سورت انفال — آیت 15

د معاني کلمو بیان:

• زَحْفًا: د جنګ په ډګر کې د دښمن سره مخامخ کېدل، کله چې دواړه لښکرې یو بل ته نږدې شي او په ورو ورو سره مخ ته ورکړي.
• فَلَا تُوَلُّوهُمُ الْأَدْبَارَ: دوی ته خپلې شاګانې مه وراړوئ، یعنې له جنګ څخه مه تښتئ.

د آیت تفسیر:

اى هغو كسانو چې پر الله او د هغه پر رسول يې ايمان راوړى او د هغه پر احكامو يې عمل كړى دى! كله چې تاسو په جنګ كې له كافرانو سره مخامخ شئ، په داسې حال كې چې دواړه لښكرې يو بل ته نژدې شوي وي او جنګ پيل شوى وي، نو له هغوى څخه مه تښتئ او خپلې شاګانې مه وراړوئ. بلكې ثابت قدم اوسئ او د هغوى په وړاندې ټينګ ودرېږئ، ځكه چې الله له تاسو سره دى او ستاسو مدد او ملاتړ به كوي. دا حكم د هغه وخت لپاره دى چې د دښمن شمېر د مسلمانانو په پرتله دوه چنده يا له هغه كم وي؛ خو كه دښمن ډېر زيات وي او د ژوند بچ كول د جنګ د بيا تنظيم لپاره وي، نو بيا بېله خبره ده.

فايدې:

1. په جنګ كې ثابت قدمي او صبر د مؤمن له مهمو صفتونو څخه دى، او الله له صبر كوونكو سره ملګرتيا كوي.
2. له جنګ څخه تېښته د سترو ګناهونو څخه ده، ځكه چې دا د مسلمانانو د زړورتیا او قربانۍ روحيه كمزورې كوي.
3. الله تعالی خپلو بندګانو ته د دښمن پر وړاندې د ټينګې درېدنې امر كوي، ځكه چې بريا يواځې د الله په مرسته ده، او هغه له خپلو مؤمنو بندګانو سره مرسته كوي.
4. دا آيت مسلمانانو ته دا درس وركوي چې په سختو حالاتو كې بايد له الله نه مرسته وغواړي او پر هغه توكل وكړي، نه دا چې له ميدان څخه وتښتي.
5. د دښمن د شمېر زياتوالى بايد د مسلمانانو د زړه ماتولو سبب نه شي، ځكه چې الله د خپلو بندګانو مدد كوي، كه د دښمن شمېر څومره هم زيات وي.