სურა ალ-მუნაფიქუნი pdf

როცა თვალთმაქცები შენთან მოდიან, ამბობენ: «ჩვენ ვამოწმებთ, რომ შენ უეჭველად ალლაჰის შუამავალი ხარ». და ალლაჰმა იცის, რომ შენ უეჭველად მისი შუამავალი ხარ და ალლაჰი მოწმობს, რომ თვალთმაქცები უეჭველად მატყუარები არიან.

მათ თავიანთი ფიცები ფარად გაიხადეს (იფიცებიან რათა დააჯერონ რომ ისინი მორწმუნენი არიან, ამით რომ სხვებს თვალები აუხვიონ, და სიკვდილით დასჯასაც რომ გადაურჩნენ) და აცდენენ (მუნაფიყი თვალთმაქცები ხალხს) ალლაჰის გზას. უეჭველად, რაოდენ საძაგელია ის, რასაც ისინი სჩადიოდნენ.

ეს იმიტომ, რომ მათ ირწმუნეს (ფორმალურად), შემდეგ კი უარყვეს, ამიტომ მათ გულებზე ბეჭედი დაიდო და ისინი ვერაფერს ხვდებიან.

როცა მათ ხედავ, მათი სხეულები გაოცებს (გარეგნული აღნაგობა), და თუ ილაპარაკებენ, შენ უსმენ მათ ნათქვამს. თითქოს ისინი კედელზე მიყუდებული ძელები არიან (არ ესმით და არც სარგებლობენ შენი ქადაგებით). მათ ყოველი ყვირილი თავის საწინააღმდეგოდ მიაჩნიათ (შიშობენ რომ მათ საწინააღმდეგოდ რამე არ ითქვას). ისინი მტრები არიან, მაშ, ერიდე მათ. ალლაჰმა დასწყევლოს ისინი! როგორ არიან ისინი ჭეშმარიტებას აცდენილნი!

და როცა მათ [თვალთმაქცებს] ეუბნებიან: «მოდით, რათა ალლაჰის შუამავალმა თქვენთვის შენდობა ითხოვოს», ისინი თავს ატრიალებენ (აჩვენებენ, რომ ეს მათ არ სჭირდებათ), და შენ ხედავ, როგორ შორდებიან ისინი, და ამპარტავნებას ავლენენ.

სულ ერთია მათთვის, შენდობას სთხოვ მათთვის თუ არ სთხოვ, ალლაჰი არასდროს შეუნდობს მათ. უეჭველად, ალლაჰი არ დააყენებს სწორ გზაზე ურჩ ხალხს.

ისინი [თვალთმაქცები] არიან, ვინც ამბობენ (მედინის მცხოვრებლებს): «ნუ დახარჯავთ მათზე, ვინც ალლაჰის შუამავალთან არიან [მექქიდან მასთან გადასახლებულებზე], სანამ ისინი (მას) არ დატოვებენ!» მაგრამ ალლაჰს ეკუთვნის ცათა და მიწის საუნჯეები, თუმცა თვალთმაქცებს ეს არ ესმით.

ისინი [თვალთმაქცები] ამბობენ: «თუ ქალაქში [მედინაში] დავბრუნდებით, მაშინ ძლევამოსილი [გულისხმობენ თვალთმაქცებს] აუცილებლად განდევნის იქიდან [მედინიდან] დამცირებულს [გულისხმობენ მორწმუნეებს]». მაგრამ სიდიადე ეკუთვნის ალლაჰს, მის მოციქულს და მორწმუნეებს, თუმცა თვალთმაქცებმა ეს არ იციან!

ჰეი, თქვენ, რომელთაც ირწმუნეთ! ნუ მოგაცდენთ თქვენი ქონება და შვილები ალლაჰის ხსენებისგან. და ვინც ამას ჩაიდენს, სწორედ ისინი არიან წაგებულნი.

და ხარჯეთ იქიდან, რაც გიბოძეთ, ვიდრე რომელიმე თქვენგანს სიკვდილი ეწევა და მაშინ ის იტყვის: «უფალო ჩემო! ნეტავ მცირე ხნით გადამივადო, რათა მოწყალება გავიღო და მართალთაგანი ვიყო!»

და არ გადაუვადებს ალლაჰი არც ერთ სულს, როცა მისი დრო დადგება. და ალლაჰმა უწყის, რასაც თქვენ აკეთებთ.