სურა ას-საფი pdf

ადიდებს ალლაჰს ყოველივე, რაც ცათა შინაა და რაცაა ქვეყანაზედ. და იგი ძლევამოსილი, ბრძენია.

ჰეი, თქვენ, რომელთაც ირწმუნეთ! რატომ ამბობთ იმას, რასაც არ აკეთებთ?

დიდად საძულველია ალლაჰის წინაშე, რომ ამბობთ იმას, რასაც არ აკეთებთ!

უეჭველად, ალლაჰს უყვარს ისინი, ვინც მის გზაზე მწკრივებად იბრძვიან, თითქოს მტკიცედ შეკრული შენობა იყვნენ.

და აჰა, უთხრა მუსამ თავის ხალხს: «ჰეი, ჩემო ხალხო! რატომ მტანჯავთ, როცა იცით, რომ მე თქვენთან ალლაჰის შუამავალი ვარ?» და როცა ისინი გზას ასცდნენ, ალლაჰმაც მათი გულები გზას ააცდინა. და ალლაჰი არ დაადგენს ჭეშმარიტ გზაზე ურჩ ხალხს.

და აჰა, თქვა 'ისამ, მარიამის ძემ: «ჰეი, ისრაელის ძენო! მე მოციქული ვარ თქვენდამი ალლაჰისგან, დამმოწმებელი იმისა, რაც ჩემამდე იყო თორაში, და მახარობელი მოციქულისა, რომელიც ჩემს შემდეგ მოვა, მისი სახელი იქნება აჰმადი». ხოლო როცა იგი მოევლინა მათ ცხადი სასწაულებით, მათ თქვეს: «ეს ცხადი ჯადოქრობაა».

და ვინ არის იმაზე უსამართლო, ვინც ალლაჰზე სიცრუეს თხზავს, მაშინ, როცა მას ისლამისკენ მოუწოდებენ? და ალლაჰი არ დაადგენს ჭეშმარიტ გზაზე უსამართლო ხალხს.

სურთ, რომ ჩააქრონ ალლაჰის ნათელი თავიანთი ბაგეებით, მაგრამ ალლაჰი სრულყოფს თავის ნათელს, თუნდაც სძულდეთ ეს ურწმუნოებს.

იგია (ალლაჰი), რომელმაც მოავლინა თავისი შუამავალი ჭეშმარიტი გზითა და ჭეშმარიტი სარწმუნოებით, რათა იგი აღამაღლოს ყველა სარწმუნოებაზე, თუნდაც ეს სძულდეთ წარმართებს.

ჰეი, თქვენ, რომელთაც ირწმუნეთ! ხომ არ მიგითითოთ ერთ ვაჭრობაზე, რომელიც გიხსნით მტანჯველი სასჯელისგან?

(ეს არის, რომ) ირწმუნოთ ალლაჰი და მისი შუამავალი, და იბრძოლოთ ალლაჰის გზაზე თქვენი ქონებითა და სულებით. ეს თქვენთვის უკეთესია, რომ იცოდეთ.

ის შეგინდობთ თქვენს ცოდვებს და დაგამკვიდრებთ სამოთხის ბაღებში, სადაც მდინარეები მოედინება, და საუკეთესო სავანეებში, მარადიულ ბაღებში. აი, ესაა უდიდესი წარმატება!

და სხვაც, რაც თქვენ გიყვართ: შეწევნა ალლაჰისგან და ახლო გამარჯვება. და ახარე მორწმუნეებს!

ჰეი, თქვენ, რომელთაც ირწმუნეთ! იყავით ალლაჰის შემწენი, როგორც უთხრა 'ისამ, ძემ მარიამისამ, მოწაფეებს: «ვინ იქნება ჩემი შემწე ალლაჰის გზაზე?» მოწაფეებმა უპასუხეს: «ჩვენ ვართ ალლაჰის შემწენი!» მაშინ ისრაელის ძეთა ერთმა ნაწილმა ირწმუნა, ხოლო მეორე ნაწილმა უარყო. მაშინ ჩვენ დავეხმარეთ მორწმუნეებს ('ისას/იესოს მომხრეებს) მათი მტრების წინააღმდეგ და ისინი გამარჯვებულნი გამოვიდნენ.