Surah Al-Hujurat — Aya 1

Ma’anonin Kalmomin Ayar:

• لَا تُقَدِّمُوا بَيْنَ يَدَيِ اللَّهِ وَرَسُولِهِ: Kada ku yi gaggawar yanke hukunci ko faɗar magana ko aikata wani abu kafin Allah da ManzonSa (SAW) su yanke hukunci.
• وَاتَّقُوا اللَّهَ: Ku ji tsoron Allah ta hanyar yin biyayya ga umarninSa da nisantar abin da Ya hana.
• سَمِيعٌ عَلِيمٌ: Mai jin dukan maganganunku, kuma Masani ga dukan ayyukanku da abubuwan da ke cikin zukatanku.

Fassarar Ayar:

Ya ku waɗanda suka yi imani da Allah da ManzonSa! Kada ku yi gaggawar yanke hukunci ko faɗar magana ko aikata wani abu a cikin al’amuran addini ko duniya kafin Allah da ManzonSa su yanke hukunci a kan hakan. Wato kada ku gabatar da ra’ayinku ko son zuciyarku a gaban umarnin Allah da ManzonSa. Kuma ku ji tsoron Allah ta hanyar bin umarninSa da nisantar abin da Ya hana, don kada ku saba wa umarnin Allah ko ManzonSa. Lalle ne Allah Mai jin dukan maganganunku, kuma Masani ga dukan ayyukanku da abubuwan da ke ɓoye a cikin zukatanku, kuma zai yi muku hisabi a kan hakan.

Wannan ayar tana gargadin muminai da kada su ƙirƙira sabbin abubuwa a cikin addini (bidi’a), ko su yanke hukunci a kan al’amuran shari’a ba tare da nassin Allah da ManzonSa ba. Dole ne su jira umurnin Allah da ManzonSa a duk abin da suke so su yi ko faɗa.

Fa’idojin Ayar:

1. Wannan ayar tana koyar da mu cewa musulmi dole ne ya ba da fifiko ga umarnin Allah da ManzonSa a kan duk wani ra’ayi ko son zuciya, domin wannan shine tushen imani.
2. Tana nuna mana cewa Allah yana jin dukan maganganunmu kuma yana sane da dukan ayyukanmu, don haka dole ne mu riƙa yin aiki da magana bisa ga abin da Allah ya yarda.
3. Tana kare addinin Musulunci daga gurbata shi ta hanyar ƙirƙirar sabbin abubuwa (bidi’a) waɗanda ba su daga Allah ba, domin addini cikakke ne kuma babu buƙatar ƙara ko ragewa.
4. Tana koyar da mu yadda za mu kasance masu haƙuri da natsuwa a cikin al’amuranmu, kada mu yi gaggawar yanke hukunci kafin mu san abin da Allah da ManzonSa suka faɗa.
5. Tana ƙarfafa mu mu riƙa tsoron Allah a duk halayenmu, domin wannan shine tushen kyakkyawan ɗabi’a da zaman lafiya a cikin al’umma.