සූරා අත්-තව්බා — ආයාත් 41

වදන්හි අර්ථ:

• انْفِرُوا – යුද්ධය සඳහා පිටත් වන්න.
• خِفَافًا – සැහැල්ලු අය (තරුණ, නිදහස්, ධනවත්).
• ثِقَالًا – බරැති අය (මහලු, වහලුන්, දුප්පත්).
• وَجَاهِدُوا – උත්සාහ කරන්න, සටන් කරන්න.
• فِي سَبِيلِ اللَّهِ – අල්ලාහ්ගේ මාර්ගයේ.

අර්ථ නිරූපණය:

අහෝ විශ්වාසවන්තයිනි! ඔබ සැවොම අල්ලාහ්ගේ මාර්ගයේ යුද්ධය සඳහා පිටත් වන්න. එය ඔබට සැහැල්ලු වේවා හෝ බර වේවා, ඔබ තරුණ වේවා මහලු වේවා, ධනවත් වේවා දුප්පත් වේවා, පහසු කාලයේදී වේවා අපහසු කාලයේදී වේවා – කිසිදු තත්වයකදී යුද්ධයෙන් ඉවත් නොවී සියල්ලෝම පිටත් වන්න. ඔබේ ධනයෙන් හා ජීවිතයෙන් අල්ලාහ්ගේ මාර්ගයේ උත්සාහ කරන්න. ධනය වියදම් කරන්න, අල්ලාහ්ගේ වචනය උසස් කිරීම සඳහා සටන් කරන්න.

මෙම පිටත්වීම සහ ධනය හා ජීවිතය කැප කිරීම – ගෙදර රැඳී සිටීමට හා ධනය හා ජීවිතය ආරක්ෂා කර ගැනීමට වඩා ඔබට මෙලොවදීත් පරලොවදීත් බොහෝ යහපත් හා ප්රයෝජනවත් වේ. එය අල්ලාහ්ගේ තෘප්තිය ලබා ගැනීමට, සතුරා පරාජය කිරීමට සහ භූමිය උරුම කර ගැනීමට හේතු වේ. ඔබ මෙය දන්නවුන් නම්, එයට ඉක්මන් වන්න.

උපදේශන හා ප්රයෝජන:

1. අල්ලාහ්ගේ මාර්ගයේ කැපවීම – ධනයෙන් හා ජීවිතයෙන් – ඉස්ලාමයේ උත්තම ක්රියාවකි. එය ඇදහිලිවන්තයාගේ ඇදහිල්ලේ පරිපූර්ණත්වය පෙන්නුම් කරයි.
2. යහපත් දේ කිරීමට ඇති අපහසුතා හෝ පහසුව බාධාවක් නොවිය යුතුය. සෑම තත්වයකදීම අල්ලාහ්ට කීකරු වීමට උත්සුක විය යුතුය.
3. ධනය හා ජීවිතය අල්ලාහ්ගේ මාර්ගයේ වියදම් කිරීමෙන් ලැබෙන ප්රතිඵල – අල්ලාහ්ගේ තෘප්තිය, සතුරාට එරෙහි ජයග්රහණය සහ පරලොව සාර්ථකත්වය – ලෞකික සැප සම්පත්වලට වඩා බොහෝ උතුම්ය.
4. මෙම ආයාව අපට උගන්වන්නේ සැබෑ සාර්ථකත්වය ඇත්තේ අල්ලාහ්ගේ මාර්ගයේ කැපවීමෙන් බවයි. එය ජීවිතයේ සැබෑ අරුත හා සතුට සොයා ගැනීමට මාර්ගය පෙන්වා දෙයි.
5. අල්ලාහ් තම ගැතියන්ට යහපත් දේම පමණක් නියෝග කරන බව මෙමගින් පැහැදිලි වේ. එබැවින් ඔහුගේ නියෝග පිළිපැදීමෙන් අපටම යහපත සිදු වේ.