Sura Al-Jumu'a — Aya 4

Maana ya maneno:

• Fadhl: ni neema, hisani, na wingi wa wema.
• Yu'atihi: humpa.
• Dhul-Fadhlil-'Adhim: Mwenye fadhila na hisani kubwa.

Tafsiri ya Aya:

Hilo lililotajwa hapo awali — la kumtuma Mtume Muhammad (ﷺ) kwa Waarabu na wasio Waarabu, na kumteua kwa ujumbe huu mkubwa — ni fadhila kubwa kutoka kwa Mwenyezi Mungu. Humpa anayemtaka miongoni mwa waja wake, kwa hekima Yake na mapenzi Yake. Na Mwenyezi Mungu Ndiye Mwenye fadhila kubwa, ambaye hisani yake imeenea kwa viumbe vyote. Miongoni mwa fadhila zake kubwa ni kumtuma Mtume huyu kwa watu wote kwa ujumla, na kumteua kwa ujumbe huu wa mwisho.

Faida za Aya:

• Uthibitisho kwamba utume na unabii ni chaguo la Mwenyezi Mungu, si jambo la kujitafutia au kupatikana kwa juhudi za kibinadamu.
• Kuthamini neema ya utume wa Mtume Muhammad (ﷺ) kwa watu wote, ambayo ni fadhila kubwa isiyo na kifani.
• Kuwatia waja hamasa ya kumshukuru Mwenyezi Mungu kwa neema zake, na kujitahidi kuzitafuta kwa kumtii na kumwabudu.
• Kujua kwamba fadhila za Mwenyezi Mungu hazina mipaka, na kwamba Yeye humpa anayemtaka bila ya kuhesabiwa.