სურა ატ-ტაღაბუნი pdf

ადიდებს ალლაჰს ყოველივე, რაც ცათა შინაა და ყოველივე, რაც მიწაზეა. მისია მეუფება და მისია ქება-დიდება. და იგი ყოვლისშემძლეა.

ის — ალლაჰია, რომელმაც თქვენ (ო, ადამიანებო) (არარსებობიდან) შეგქმნათ; თქვენ შორის არიან ურწმუნონი და თქვენ შორის არიან მორწმუნენიც. და ალლაჰი ხედავს იმას, რასაც თქვენ აკეთებთ (და ამის მიხედვით მოგაგებთ).

მან ჭეშმარიტებით შექმნა ცანი და მიწა (და ყველაფერი, რაც მათშია), თქვენ (ო, ადამიანებო ადამიანური) სახე მოგანიჭათ და საუკეთესო ფორმა მისცა [ადამიანი ბევრ სხვა ქმნილებაზე უფრო ლამაზად შექმნა]. და მასთან არის დაბრუნება.

მან იცის, რაც არის ცათა შინა და ქვეყანასა ზედა, და იცის, რასაც მალავთ და რასაც აცხადებთ. და ალლაჰმა იცის, რაც გულებშია (კარგი განზრახვა იქნება თუ ცუდი).

განა არ მოსულა თქვენამდე ამბავი იმათი, ვინც უწინ უარყო? და იგემეს თავიანთი საქმის სიმძიმე და მათთვისაა მწარე სასჯელი.

ეს იმიტომ, რომ მათთან თავიანთი შუამავლები ცხადი მტკიცებულებებით მოდიოდნენ, მაგრამ მათ თქვეს: «ნუთუ ადამიანმა უნდა დაგვადგინოს სწორ გზაზე?!» მათ უარყვეს და ზურგი აქციეს. ალლაჰს კი მათი რწმენა არ სჭირდება — რადგან ალლაჰი მდიდარია და ქების ღირსი.

ურწმუნონი ამტკიცებენ, რომ ისინი არასდროს არ იქნებიან აღსდგენილნი. უთხარი: «პირიქით! ვფიცავ ჩემს უფალს, თქვენ უეჭველად აღსდგენილნი იქნებით, შემდეგ კი გეუწყებათ, რაც ჩაიდინეთ. და ეს ალლაჰისთვის იოლია».

მაშ, ირწმუნეთ ალლაჰი, მისი შუამავალი და სინათლე (ყურანი), რომელიც ჩვენ გარდმოვავლინეთ. და ალლაჰმა უწყის, რასაც თქვენ აკეთებთ.

(გახსოვდეთ) ის დღე, როცა ის შეგკრებთ თქვენ ყველას საერთო შეკრების დღისთვის [სამსჯავროს დღე] — ეს არის თვითმოტყუების გამჟღავნების დღე. [ამ დღეს ურწმუნონი მიხვდებიან, რამდენად მოიტყუეს თავი] და ვინც ირწმუნებს ალლაჰს და კეთილ საქმეებს აღასრულებს, ის (ალლაჰი) გაასუფთავებს მას მისი ცუდი საქმეებისგან და შეიყვანს ბაღებში (სამოთხეში), რომელთა ქვეშაც მდინარეები მიედინება, და ისინი იქ დარჩებიან მარად, სამუდამოდ. სწორედ ეს არის უდიდესი წარმატება!

ხოლო ისინი, ვინც არ ირწმუნეს და ცრუდ მიიჩნიეს ჩვენი სასწაულები (აიათები), აი, ისინი იქნებიან ცეცხლის მკვიდრნი და დარჩებიან იქ მარადჟამს. რა საშინელი დაბრუნების ადგილია იგი!

რაც არ უნდა უბედურება მოხდეს, ის მხოლოდ ალლაჰის ნებით ხდება. და ვინც ირწმუნა ალლაჰი, მის გულს ის (ალლაჰი) წარმართავს და ალლაჰმა ყველაფერი იცის.

და დაემორჩილეთ ალლაჰს (ყველაფერში, რასაც იგი ბრძანებს და კრძალავს) და დაემორჩილეთ შუამავალს (იმაში, რასაც მას თქვენამდე მოაქვს თავისი უფლისგან). ხოლო თუ ზურგს შეაქცევთ (ალლაჰისა და მისი შუამავლისადმი მორჩილებას), მაშ იცოდეთ, რომ ჩვენს შუამავალს ეკისრება მხოლოდ ნათლად გადმოცემა.

ალლაჰი! არ არსებობს ღვთაება, გარდა მისი. დაე, მხოლოდ ალლაჰს მიენდონ მორწმუნენი.

ჰეი, თქვენ, რომელთაც ირწმუნეთ! ჭეშმარიტად, თქვენს მეუღლეთა და შვილთა შორის არიან თქვენი მტრები, მაშ, ერიდეთ მათ. და თუ აპატიებთ, თვალს დახუჭავთ და მიუტევებთ, მაშინ, ჭეშმარიტად, ალლაჰი მიმტევებელი, შემწყალებელია.

თქვენი ქონება და თქვენი შვილები მხოლოდ გამოცდაა, ხოლო ალლაჰთანაა დიადი საზღაური.

მაშ, გეშინოდეთ ალლაჰის, რამდენადაც შეძლებთ, და ისმინეთ, და დაემორჩილეთ, და გაიღეთ სიკეთე თქვენივე სულებისთვის. და ვინც დაცული იქნება საკუთარი სულის სიძუნწისგან, სწორედ ისინი არიან ნეტარნი.

თუ თქვენ ალლაჰს ასესხებთ კეთილ სესხს, ის გაგიორმაგებთ მას და შეგინდობთ თქვენ. და ალლაჰი მადლიერი, შემწყნარებელია.

დაფარულისა და ცხადის მცოდნე, ძლევამოსილი, ბრძენი.