سورت زخرف — آیت 62

د مهمو کلمو معناګانې:

• لَا يَصُدَّنَّكُمُ: تاسو مه منع کړي، تاسو ونه ګرځوي.
• عَدُوٌّ مُّبِينٌ: ښکاره دښمن، هغه دښمن چې دښمني يې څرګنده او روښانه ده.

د آيت تفسير:

او شیطان دې تاسو د الله له دين او هغه لارې نه مه ګرځوي چې الله تاسو ته په امر او نهي كې ټاكلي ده. شیطان د وسوسو او غولونې په وسيله هڅه كوي چې تاسو له نېغې لارې واړوي او د الله له اطاعت نه مو منع كړي. بېشكه هغه ستاسو ښکاره دښمن دى، د هغه دښمني پټه نه ده بلكې څرګنده او ښکاره ده، ځكه هغه له آدم عليه السلام نه تر نن ورځې پورې د انسان د ګمراهۍ او تباهۍ هڅه كوي. نو تاسو بايد د هغه له وسوسو او چلونو نه محتاط اوسئ او د هغه په پيروي كې مه ورځئ.

فايدې:

• دا آيت مومنانو ته د شیطان د خطر څخه خبرتيا وركوي، تر څو د هغه له مكر او فریب نه په پام كې ساتل كېږي.
• په دې پوهېږو چې شیطان زموږ ښکاره دښمن دى، نو څنګه چې انسان له خپل ښکاره دښمن نه ځان ساتي، هماغسې بايد له شیطان نه هم ځان وساتي.
• د دې آيت له مخې، د شیطان د وسوسو په مقابل كې د الله د اطاعت او د هغه د لارې پر تعقيب ټينګار شوی، ځكه چې د الله اطاعت د شیطان له شر نه د ساتنې سبب ګرځي.
• په دې كې د مومنانو لپاره تسليت دى چې كه دوی د شیطان له وسوسو نه ځان وساتي، نو د الله په لار كې به بريالي وي او د هغه د رحمت او فضل تر سیوري لاندې به ژوند وكړي.