: "И Раббыбыз! Без үзебезгә золым кылдык, ягъни Син безгә әмер иткән нәрсәне үтәмәү белән үз җаннарыбызга зарар китердек. Әгәр Син безне ярлыкамасаң һәм безгә рәхмәт кылмасаң, әлбәттә, без һәлак булучылардан, зыян күрүчеләрдән булыр идек. Без дөньяда да, ахирәттә дә үз өлешебезне югалтучылардан булыр идек".

Бу сүзләр — Аллаһы тәгаләнең Әдәмгә өйрәткән тәүбә сүзләре иде. Әдәм галәйһиссәлам бу дога белән Раббысына ялварды, һәм Аллаһы аның тәүбәсен кабул итте, гөнаһын гафу итте. Бу — Аллаһының мәрхәмәтлелеген һәм тәүбә итүче бәндәләрен ярлыкавын күрсәтә.

Аятьтән алынган файдалар:

• Гөнаһ кылган кеше үзен гаепләргә һәм Аллаһыдан ярлыкау сорарга тиеш, башкаларны гаепләүдән тыелырга кирәк.
• Тәүбә итү өчен кирәкле сүзләрне Аллаһының үзе өйрәтүе — Аның бәндәләренә карата рәхмәтлелеген күрсәтә.
• Аллаһы тәгаләнең ярлыкавы һәм рәхмәте булмаса, кеше, әлбәттә, зыян күрүчеләрдән булыр иде. Шуңа күрә һәрвакыт Аллаһыдан ярлыкау һәм рәхмәт сорарга кирәк.
• Гөнаһтан соң тәүбә итеп, Аллаһыга ялвару — бәндәнең Раббысына якынлашуына сәбәп була.