Surah An-Nahl — Aya 97

Ma’anonin Kalmomin Ayar:

• "Falanuhyiyannahu hayatan tayyibah": Lalle ne za mu rayar da shi rayuwa mai daɗi, mai natsuwa da kwanciyar hankali.
• "Walajaziyannahum ajrahum": Kuma lalle ne za mu saka musu ladarsu.
• "Bi-ahsani ma kanu ya'malun": Da mafi kyawun abin da suka kasance suna aikatawa.

Tafsirin Ayar:

Duk wanda ya aikata aikin alheri wanda ya dace da umarnin Allah, ko namiji ne ko mace, alhali kuwa yana da imani da Allah da Manzonsa (tsira da amincin Allah su tabbata a gare shi), to Allah Ya yi alkawarin cewa zai rayar da shi rayuwa mai daɗi a duniya, mai natsuwa da kwanciyar hankali, da yarda da abin da Allah Ya rabashi, da wadatar zuciya, da samun tawfiqin yin ta’a. Wannan ba shi yana nufin yawan dukiya ba, domin mai yawan dukiya na iya zama cikin wahala, kuma mai karancin abin duniya na iya zama cikin natsuwa da farin ciki idan Allah Ya ba shi imani da yarda da kaddara.

Sa’an nan kuma a Lahira, Allah zai saka musu da mafi kyawun abin da suka aikata a duniya, yana mai musu kyauta da falalarsa, inda zai kara musu lada mai girma fiye da abin da suka aikata. Wannan alkawari ne daga Allah wanda ba ya saɓawa.

Fa’idojin Ayar:

1. Imani da aiki na da alaƙa da juna; aiki ba ya samun karbuwa sai da imani, kuma imani ba ya cika sai da aiki.
2. Allah bai bambanta tsakanin namiji da mace ba wajen samun lada; duk wanda ya aikata alheri da imani, to lada yana nan a gare shi.
3. Rayuwa mai daɗi ba ta dogara ga yawan kudi ba, amma tana cikin natsuwar zuciya, yarda da kaddara, da kusancin Allah.
4. Wannan ayar tana ƙarfafa muminai su yi aikin alheri, domin suna da alkawarin Allah na samun kyakkyawar rayuwa a duniya da kuma babban lada a Lahira.
5. Kyautar Allah ga bayi masu imani ba ta ƙarewa da aikin da suka yi ba, domin yana musu sakamako da mafi kyawun abin da suka aikata, wanda hakan ke nuna falalar Allah da karimcinsa.