Sura At-Tawba — Aya 108

Maana ya maneno:

• Lā taqum fīhi abadā: Usisimame kwa ajili ya sala ndani yake (msikiti huo) kamwe.
• Usissa 'alā at-taqwā: Msingi wake uliwekwa juu ya kumcha Mwenyezi Mungu na utii Wake.
• Min awwali yawm: Tangu siku ya kwanza ya kuanzishwa kwake.
• Aḥaqqu an taqūma fīhi: Anafaa zaidi kusimama ndani yake kwa ajili ya sala.
• Yataṭahharū: Kujitakasa na uchafu wa maasi na najisi za kimwili.

Tafsiri ya Aya:

Ewe Mtume! Usisimame kamwe kusali katika msikiti huo (Msikiti wa Dhirar) ambao ulijengwa kwa nia ya kugawanya Waumini na kuwadhuru. Hakika Msikiti ambao msingi wake uliwekwa juu ya kumcha Mwenyezi Mungu tangu siku ya kwanza — na huo ni Msikiti wa Qubā' — ndio unaostahiki zaidi wewe kusimama ndani yake kwa ajili ya sala. Katika msikiti huo wapo watu wanaopenda kujitakasa na uchafu wa dhambi kwa kutubu na kuomba msamaha, na pia kujitakasa na najisi kwa kutumia maji. Na Mwenyezi Mungu anawapenda wale wanaojitakasa na uchafu wote, wa kimwili na wa kiroho. Na ikiwa Msikiti wa Qubā' umejengwa juu ya taqwa tangu mwanzo, basi Msikiti wa Mtume (Masjid an-Nabawi) ni wa kwanza kustahiki hilo, kwa kuwa msingi wake pia uliwekwa juu ya taqwa.

Faida Zinazotokana na Aya:

1. Utakatifu wa nia katika kujenga misikiti: Aya hii inatuonyesha kwamba misikiti haijengwi kwa ajili ya majivuno au kugawanya jamii, bali kwa ajili ya kumtii Mwenyezi Mungu na kuwa na umoja wa Waislamu.
2. Fadhila ya kujitakasa: Mwenyezi Mungu anawapenda wale wanaojitakasa na uchafu wa dhambi na najisi. Hii inatuhimiza kudumisha usafi wa mwili na roho, kwani usafi ni sehemu ya imani.
3. Kutanguliza maslahi ya dini kuliko mahusiano ya kibinafsi: Mtume (SAW) alikataa kusali katika msikiti wa Dhirar ingawa aliombwa, ili kuzuia madhara makubwa ya kugawanya Ummah. Hii inatufundisha kuwa si kila ombi la watu linakubaliwa, hasa likiwa na madhara kwa dini na jamii.
4. Kujenga juu ya msingi wa taqwa: Kila jambo katika maisha ya Muislamu — iwe ni ujenzi wa misikiti, nyumba, au misingi ya familia — linapaswa kuanza kwa kumcha Mwenyezi Mungu na kufuata mafundisho ya Qur'an na Sunna, ili liwe na baraka na kudumu.
5. Tahadhari dhidi ya nia mbaya: Aya inaonya dhidi ya kujenga vitu kwa nia ya kudhuru Waislamu na kugawanya jamaa zao, kwani Mwenyezi Mungu anavijua mambo yote na atamlipa kila mtu kwa nia yake.