سورت طارق — آیت 17

د معنیٰ لرونکي کلمې:

• فَمَهِّلْ: مهلت ورکړه، وروسته کړه، انتظار وکړه.
• أَمْهِلْهُمْ: دوی ته مهلت ورکړه.
• رُوَيْدًا: لږ څه، ډېر لږ وخت.

تفسیر:

اى رسوله! ته د دغو كافرانو په معامله كې ښه صبر وكړه، او د هغوى د سزا غوښتنه مه كوه. الله تعالیٰ تا ته وايي چې دوى ته لږ مهلت وركړه، ډېر ژر به دوى ته سزا درسيږي. دا خبره د الله تعالیٰ له خوا كافرانو ته یو ډول ګواښ او وعید دى، چې د هغوى عذاب به حتماً راشي، خو ورو ورو او په خپل وخت به راشي. لکه څنګه چې كافرانو د حق د ختمولو لپاره چلونه او كيدونه كول، الله تعالیٰ هم د هغوى په مقابل كې پټ تدبيرونه لري، او دوى به په خپل كيد كې پاتې راشي. دا مهلت د دوى لپاره رحمت نه دى، بلكې د عذاب د زياتوالي سبب ګرځي، ځكه چې دوى به په خپل كفر او سركشۍ كې نور هم زياتيږي، او بيا به د هغوى سزا ډېره سخته وي. لکه څنګه چې د بدر په جګړه كې دوى ته سزا ورسېده، او د الله تعالیٰ وعید په حقه ووت.

فايدې:

• دا آيت مومنانو ته تسليت او ډاډ وركوي چې د كافرانو د چلونو او كيدونو په مقابل كې اندېښنه مه كوئ، ځكه چې الله تعالیٰ د دوى د سزا لپاره وخت ټاكلى دى.
• دا چې الله تعالیٰ كافرانو ته مهلت وركوي، دا د هغوى د رحمت له امله نه دى، بلكې د عدل له مخې دى، تر څو حجت پرې بشپړ شي او بيا يې سزا ورسېږي.
• په دې كې د رسول الله ﷺ او مومنانو لپاره صبر او زغم ته هڅونه ده، چې د دښمنانو له ځورونې او چلونو نه مه وېرېږي، او د الله په وعید باور وكړي.
• دا آيت دا هم ښيي چې د الله تعالیٰ سزا حتمي ده، خو په خپل وخت راځي، او بیړه يې نه كوي، ځكه چې هغه ښه پوهېدونكى او حكيم دى.