சூரா அல்-கஹ்ஃப் — வசனம் 45

சொற்பொருள் விளக்கம்:

• هَشِيمًا: உலர்ந்து, நொறுங்கிப் போன தாவரம்.
• تَذْرُوهُ: அதை (காற்று) சிதறடிக்கிறது, பறக்க விடுகிறது.
• مُقْتَدِرًا: முழு வல்லமை பெற்றவன், அனைத்தின் மீதும் ஆற்றலுடையவன்.

விளக்கம்:

நபியே! உலக வாழ்க்கையின் உண்மை நிலையை மக்களுக்கு – குறிப்பாக செல்வத்தாலும் அந்தஸ்த்தாலும் மாயையில் மூழ்கியவர்களுக்கு – ஓர் உதாரணம் மூலம் தெளிவுபடுத்துவீராக. இந்த உலக வாழ்க்கையின் தோற்றப் பொலிவும், அதன் விரைவான முடிவும், வானத்திலிருந்து நாம் இறக்கிய மழைநீரைப் போன்றது. அந்த நீரினால் பூமியின் தாவரங்கள் செழித்து, பசுமையாக, அழகாக வளர்கின்றன. ஆனால் சிறிது காலத்திற்குப் பிறகு அந்தப் பசுமையான தாவரங்கள் உலர்ந்து, நொறுங்கிப் போய், காற்று அவற்றை இங்கும் அங்கும் சிதறடிக்கும் நிலைக்கு ஆளாகின்றன. அதுபோலவே, இந்த உலக வாழ்க்கையின் இன்பங்களும், செல்வமும், அழகும் சில நாட்களுக்கு மட்டுமே நிலைத்திருக்கும்; பின்னர் அனைத்தும் அழிந்துபோய் வெறுமையாகிவிடும். அல்லாஹ் அனைத்தின் மீதும் முழு வல்லமை கொண்டவன்; அவன் நினைத்ததை நிகழ்த்த வல்லவன். அவன் விரும்பியவற்றை உயிர்ப்பிக்கிறான், விரும்பியவற்றை அழிக்கிறான், எதுவும் அவனுக்கு கடினமானதல்ல.

பயன்கள்:

1. இந்த உலக வாழ்க்கை அழகாகத் தோன்றினாலும், அது நிலையற்றது என்பதை உணர்ந்து, மறுமை வாழ்க்கைக்காகத் தயாராக வேண்டும்.
2. செல்வம், அந்தஸ்து, அழகு போன்றவற்றில் மயங்கிக் கர்வம் கொள்ளக் கூடாது; ஏனெனில் இவை அனைத்தும் ஒரு நாள் அழிந்துபோகக் கூடியவை.
3. அல்லாஹ்வின் வல்லமையை நினைவுகூர்வது, அவனிடம் பணிவுடன் நடந்துகொள்ளவும், அவனுடைய கட்டளைகளைப் பின்பற்றவும் நம்மைத் தூண்டுகிறது.
4. இந்த உதாரணம், உலக இன்பங்களில் மூழ்கியிருப்பவர்களுக்கு ஓர் எச்சரிக்கையாகும்; நிலையான வாழ்க்கையான மறுமைக்காக நல்லறங்களைச் செய்ய விரைவுபடுத்துகிறது.